西藏遊（十五） 2011.09.12 九寨溝（二）：珍珠灘，珍珠灘瀑布，鏡海，日則溝群海，犀牛海，老虎海，樹正寨。

西藏遊（十五） 九寨溝（二）：珍珠灘，珍珠灘瀑布，鏡海，日則溝群海，犀牛海，老虎海，樹正寨。

文章日期：02/07/2012 09:24 pm

九寨樹熊

西藏遊（十五）

2011.09.12 九寨溝（二）：珍珠灘，珍珠灘瀑布，鏡海，日則溝群海，犀牛海，老虎海，樹正寨。

早餐時，攞多個饅頭、雞蛋，留返做午餐。噚日凍到飛起，今日醒目啦，帶理件厚褸，預備好就出發。入園後，搭車直上珍珠灘。都係一落向下行，繼續昨天未完嘅景點，我哋唔走馬路邊，仍然沿山邊木板道行。

忽然見到有個人喺水溪中行嚟行去，大陸遊人唔顧園規，破壞環境舉動，屢見不鮮，正想開聲做架樑，只見呢位水上飄老兄，執起水中嘅廢紙放入手提籃內。哦，原來係十分負責任嘅工人正在清潔水道。再留意周圍，真係不少清潔工人正在勤懇工作，唔放過地下任何一張廢紙、一塊樹葉，值得讚頌。中國人係可以好乾淨嘅，睇吓佢肯唔肯做啫。

行落珍珠灘瀑布，見到一大群人簇擁一個肥佬，重有藏族打扮嘅靚女貼身陪伴，梗係乜嘢首長領導，駕臨參觀指導，佢唔駛清晒你場，算係咁喇。

行過河對岸，與瀑布隔河相對，一於坐低，一面對住珍珠灘瀑布群，一面啃牦午乾夾饅頭。嘩喇喇嘅飛瀑，靜雞雞咁食晏，相映成趣。

午後，由河嘅右邊，行過左邊，原來別有洞天，人跡罕見，感覺好似行山，非常舒服。天色愈行愈好，愈行愈熱，只着件Ｔee。昨日唔夠衫，今日太多衫。兩日都着錯衫！

一路行，留意到一個現象，好多山邊巨石邊，都擺咗好多大大小小嘅樹枝仔，形態就好似支撑住塊大石。係咪某種宗教上嘅祝福？有機會問吓人。

經過老虎海，再跨過河到樹正寨下。喺寨前，有荒廢水磨坊，亦有水動巨型經輪。九寨溝嘅藏傳佛教，不同於西藏。其他唔講，只講經輪轉動方向。喺九寨溝，教徒逆時針轉經輪，而其他藏區，則順時針方向。

行過水磨坊，橫過車路，走上樹正寨。幾年前，旅客可以住入寨，但環保関係，已取消所有民宿及旅館。一路沿水泥路向上行，兩旁係賣禮品嘅舖頭。忽然水泥路中間有一條涓涓小水流，一睇，一個小女孩踎喺路中間，小水流源頭就在伊人足下。希望小女孩有機會去首都機場或香港迪斯尼，當自然呼喚時，佢會正确咁回應。

今日又睇住咁多先，喺寨前搭巴士返落溝口，速速返回酒店梳洗，今晚全團猛吃猛喝全羊宴。

由酒店行去藏式烤羊店只須10分鐘。藏民老闆已喺門外空地烤緊全羊，團友紛紛入店坐好，即刻開啤酒。冇耐，羊已烤好，老闆托羊入店，我哋紛紛舉機影相。烤羊味道過得去，羊肶還可以，其他部位則嫌太薄，冇乜肉食。其他餸菜亦只係可以，小館子，冇乜要求。

酒過三巡，膽都壯。各人又講笑，又唱歌，笑到碌地，氣氛絕佳。

發個好夢，明天繼續。