嚤囉仔遊蹤: 嚤囉仔以色列、約旦遊蹤第十五日佩特拉 ----＞安曼

嚤囉仔以色列、約旦遊蹤第十五日佩特拉 ----＞安曼

原本設計，今日會去睇小佩特拉 Little Petra，問咗啲意見，都話睇咗大嘅都得喇，除非真係好多時間。我寧願化多一日喺安曼，所以噚日已經安排好，提早一日離開，又通知咗安曼嗰邊，我會早一日到。所以，今日嘅行程就係⋯⋯去安曼。

跨市嘅小巴站，就喺我住嘅旅舍後面街。執好行裝，告別 Wadi Musa，就繼續我嘅約旦之旅。

今日搭嘅係二十座小巴，車程約200公里，車費5個丹拿。客滿就開車，小巴即刻駛入沙漠公路 ----- 好快，但係好悶蛋嘅公路。中途只停一站，伸伸腳、買嘢食、去厠所等等。兩個鐘左右就到安曼巴士站。落車後，即刻有的士大哥嚟兜生意。一輪殺價，三丹拿成交，車我去旅店。

的士大哥好識做生意，車裏面擺咗好多景點宣傳單張，一路揸車，一路問我計劃去邊度玩，我攞咗佢咭片，話要車就會揾佢。

進入市中心，真係好繁忙，成街都係人。的士停喺酒店門口，我一睇，咦，唔知有冇搞錯呢？我今次訂嘅房，只係25蚊美金一晚。眼前呢個大堂，又高又大，睇嚟有啲問題喎。叫的士大佬唔好走住，我一個人行入大堂。著晒白恤衫打晒呔嘅職員出嚟招呼我。我問：

「係唔係 Palace Hotel ？」

「呢度係 Amman Palace Hotel。」

我心諗，啱喇，呢度係安曼，我訂嘅係 Palace Hotel。冇錯嘞。即刻將打印出嚟嘅訂房確認信畀佢。「我訂咗房。」

佢睇過之後，笑笑口，好有禮貌咁話：「呢度係 Amman Palace Hotel 唔係 Amman 嘅 Palace Hotel。你去錯地方嘞。」

「⋯⋯⋯⋯！」

周星馳戲中，零零漆搞錯咗以為係麗晶大酒店，原來係麗晶大賓館。我喺戲院，睇到呢個情節，笑到碌地，大呼：咁都得？。而家就活生生發生喺我身上，現實生活，原來真係可以咁好笑，真係乜都得。

即刻跳上的士，好彩我訂嘅旅舍就喺附近。係一間好似舊唐樓嘅四層建築物，樓下係街鋪。由旁邊樓梯上，三樓係櫃面、客飯廳、電腦區。四樓係客房。呢，咁就似係我嘅皇宫嘞。

＜photo 1501，我的安曼皇宫＞

＜photo 1502，有牀有被，企企理理，25美金一日＞

入房打點一切，幫自己痛痛快快洗個麈。坐定有啲餓，記起噚晚打包嗰件大雞肶三文治。囫圇吞雞，搞掂咗飢餓，就落三樓四圍行，睇下有乜發現。

櫃面旁邊告示板，貼咗啲一日遊嘅資料，即刻向老闆娘報名。估唔到得來全不費功夫，聽日節目，又有著落喇。喺客廳再坐一陣，同其他住客傾下偈，收下料。急不及待，孭上背囊，又出街咯。

住喺市中心，果然方便，一落樓，就已經係通衢大街。呢一區，唔係乜嘢大酒店、名店區，而係一般市民日常生活嘅地方。賣日用品嘅、熟食嘅小店，到處都係。附近幾條街，根本就係一個大街巿。我應該畀隻手指公自己，咁好嘢，租到呢間旅舍。

＜photo 1503，樓下羊肉店，掛羊頭，賣羊肉＞

＜photo 1504，一落街，就係鬧市＞

嚟之前，已經做過功課，安曼市好多景點都係喺步行範圍。我攞住地圖，企喺路邊，睇下自己身處何方。一定係我個款太過遊客嘞，有個人走埋我身邊，「歡迎到約旦，有乜嘢可以幫到你？」佢哋國民一定係受教育要善待遊客，我當然受落。即刻問路，唔駛估得咁辛苦。

安曼係約旦嘅首都，睇嚟都係一個移民城市，附近有乜嘢大災難，啲人就湧入安曼。1948年以色列立國戰爭、1967年六日戰爭、1991年兩伊海灣戰爭，每一次，都有難民湧入。使佢由一個小城，經五、六十年間，變成一個近三百萬人嘅城市。

由旅舍行出大街，唔駛五分鐘，安曼大清真寺 Al Husseini Mosque 就喺眼前。我唔係穆斯林，入唔到去，只可以喺門前廣場影下相，透過大門望入去而已。由清真寺向東行，都係繁忙街道，路邊都係小鋪頭，乜都有得賣。條馬路就永遠都咁多車，睇嚟大城市到處都係一樣，塞車塞到死死下。行十五分鐘左右，就見到安曼嘅羅馬大劇院，Amman Roman Amphitheater。

喺鬧市中嘅羅馬古蹟，可以坐六千人嘅大劇院，加埋門前羅馬列柱街，離遠就見到。劇院兩翼有兩個小博物館，門票只收一個丹拿。先走入劇院，同佩特拉大劇院好唔同，呢度就係典型嘅羅馬建築，座位、舞台等等，全部由大石砌出嚟。弧型觀眾席分成三層，梗係快速奔跑上去最高層。居高臨下，唔單止睇晒成個劇院，連附近市容都一覧無遺。咁遠嚟到，我點會嘥咗個場，梗係由低跑去高，由左跑去右，總之走嚟走去，跑個夠本。

＜photo 1505，鬧市中古蹟，安曼羅馬大劇院＞

＜photo 1506，大劇院前嘅羅馬街＞

兩個博物館風格好唔同，一個係展覽貝都因人嘅歷史，另一個講安曼嘅發展經過。博物館好細，只需用些少時間就睇完，當然都係值得一去嘅。

由大劇院北望，就係一個小山，唔高，不過已經係安曼市中心最高嘅地方。安曼最大，最重要嘅古績，安曼城堡山 Citadel Hill of Amman 就喺嗰度。山上嘅廢墟樑柱，由羅馬劇院望過去，清晰可見。我預算用一日時間去睇，今日橫掂係行街，即管行上去探下路。

街道，住宅，全部依山而建，攞住地圖一路上斜路。如果靠睇路牌就一定死火，所有路牌都係阿剌伯文，好彩目的地就係山頂，沿路再問人，好快就去到城堡 The Citadel。今日唔入場，就企喺山坡路邊，成個安曼就喺腳下，密密麻麻嘅建築，縱橫交錯嘅馬路，高低起伏嘅地貌，好一個大都會。

據說約旦嘅士耳其浴室非常出名，仲可以做埋士耳其按摩。喺阿卡巴時，我已經想試試，可惜安排唔到時間，而家冇乜嘢做，試下又無妨。落山後行向街市方向，地圖話嗰度有士耳其浴室。兜咗好耐都揾唔到，問街邊嘅人，又雞同鴨講，唯有當行街。行行下，偶然抬頭一睇。哈，有心栽花花不發，無心插柳柳成蔭。就係一間土耳其浴室，個樣就好係當地人幫襯嘅地方。但係，對我嚟講，個門口就唔係好吸引，陰陰沉沉咁。諗咗一陣，吸一啖氣，行入去睇下。就喺個櫃位前嘅小空間，行下睇下，又冇英文水牌，唔知乜頭乜路，又唔識阿剌伯話，又唔知點問人。最緊要嘅係嗰種味道，實在唔多開胃，周圍都唔多乾淨。磨咗一陣，咪搞嘞，都係走番出嚟。今次落荒而逃，真失敗。再有機會，先要攞多啲料，再戰江湖。

雖然失敗而回，今日行咗好多地方。行過街市，行過平民二手雜貨地攤市場。知道邊度有嘢食，邊度賣乜嘢⋯⋯。總之，對呢度多咗認識。

今日行嚟行去，行咗成個下晝，都係喺旅舍附近兜嚟兜去。住近城，果然方便。而家就行返旅舍，沖個靚涼，再出去食晚飯。

呢度嘅餐廳，門口多數都擺咗個大燒雞爐，成日都不停咁轉下轉下燒緊雞，每日應該都賣唔少。穆斯林唔食豬肉，少咗好多選擇。牛、羊相對比較貴，燒雞就係最大眾化嘅食物。除咗門口嘅燒雞爐，裏面餐堂，多數有個專做串燒嘅開放式廚房，長長嘅燒烤爐，上方有強力抽油煙設備。前面玻璃櫃，擺滿預備好嘅肉串，客人揀好，廚師就即席燒烤，再配上沙津，醬料就上枱奉客，非常新鮮。

我去咗羅馬劇院對面一間餐廳，係一間平常不過嘅當地人餐廳。餐堂裏面，全部都係好長嘅餐枱，好似飯堂一樣，全部客人都要搭枱。不過有個半層嘅閣樓，女客就要坐上閣樓。如果一班人有男有女，成班人就要坐上閣樓。總之女客就唔可以坐樓下。

今日唔食雞。豪啲，專食羊。「伙記，我⋯⋯。」我郁手郁腳講到成身汗。伙記笑笑口望住我，頭擰擰。我企起身走去啲食物前，指住呢啲，指住嗰的，佢卒之明晒，即刻落單。我有羊串燒、沙律、羊湯，炒飯，非常豐富。食物上枱，習慣都會跟一細籃麪麭，不另收費，你食唔晒啲麪麭，佢又收番，再畀第二個客！文化習慣，大家一齊係咁做就合理。食嘅時候，大家小心啲，唔好整污糟就得喇。