嚤囉仔以色列、約旦遊蹤
第一、二曰。 雪梨，香港，曼谷，安曼，台拉維夫，拿撒勒，提比利亞
好緊張，三十年後，再次孭起背囊，開出腳步，實踐人生第一次，做其獨行背囊友。
唔止我緊張，全家人都嚟送機。本來諗住他他條條喺機埸食個早餐，點知搞東搞西，原來冇乜時間，又要急急腳上機。喺閘口，循例都影幾張相，送機吖嘛，係咁嘅喇。
梗係要攬下老婆。佢攬到我鬼咁實，可知佢幾咁緊張，幾咁唔放心。睇番轉頭，我閃起做獨行背囊友嘅念頭，佢由頭到尾都好支持我，仲幫我做咗好多濕碎但係重要嘅事前準備工夫。一路都好似放得好開咁，而家上機在即，擔憂又唔捨得嘅心情就寫晒喺個面上喇。唉，都係常人一個啫。
難捨難離，終歸要飛。告別家人，頭也不回，踏入海関。真好彩，人生第一次畀人捉住撿查爆炸品。㚒住張紙仔全身掃勻，背囊、相機袋，一一唔放過，再放入電腦分析。我正人君子，梗係冇嘢。話時話，雖然嘥時間，睇過911飛機撞雙子塔，作為乘客，我寧願檢查緊啲，至怕萬一吖嘛。唏，大吉利是。
雪梨國際機場都係高效機埸，話咁快就坐喺飛機等候出發嘞。今次嘅終點站係台拉維夫。由雪梨出發，我會經香港，轉機去約旦，由安曼機場再轉機去台拉維夫。單計飛行時間，都要廿六粒鐘。計埋等轉機，足足33個鐘，都咪話唔犀利。
連續轉咗三次機，飛去唔同地區，原來，乘客係咁唔同，氣氛亦好唔一樣。由雪梨飛香港，我搭澳航，都係香港同澳洲客居多，講嘅係英文、廣東話。個樣又熟口熟面，非常自然，非常輕鬆。香港轉機飛約旦，中途要停曼谷，上嘅人，面口又好唔同。再由曼谷上嘅，多數係阿剌伯人。個個神高神大，男嘅大鬍子，女嘅包頭包髻，個個用阿剌伯話高談闊論。嗰種氣氛，嗰種氣味。在在話畀我聽，喂，你而家正是：獨在異鄉為異客。講真，係有啲不安感，但又幾刺激喎。
安曼機埸，保安好嚴格。轉機去台拉維夫，過安檢時，除咗例牌行李理過機外，乘客要逐個逐個企上櫈仔，畀大隻佬保安由頭摸到落腳。又係嗰句，緊啲好過太鬆。我搭嘅係 Royal Jordanian，聽講話，如果搭以色列航機，安撿更加嚴。
可能唔係咁多人去以色列，換咗架細機。以色列、約旦係鄰國，飛行時間只需45分鐘。我以為飛機一路向西南就到，點知一飛就向北，飛咗好一段時間先向西飛。飛飛下，居然飛出大海，我啲地理常識話畀我知，我正在喺地中海上空。飛機再180度U turn，飛返內陸。由窗口望落去，前面地型正是我喺谷哥地圖日望夜望嘅台拉維夫海岸缐。對比由機窗望，同由電腦望，谷哥地圖果然冇呃我，完全同真實一樣。四個字閃出：願望成真。
飛機降落古里昂國際機場，第一個印象，就係冷清，停機坪唔多飛機，而且主要係以色列航機。又係嘅，危地勿企，人之常情也，
以色列同美國佬有一樣嘢好相同，就係牙齒印多，四圍都係敵人。想當然，入境保安一定非常嚴格。出發前，入過好多網上討論區，睇咗好多故事，過來人會話你知，邊啲嘢唔講得、邊啲嘢要注意。又有事例話，不少人畀海關抗絕入境，等等嘅分享故事。真係好似細時，同屋企人返鄕下，過羅湖橋時，阿爸會話你知：衰仔，咪亂噏嘢！
落機，跟住指示，走向海関。一路行，一路諗，陣間點同海關應對。人唔多，排咗一陣，到我。一如所料，都係問由邊度嚟，乜嘢職業，嚟做乜，預備去邊度，等等。我預備晒，應對得體，而且旅舍住宿資料，白紙黑字，一一清楚交代。海
「小姐，咪住！可唔可以入境蓋章，唔印落我個䕶照？」
佢攞住個印吊喺半空，「點解？」
「旅遊書話，如果有印喺個䕶照，有啲國家，入境會有麻煩。」
佢停咗動作，上身趨前小小，望住我，「你想去邊啲國家？」
「而家未有計劃，不過只想多啲自由度啫。」
佢唔出聲望住我。一秒、兩秒⋯⋯。好緊張。唔知我當時個樣係點。
櫃台頭有一疊比印章稍大嘅紙仔，佢攞咗一張，喺上面蓋印。
「OK你走得嘞。」佢將紙仔夾入我本䕶照，交畀我。
「唔該晒。」
討論區資料果然正確，海關已經預備好紙仔畀印章用，可見咁樣嘅要求亦係普遍。䕶照上有以色列入境印章，再去好似伊朗、伊拉克等敵對國家，有機會入唔到境。
行李轆咗出嚟，孭起背囊。以色列喎，安檢一定好嚴，有心理準備會摷晒啲嘢出嚟。行到接近出口處，都見唔到檢查長枱。出口坐咗個人，佢收咗嗰張有蓋印嘅紙仔，咁就放我走嘞。一行出門口，乜話，已經出咗機場大堂，傳說中安檢咁嚴格嘅國家，居然掂都唔掂我嘅行李，真係難以置信。可能佢哋缐報了得，邊個係真遊客？邊個係敵人？上機前，特工已經查得一清二楚喇！駛乜而家嚟搞你！我估下啫。
出入境嘅人根本唔多，機場大堂，氣氛非常輕鬆。咖啡店開咗幾張枱出嚟，客人三三兩兩嘆緊咖啡，優閒得很。我點得閒嘆咖啡，第一樣要做嘅，就係揾電訉公司買張 prepaid SIM card ，開通一個電話。十五分鐘搞掂，即刻打個電話返屋企，失去聯絡兩日，而家喺應許之地聽番愛妻把聲，梗係要多
萬里傳音，畀我力量。即刻攞出記事簿，裏面寫有我每日嘅行事計劃。下一步，搭巴士。巴士站就喺機場大堂上一層，搭電樓梯上，一出露天處。唔係呀嘛，個巴士站，成個大球場咁大，但係又無乜巴士喎。望一望身前站頭嘅站牌，嘿！全部希伯來文，鬼知佢噏乜！我而家孭住全部家當，邊咁有力慢慢揾。記起老豆教落：路在口邊。即刻四圍𥄫，睇下有冇人幫拖。
廿米處有個人。睇真啲，綠色制服，胸前重掛咗槍。啊，士兵，佢係我第一個遇到嘅阿兵哥。走埋去問路。哈，佢講英文，好有禮貌。佢建議我搭火車，講得好詳細，我出路遇貴人。收晒料後，同佢講聲唔該、拜拜。佢話，「Welcome to Israel , have a good trip」。
以色列士兵畀我第一個印象，好好喎。此後，我先知道，所有重要地點，例如巴士總站、大型商場、廣埸等，都有武裝士兵駐守。初初覺得氣氛緊張、有不安感。好奇怪，住多兩、三日，就習慣晒嘞。
買咗車飛，跳上火車。正係返工時間，乘客上上落，非常繁忙，間唔中見到後生仔，後生女，著住軍裝，帶住槍搭車。睇真啲，有啲槍，槍柄上面用電缐膠布，纏住上滿彈嘅子彈匧，呢支梗係堅嘢嚟。不過，亦有明顯係流嘢，一支仿真木頭槍。做乜有人會孭支假槍出街？
1948年5月14日，以色列立國日開始，佢四周全部係敵人，個個都想消滅呢個啱啱出世嘅國家。就算親美嘅回教國家，對以色列都抱勁揪敵視態度。以色列全民皆兵嘅國策，就唔難理解。以色列男仔讀完中學，要服兵役三年，女仔都要服兵役兩年，先至再入大學。所以喺以色列，成街都係著住軍服嘅少男少女。佢哋嘻嘻哈哈，互相調笑，實在就好似我哋喺香港，見到成街著住校服嘅少男少女一樣咁普通。
我可能都好矚目。呢度遊客少，唐人面孔就更絕無僅有。其實，全程喺以色列，我只見過一個唐人！火車上，個個喺趕住返工之餘，都望下呢個孭住大背囊，論論盡盡嘅遊客。佢哋好有禮貌，唔會睥住你，望一望就放開眼光，趕佢自己嘅路。
我係要去台拉維夫中央巴士站（CBS），落咗火車，四圍問人，再行十分鐘就到，唔算難揾。車站係一座多層建築物，前面排咗一條長龍。原來入車站，要經過安撿。入口處有位大叔，前面有張枱，啲人排隊埋去，先將手袋、書包、一袋二袋嘢放上枱，由面摷到底，都好認真㗎。再用探測捧全身掃勻，先至畀入車站。條隊好長，但係大家都好有耐性，睇嚟，已經習以為常。反恐，根本就係日常生活嘅一部份。
到我嘞，犀利咯。擺個大背囊上枱，大叔好認真咁打開所有拉鏈，每個部份都摸過，撳過。查完，好有禮貌話OK。我驚住搞錯，臨走前問下大叔，我有冇入錯車站。大叔眼光光望住我，原來佢唔識英文。佢即刻向條長龍問邊個識英文。龍頭三、四個位處，有位女士舉手（舉手？！咁有紀律，點到你唔服），佢解答哂我所有問題。再三多謝各人，就行入車站大樓。
原來大樓唔止係車站，重係一個商場，多數都係小本經營嘅鋪仔，冇乜裝修過，賣嘅都係日常用品。我成朝都未食過嘢，買多啲麺包，飲品，預埋搭車食。巴士站頭喺頂樓，再三問清楚資料，買埋車飛，咁就定晒，而家先可以他他條，坐定定食個麭。
egged 巴士，係以色列最大，而且係唯一提供行走各大城市之間嘅巴士公司，甚至提供網上購票服務。我嘅經驗，現埸買飛亦十分容易。巴士準時開車，乘客又唔多，坐得好舒服。正在欣賞應許之地嘅風光，居然電話響。同愛妻乖女萬里傳音，豈不快哉。
呢程車嘅終點站係提比利亞 Tiberias，由台拉維夫向東北行，車程約140公里，我都係要去嗰度。不過巴士途經拿撒勒 Nazareth ，我會先訪一訪呢個名城，即係話要喺中途站落車。唔怕長氣，再三問清楚車長就落車。
＜Photo 101，搭 egged bus 去提比利亞，鄰座喺穿軍服帶小帽嘅猶太青年＞
拿撒勤，當然係名城。聖母瑪利亞，喺呢度得知自己懷有耶穌。耶穌亦喺呢度，渡過佢嘅童年。
落咗車行過馬路，穿入橫街就係一條一直上嘅斜路，路邊都係民居，樓上住人，下面係鋪頭。樓宇都十分破舊。成條街都冇乜人行，偶然見到嘅，似阿剌伯人多啲。原來拿撒勒雖然係基督徒聖地，但係而家住緊嘅，多數係阿剌伯人。有 the Arab capital of Israel 之稱，其中七成人係穆斯林。
我孭住全部家當一路行上斜路，真係乜都曉。一路行，身邊不時有大旅遊車經過，我諗，我冇行錯路嘞。冇耐，前面有幾架旅遊車停喺路邊，又見到賣天主教紀念品嘅鋪頭。到喇。我呢個行程第一個景點到喇。
天使報喜大教堂 The Basilica of the Annunciation ，係中東地區最大嘅天主教堂。而家嘅建築物係1969年重建，教堂底部相傳係瑪利亞住嘅山洞，而家仍然保留當時山洞嘅情形。一車車嘅信眾由世界各地嚟朝聖，我獨行俠唔知乜頭乜路，一於做菠蘿雞，一味靠黐；跟住呢啲朝聖團，希望可以聽到解說。點知全部唔講英文，唯有靠自己睇下書，睇下文字解說喇。
＜ photo 102 孭住成身嘢，報喜教堂前留影＞
＜Photo 103 報喜教堂內＞
離開教堂，四圍問人點樣搭番巴士去提比利亞。點知人言人殊，唔知信邊個好，忽然有的士停喺我身邊，即刻問價。司機係阿剌伯人，英文有限，不過講價錢都OK 嘅。由NIS150（以色列貨幣， shekel）只減到130 。雖然都係貴，算喇，準時到達旅舍都好緊要。開車門坐上司機位邊，後座居然有位小姐。後來，我先知道，的士多載其他乘客係好平常。呢位小姐講英文，佢可能見到我古怪嘅樣，安慰我「唔駛擔心，佢係好人，我經常搭佢車」。
我同司機溝通有限，斷斷續續，有一句，冇一句咁傾偈。佢係穆斯林，望後鏡吊住伊斯蘭教念珠。當的士經過清真寺，佢都叫我睇，又戙起手指公話靚。呢個情景，令我吃驚。又話以色列打壓穆斯林，咁樣睇嚟，同我以為嘅情形，有好大出入喎。
落咗小姐，冇耐又接到個客，原來呢度揸的士，好似揸小巴咁樣，算係開眼界嘞。拿撒勒去提比利亞約30公里，而且全部落斜路，話咁快就到。實在我有啲後悔，而家假假哋都係一個背囊友，第一日上晝就花咗NIS130，咁樣絕對同身份不符，以後花錢要再小心啲。
喺市中心落車。提比利亞係加利利海 Sea of Galilee， 西岸嘅一個小鎮，要去我住嘅旅舍，再要搭十幾公里巴士。個鎮好細，之前喺谷哥地圖都睇過大概。略略喺鎮上行個匝，即刻行去中央車站CBS。個鎮咁細，唔難揾。小鎮車站，又真係好細，得十個站頭左右，冷冷清清，冇乜人，不過都有一個持槍士兵駐守。買好車飛後，坐低食個麭。嚟咗個日本妹，佢又係單獨背囊友，佢目的地同我唔同，但方向一樣，咁，我哋就可以同車嘞。佢係東京大學䕶士生，而家放緊假嚟旅行。我印象中，日本女仔好夠膽，獨行背囊友，不少係日本妹。
別過日本娃娃，落車再行2公里就到我住嘅旅舍。訂呢間旅舍，絕對係大錯。座落加利利海邊，個景真係唔錯，但係又唔近鎮，落車後都要行2公里，真失敗。好彩只係逗留兩晚。
又飛機，又火車，又巴士，又行路，搞咗足足兩日，而家可以定一定神。攞房、訂餐、買 wifi，不在話下。終於安安樂樂，有餐好食。
夜晚，趴喺牀寫遊記，寫下瞓下，真係好攰，寫到唔夠一半就瞓著咗⋯⋯。
No comments:
Post a Comment