青海湖
西藏遊（三）
2011.08.30 青海湖，藏文化博物館，返西寧
喺茶卡賓館食過早餐後，經青藏公路原路返回。途經橡皮山，喺昨日忽略咗嘅。3817米山口，梗係要影番張相喇。過咗彎彎曲曲嘅山路，落番青海湖。佢係中國五大湖之一，自稱最靚，水係咸咸地嘅，我試過。
今日行程係先搭船遊湖，再搭車由南岸返回起點。如果唔係跟團，我諗我會租架單車沿湖邊踩。原來每年呢度都有沿湖嘅單車國際比賽。
坐電瓶車到碼頭上遊覽船，有人隨船略作講解。成隻船坐滿晒，實在遊湖冇乜好睇，船窗太高，亦睇唔到啲乜嘢。上岸後沿湖嘅半島（二郎劍）行，望返去南岸，景色都好靚。唔好以意為沿湖邊行好容易，好多人行到索晒氣，呢度都二千幾架！
草草行個匝，搭由景區安排嘅小巴去半島嘅中部，照例又有賣紀念品嘅地方，再搭大巴返回原處。每次搭景區巴士，都係一次勞氣嘅經驗。管理巴士運作嘅人，唔知係唔係變態嘅，佢梗係好鍾意睇遊客打交，嗌交。唔係點解唔搞好啲等車嘅地方。旅客唔知邊度排隊，每次有巴士嚟，就鬥快跑，爭上車，充份顯示人類弱肉强食嘅原始獸牲。每次都有人因此而爭執，非常惡劣嘅經驗。旅行想開心啫，搞到勞氣真無謂。只需要豎個牌，同安裝欄河，乘客知道喺邊度等，知道自己排緊隊，爭執白然減少啦。管理當局唔知無知定白痴，咁簡單嘅嘢都唔做，唉！
慢慢行回起點，參觀青海湖博物館，又係一個求求其其嘅展覽廳。喺景區午飯後，再向西寧方向出發。
到西寧喇，唔返歸住，去藏文化博物館睇吓先。一講乜嘢博物館呀、研究院呀，你唔好以為真係嚴肅學術機構，只不個係換個名，賣嘢、掠水嘅地方啫。
個講解員强調咗好多次，話佢哋係國家一級博物館，旅客又要掛牌，又唔准影相。講解重心係話藏药幾咁有效，幾咁神奇。最後有著住白袍自稱藏醫嘅人類，慷慨贈醫，但一定唔施藥。接受診治嘅人，又一定呢度唔妥、嗰度唔妥。卒之佢要你比錢買佢啲药收場。好彩，如果你堅持唔買，佢都冇你符，唔會好似導遊啊珍咁鬧人嘅，當然黑口黑面就一定有得睇。我發覺呢個講解員好似灣仔街市戴住個咪，賣刨刀、賣除污劑嘅推銷員咁款。
晚飯又揾小馬哥，今餐食得精明好多嘞！
No comments:
Post a Comment