松潘古城，雨中燒鴨脾
西藏遊（十七）
2011.09.14九寨溝，松州古城。九黄機場，成都機場，張家界。
收拾好行理，告別九寨溝，旅遊車載我哋小隊去同黃龍小隊匯合，再一齊去松潘古城。實在冇乜好睇，只係等搭飛機前，謀殺時間而已。我倆先坐三輪車，由城門外出發，遊一遊全城，三輪車係hybrid動力，可用腳，又有大摩打。唔夠力，可用電。約半個鐘，就返回原地。落地用腳行，古城內，佛教、回教並存，不時見到僧侶，亦見到包頭嘅穆斯林婦女。喺前面見有人群聚集，喺咪乜嘢群體事件？原來有人結婚，酒家叫「星月樓」，係清真，主家喺門口擺咗接待處，枱面放有糖果，重有煙酒。賓客到賀，即刻擺低禮金，然後上樓飲宴。新娘子企喺門口。吓！着婚紗，好難將清真同婚紗一齊聯想，但事情就係咁發生啦！
行行吓落起雨，走入一間穆斯林小館，冇餐牌，只可揀炒麪或湯麪。味道？冇要求喇，OK咁喇，食飽就算。有個特色，每張抬上都擺咗一碗生蒜頭，連皮嘅。客人可以隨便食，不另收費。任你食，生蒜頭，你又食得幾多？
撑起雨遮，繼續遊城。見有一間賣鹵水嘅鋪頭，問吓價，嘩！一啲都唔平，係富貴食物。惟有放棄，改買一隻烤鴨。買嚟做乜？係今晚嘅晚餐。
集合時間又到，真喺要告別九寨啦。搭旅遊車去九黄機場，check in，行李喺張家界攞，而人就要喺成都轉機。攞住登機証入候機室。冇耐，有自稱地勤人員嘅人，話將兩班機合併。佢將全部人嘅登機証收集，更改座位後，再派發比番我哋。此時，我哋發覺佢將附喺登機証上嘅寄行李收條撈亂晒！個個旅客發晒老脾圍住櫃位大興問罪。最後都搞唔掂，唯有到步時，攞番行李小心啲，希望冇事。
好快飛成都，離登機去張家界重有幾粒鐘，去餐廳食個安樂晚餐，唔好唔記得松州古城嘅烤鴨，攞出嚟加料，再買幾支加士伯，大家一齊飲飽食醉至上機。
飛到張家界蓮花機場已經11點機，好彩攞返全部行李，出埋閘就半夜三更啦。導遊接機帶備電筒，黑孖孖行去停車場，好艱難先揾番架旅遊車。上車、坐低、導遊都好醒目，唔會囉囉唆唆，等我哋瞌吓先。
夜孖孖車到酒店，分房，洗白白，早抖啦！有乜嘢，留番第日講。
No comments:
Post a Comment