西藏遊（十三） 2011.09.10拉薩，成都，九寨溝

西藏遊（十三）拉薩，成都，九寨溝

文章日期：02/07/2012 08:59 pm

告別西藏

西藏遊（十三）

2011.09.10拉薩，成都，九寨溝

今日全日就係搭飛機。

一早起身，執好行李，食過早餐，旅遊車已預備好，出發去拉薩機場。

飛咗兩粒鐘，到成都機場。落機後，部份團友離團繼續自己行程，大隊則再轉去登機閘口，預備飛九黃機場。另外，亦有新團友加入，大家就約咗喺成都機場等。

等呀等，就登機喇！新團友重未見踪影。團長亦睇過，佢哋飛成都嘅航機亦早已著陸。大家都好心急。再問吓櫃位，原來佢吔至經check in咗，但重未入閘。此時，候機室大堂，忽然聽到用廣東話嘅廣播，點晒名叫我哋啲新團友，快啲到登機閘口。咦，乜把聲咁熟悉，原來係啊珊用咗登機閘櫃位嘅廣播系统。我肯定，呢次係歷史上第一次成都機場嘅正宗香港廣府話廣播。

排隊登機啦，此時，遠處見有幾個人向我哋登機閘口呢面跑來。終於都到喇。原來佢哋一早已落機並且check in咗，但係以為係外面等。但我哋大隊落機後，從未出閘，所以末能相遇。當登機時間逼近，再聽到廣東話廣播，即刻９秒９飛入嚟。好彩，終於趕到。

到達九黄機場，出閘後，導遊已經喺閘口等緊，旅遊車去酒店。喺車上，導遊照例自我介紹及略作簡介，呢個導遊好騎（奇）離，成日講英文，但英文比國語更難聽，原來佢係西北大學英文系畢業。

旅遊車直去九寨溝，住喺溝口不遠嘅星宇國際大酒店。晚飯亦喺酒店內食，飯後出街行吓。酒店不遠處有間賣牦牛乾嘅舖頭，一聽老闆口音，就知係四川人，我同佢講我好鍾意聽四川口音嘅國語，佢當然好高興。試食吓啲牦牛乾，覺得唔錯，再買番啲其他食物，做明天入九寨溝嘅午餐。