天下黃河貴德清
西藏遊（四）
2011.08.31 塔尔寺，途經拉雞山（3820m），貴德地質公園，貴德古城，黃河貴德段。
西寧第三日，今日遊好多景點，要搭好耐車。早上先去塔尔寺，此寺座落離西寧市26公里嘅沙尔鎮蓮花山，係格魯派（黃教）藏傳佛教始創人宗喀巴大師誕生地。建於公元1739年，因先有塔，再建寺，所以名為塔尓寺。
行落車冇遠就見到一條約200公尺經輪長廊，睇怕都有百幾個經輪，非常矚目。寺內唔准影相，不過就隨門票附送DVD及說明小冊子，遊人可專心聽講解。入寺前，先問禁。寺內唔准戴帽，唔准戴黑超。過門檻時，要跨過，唔可以踩上去。對佛像冇得手指指，要用成隻手掌。大家用心記住，偶爾犯規，亦係無心之失，佛陀唔會責怪者。尊重並遵守主人家規矩，咁又點會發生糾紛。
寺內導遊非常專業，講解清晰，團友提出問題，亦一一答到滿意為止。睇嚟，佢重係一個虔誠佛教徒，喺佢說話中，處處流露出佢對人生嘅睇法。寺內走廊企滿叩長頭嘅信眾，佢哋用自己嘅體力、時間、生命為自己嘅信念（或家人、或族群），五體投地膜拜求福，同意唔同意都好，我非常佩服佢哋嘅毅力。
各人問咗好多轉世、達賴、班禪……等問題，雖然都係成頭問號，作為認識嘅開始，唔錯嘅喇。
參觀完畢，嗰個寺導遊，話見我哋與佛有緣，咁啱（又咁啱嘅？）有個寧波車有時間，又住喺附近。佢可以安排，請寧波車為我哋祈福，如果有人買咗手信，亦可請佢開光、加持。……，毋須比好多錢，只隨心（？！）簽香油即可。…有冇人去？…冇喎。導遊好專業，喜怒不形於色，果真有啲道行。既然如此，就此告別各位施主，拜拜。轉身拂袖而去，又接另一團啦。揾食啫。
離寺前，各人排好隊，由第一個經輪開始轉，一路行，一路撥，轉到最後一個。成功喇，信唔信都好，都係一個好玩嘅活動吖！
上車前，去廁所，亦係指是動作。不過，今次有特別意義。塔尔寺海拔3000，如果喺呢度「殊殊」，就係飛流直下三千尺，我當然唔會放過疑是銀河落九天嘅經驗。
趕時間，即驅車繼續西南行，冇耐，即攀過一座又一座山。今日最高點係拉雞山口，3820。沿途都見到放牧，到接近貴德時，山坡上佈滿羊同牦牛，要求司機停車影相，好壯觀嘅景象。忽然見到馬路對面山坡亦有放牧，唔係牛，唔係羊，而係雞，係高原草芽雞，牧雞者係一個穆斯林家庭。有雞就有蛋，啊珊靈機一觸，走入牧民帳蓬要買雞蛋，牧民東摷西摷，率之買咗廿隻雞蛋比佢，午餐加料。
沿山路繼續向下行，青翠山谷，河兩岸全部都係良田，唔似高原地貌，反似江南水鄉。冇錯，貴德，有青海高原小南之稱，實至名歸，如今總算大開眼界。
只喺車上欣賞高原江南，並冇停低效法乾隆尋訪江南李鳳姐。下一站係貴德國家地質公園，呢個係自選景點，咁遠到嚟，雖然犧牲午餐時閒，冇話唔買飛入去睇吓啫。
地質公園係展覽介紹丹霞地貌，遊人同講解員有時坐電瓶車，有時行路。唔知邊個寫嘅講稿，喺介紹地質地貌之餘，加上好多唔三唔四，似是而非嘅人生哲理。非常無厘頭。再加上，出自一個廿歲未出頭嘅靚妹口中，仲要對住一群，個個年愈知命、耳順嘅人講，咁係咪太離奇呢。
離開地質公園，導遊小汪馬上張羅午餐。一則已過午餐時間，再者適逢今日係回教新年，不少清真餐館休息。經小汪努力後，終於揾到一間清真餐館，餐枱開喺前園涼亭內，頗有風味。點菜後，不忘叫厨師烹調炮製埋我哋自携嘅高原草芽雞蛋。咁肚餓，呢餐好滋味，加上葱花炒高原雞蛋作加科，個個都好滿意。
食飽飽，遊古城，貴德古城始建於明洪武13年，至今600多年歷史。城牆、寺廟、雕像，壁晝不在話下。嚟到門口，只見一個啊嬸坐喺板櫈上，原來佢係賣飛嘅。各位手執門票正想入場之際，啊嬸離開板櫈，企喺門口收飛。吓乜又係你？…一干人等行入園內，只見啊嬸擺好飛尾，施施然行入園內。清清喉嚨，「各位，集中一下」。嘩！駛唔駛咁多材多藝？講解員又係你！啊嬸見我哋集合好，佢繼續講，「各位叔叔啊姨，大家好…」，全部團友暈得一陣陣，呢位啊嬸居然以叔叔啊姨招呼我哋。話時話，啊嬸都敬業樂業，講解清楚，專業。佢重因為有團友答中佢出嘅問題，自己出錢買生果請我哋食，都算唔話得喇。一粒鐘左右，又睇完古城。
開車出黃河邊，親身體會「天下黄河貴德清」。黄河，貴德段，河水清徹見底。但再流向下遊，即入黃土高原，混雜大量黃土後嘅黃河，真係水洗都唔清喇。不過，最近經常大雨，雨後嘅貴德黃河，都唔係好清啫。
行吓黄河邊，洗吓黄河水，掟吓黃河石，奏吓黄水謠，上車返西寧，咁樣又一日。
No comments:
Post a Comment