西寧市酒店外嘅公園
西藏遊（一）
2011.08.26 至 28 雪梨、香港、廣州、西寧
26號早上返鋪頭搞埋啲手尾，同啊Ann、啊翁講聲拜拜即返屋企執拾行裝。啊妹妹好乖，準時五點出現，車我哋去機場。三個人喺機場食埋晚飯日本餐，影張標準送機相，就入閘喇。夜機，照例都係冇覺好瞓嘞。搭嘅係澳航，澳航出名係空姐似啊嬸，但呢班機居然只得一個空「姐」，其餘全部係空中老爺。唯有早啲瞌埋眼。
27號早上5點幾，到香港喇。搭巴士到啊珊外家新居，經佢設計過，係唔同喎。同外父飲茶，佢精神唔錯。手術後係咁，都ok喇。飲完茶，啊珊要做banking嘢，我就搭地鐵入荃灣探啊哥，佢睇嚟唔係太好，我哋可以做啲乜呢？好彩有表妹同教友照顧住，都算係咁喇！
晚上，珊爸媽、詩華、同我倆食晚飯。正預備埋單，見到張文光，忍唔住，走理去丙佢兩句，大快人心。回家小睡。
28號凌晨兩點起身，執好行理，起程喇。今次出發非常特別，book咗7人車由屋企樓下接我哋，再接三個團友，即直接驅車經黄崗直去廣州白雲機場，全程220公里。連過黄崗關都唔駛落車。咁大個仔都係第一次咋！
半夜兩點幾，坐喺灣仔道等車，都係第一次！睇住小強喺地下自由自在咁躝嚟躝去，都幾的意。
半夜出發，全冇塞車，6點鐘已到白雲機場。馬上check in，再食個機場早餐，飛喇！8點起飛，11點幾到西寧，飛機居然早到。到達有「世界屋脊」之稱嘅青藏高原。西寧市係青海省會，呢度高海拔2800，有團友已有些微高山反應，就係頭赤赤。
地陪叫小汪，早已喺出閘口等我哋。車返酒店，西寧市中心嘅夏都酒店。check in、分房不在話下。午餐後即`參觀第一個景點，馬步芳公館。馬步芳係民國時軍閥，係青藏地區土王帝。解放後著草。佢留下嘅嘢就成為景點，為西寕市政府、人民帶嚟一啲旅遊收益，咁都好嘅。
睇完公館，即刻到附近舖頭買啲生果。發覺西寧市都係一個物產豐富嘅城市，街道尚算整潔，第一個印象幾唔錯。食飯前，去洒店對面一個公園行吓，公園依住一條小河而建，咁啱今日星期日，家庭樂，氣氛甚佳。重撞啱靚仔靚女模特兒影相，又有公公婆婆樂器合唱團表演，和諧得很。唔錯唔錯！
第一餐晚餐本來喺所往洒店食團餐，怕厨房落得又辣又油，我哋叫厨房少油少辣少鹽，點知佢話唔識點煮，唔做我哋生意，夠晒性格！唯有自己出去揾食。洒店行冇耐嘅地方居然有間粵菜洒樓，坐低點菜豪食，又啤又橙汁。埋單唔算太貴，但茶錢居然65蚊一壺，兩壺就係百機蚊喇。找來部長，姓馬，後來我哋叫佢小馬哥，這是後話。七嘴八舌理論一番，最後小馬哥答應減收一壺，而且應承下一餐免荼兼打折扣，小馬哥真醒目。
飲飽食醉，早啲瞓喇，兩晚都冇好好瞓過，早抖啦！
No comments:
Post a Comment