西藏遊（十四） 2011.09.11 九寨溝（一）：原妨森林，天鵝海，日則溝，箭竹海，熊貓海，熊貓海瀑布，五花海

西藏遊（十四）九寨溝（一）：原妨森林，天鵝海，日則溝，箭竹海，熊貓海，熊貓海瀑布，五花海

文章日期：02/07/2012 09:11 pm

 九寨溝孔雀尾

西藏遊（十四）

2011.09.11 九寨溝（一）：原妨森林，天鵝海，日則溝，箭竹海，熊貓海，熊貓海瀑布，五花海

今次係第二次遊九寨溝，上次係觀光車鴨仔團，今次改搭園內穿梭巴士，再用腳自由行，用三日時間慢慢睇。

第一日，天色不佳，昨晚落咗成晚雨，今早仍然毛毛雨。望上山，山峰都被輕烟薄霧所掩。導遊用英文話，天氣預測中午過後會放晴。咁，唔駛着咁多衫喇，太陽一出就好熱！導遊幫我哋買入場券，入園後就分組自己行。

我哋一行十人，先搭車上右邊支流最頂嘅「原始森林」。海拔三千，我哋由西藏返落嚟，三千？濕濕碎！天公時陰時雨，好彩冇風，但一路行都係陰陰凍，尤其入咗樹林，更係愈行愈寒。好彩團長Peter借咗佢件斗蓬比我，咁就暖好多。

上次到訪，係2007年11月，正是深秋，成個九寨溝漫山遍野點綴住紅樹林，天氣又好，靚到不得了。今日又雨又霧，一棵紅樹都冇，卻另有一番景象。

行吓行吓，又到中午。又餓又凍，快快揾笪有瓦遮頭嘅地方坐低食晏。咦！前面有個巴士站，旁邊山坡上有座古色古香嘅平房。走近一睇，乜嘢古色古香，原來係厠所。九寨溝除咗風景靚絕之外，園內厠所實在值得大讚特讚。數量夠，乾淨清潔，毫無厠所味。我哋被核突冇良心茅厠坑折磿咗十幾日，見到呢番光景，即刻戙起手指公話正，並决定就喺呢度食晏。

食過麪包夾牦牛乾，體力及温度馬上提昇，即刻繼續行程。九寨出名嘅係水，瀑布、海子、涓涓細流、萬馬奔騰，各有特色，應有盡有。十個人，行吓行吓，失散咗，化成三個小組，各自精彩。

兩點鐘，行到五花海，信步爬上數百級board walk木梯，居高臨下，俯望孔雀河美態。此時，天空放晴，雲霧向山上退，太陽亦露出半個笑面，漸漸回暖。打個電話，同喺澳洲嘅澄妹妹傾吓偈，一樂也。

今日睇住咁多先喇，走出巴士站，搭車落溝口，匯合其他團友，搭旅遊巴返回酒店。

晚餐喺西藏皇宮食，當然唔會侈望食到御宴啦！是晚也，係鬼婆朱莉亞生日，一早預咗生日蛋糕。正當開始生日會前，團長大喝「咪住！」要搞掂公款先。於是各人又比錢，又收錢，搞個不亦樂乎，居然都玩咗成粒鐘。跟住朱莉亞講生日感想，祈求天下太平，大同世界，再唱生日歌，同鬼佬Rama深情長吻；再切蛋糕…，總之盡興喇！

有人返歸瞓覺，有人血拼，有人享受「被」按摩。而我倆則繼續行街，因為接受咗任務，要揾一間明天晚餐嘅食肄。我哋沿住双色可行，双色河畔叫「邊邊街」，有好多類似大牌檔嘅食肆。氣氛甚佳，重有活魚、河鮮、烤羊…，有一檔夫妻檔，睇嚟幾好，都一一記心中。行返酒店附近，走入牦牛乾店，買啲食物明天做午餐，順便問吓四川佬，要揾食肆，有冇好介紹。佢二話不說，即刻帶我哋行去不遠處嘅藏式烤羊店。信佢！訂咗一隻烤羊，提佢記住雪凍啤酒。任務完成，返歸瞓覺。