嚤囉仔以色列、約旦遊蹤 第十四日 佩特拉古城行山

嚤囉仔以色列、約旦遊蹤    第十四日 佩特拉古城行山


喺旅舍食咗個2丹拿嘅早餐，除咗咖啡、多士外，仲有隻煎蛋，已經好豐富喇。旅舍待我不薄，老闆免費用佢架古老賓士車我落古城，慳番我不少時間。

＜photo 1401，有蛋嘅早餐，幾好喇＞

噚日騎馬由售票站去到蛇道口，今日就靠兩隻腳行。今日嘅主要活動就係行山，而家呢15分鐘路程，就當熱身喇。好多人都唔騎馬，原因係行路先至可以停低，睇埋路邊嘅 Djinn blocks。 Djinn blocks 係雕刻出嚟，兩丶三個人咁高嘅四方石礅。又係貝都因人嘅𠎀作，估計作用係類似石碑，又或者係亡靈容身之所。咁樣嘅 Djinn blocks, 有廿幾個，分佈喺古城裏面，呢段路就有三個。
沿路山邊零零星星有啲墓室，都係由石壁面雕鑿而出。

＜photo 1402 ，Djinn block＞

再次走入蛇道，仍然不減興奮心情。自知噚日準備不足，夜晚揾齊資料，今日可以睇得再仔細啲。攞住貓紙，按圖索驥，咁樣，睇景點就更加有多啲了解。原來蛇道係商旅蓬車隊必經之路。牆邊嘅雕塑，多數係反映商旅入城時嘅盛況。最著名嘅係一組雕刻，係實物咁大嘅五隻駱駝，但係已經嚴重風化，只係隱約見到帶頭嘅半身人，牽住只得四個蹄嘅駱駝隊伍。原本雕塑嘅其他部份，就只能夠從剩餘嘅痕跡，加埋想像，喺自己個腦仔重組出嚟。

前面有一團為數十幾人嘅西人，佢哋雙手搭住前邊膊頭，排成單行。我行前睇真啲，原來全隊人都閉上眼，只靠前面領隊帶領全隊人慢慢前進。好彩我有做功課，原來呢個係蛇道嘅特別遊戲：大家一路合埋眼跟住行，領隊帶全隊人去到卡茲尼神殿前，面向神殿，一字排開。然後一、二、三，大家一齊睜開眼，神殿就喺眼前，大家就會好興奮。呢個活動，晚上玩至夠刺激，如果天氣好，遊客中心會主持呢個活動。參加者由蛇道口開始，全程都要合上眼，直至去到神殿為止。再喺神殿前點起蠟燭，點點燭光喺黑暗中舞動，應該係好動人嘅場面。遊客中心果然有心思，既可以揾錢，遊客又有晚上活動，梗係雙贏喇。

離開蛇道，向市集方向行。沿大街行一陣，未到大劇院就向左轉，開始行小路上山。唔係咁多人可以有時間行山，所以沿途都好少見到人。個山都幾斜，有時係山路，有時係石級，唔算太難行。據說有七百級石級，全部都係人手，用個鑿，一下一下咁鑿出嚟。

條路雖然冇乜人，但係好難會行錯路，因為幾偏僻都好，沿路咁上下就會有攤檔賣嘢。見到地攤，即係行啱路。

＜photo 1403，由此上山路＞






一粒鐘左右上到山嘅高點，係一大幅平地，因為身處高地，即刻四圍𥄫下，享受大地在我腳下嘅感覺。真係睇得好遠，四周山巒起伏，不過都就係望極唔完嘅沙沙石石，同埋粗砂大石，一個字講晒 --- 乾！

＜photo 1404，站得高，望得遠＞

呢度就係納巴提人祭天嘅地方。高地座落咗一個三幾十米高嘅小山峰，快步跑上去，果然別有洞天。納巴提人用手削平山峰，開鑿咗一個山頂小廣場。一個好大嘅長方形廣場，四邊有高出嘅石級，就係觀眾席，中間有石祭壇。想像納巴堤人圍坐四邊，祭師就喺祭壇前，面對群山，諗諗有詞，呼風喚雨。嗰種氣勢，一定好震撼。
祭壇廣場不遠有個四四方方大水池，落雨嘅水就儲咗喺裏面。前面又有一個高出地面圓形嘅高台，兩三米直徑左右，周圍有石礐，中間凹陷，鑿咗一條去水坑，引出高台之外。

＜photo 1405，祭天廣場＞

＜photo 1406，犧牲屠宰池

呢處就係祭天高地 High Place of Sacrifice 。祭天就一定有祭品，動物犧牲，多數係羊，永遠係最佳祭品。祭祀時，羊就拉上高台屠宰，血水就由水坑流出。屠宰後，就放落水池洗乾淨，再放上祭壇。⋯⋯。最驚人之處係，據傳說，冇錯，只係傳說，冇證據嘅；祭天時所用嘅犧牲，有時唔單止係羊，仲會係細路仔！信不信由你。
旅遊區，小販係無處不在嘅，祭天廣場座位，就係小販嘅檔口，檔主係個年輕媽咪，帶埋細路開檔。我一路行，佢一路向我講解，做咗我嘅導遊。之後當然不忘推銷佢嘅物品，我冇買到嘢，但我都畀咗一個丹拿，話晒佢都畀咗啲資料我，等我可以有古仔講。
由另一邊落山。呢邊山坡，都係墓葬。落山梯級盡頭處就係一個墓園 Garden Tomb，喺墓室牆上有三個人像浮雕，可能係三個大將軍嘅墓地。成個墓園，隱隱見到花園式嘅佈局，當然全部都係雕鑿出嚟。兩邊有兩個互相對望嘅涼亭。其中一個涼亭，前面居然有個花園水池 water feature，旁邊儲水系統，有活門控制流去水池嘅水量。我走入涼亭，面向水池，就望晒成個花園。想像一下，二千年前，水池噴住水柱，花圃種滿花花綠綠嘅植物，坐喺涼亭內，有奴隸喺兩旁撥扇。一邊飲酒、一邊同愛妃們談笑風生，⋯⋯哈，都應該好過癮。

＜photo 1407，墓園涼亭＞

而家嘅涼亭就只係一個石室，我發覺佢好應聲，唔好錯過咁靚嘅音響環境，攞支口琴出嚟，趁四野無人，演奏一曲。乜嘢歌？原野春夢喇，又有花開，又有春夢，應晒景喇。唔係咩？歷史，根本就係一場了無痕嘅春夢。一曲既畢，發覺原來有聽眾，來不及聽掌聲，即刻走夾唔透。
再向前行就係士兵塚 Soldier Tombs，當然簡單好多，不過都係葬晒喺石室裏面，每個石室都有幾個墓坑。墓坑都有兩層，中間有石板相隔。而家墓坑全部都打開晒，當然唔會有骸骨。陪葬品？一早就畀人偷得一乾二淨喇。

＜photo 1408，士兵塚＞

原來墓園、士兵塚，就係圍住山腳而建。由呢度再行番出去大劇院，咁就兜咗一個大圈。趁仲有時間，喺劇院舞台上、觀眾席，走嚟走去，慢慢再次四圍睇。此時，嚟咗一批三四十人嘅日本遊客，都係中年以上，有男有女。佢哋喺舞台邊，對住觀眾席擺起陣勢，居然唱起歌。原來唔係少嘢，分晒不同聲部嘅清唱，好專業喎。二千年嘅舞台，襯起現代嘅歌聲，都幾夾吖。
上午節目完畢，食過簡單午餐，再次穿過羅馬街。路嘅盡頭有兩間幾似樣嘅餐廳，食自助餐都得，多數人都喺呢度休息。原來呢度就係成個佩特拉城嘅最低點，附近山谷嘅水，最後都會流注到呢度。二千年前，納巴提人已經考慮到呢點。所以喺蛇道口，就有水壩、洩洪渠，控制住入城嘅水量。水利系統有乜差遲，呢度就係水浸嘅地方。

＜photo 1409，簡單午餐，稍事休息＞






我喺呢度略作整頓，預備再行第二個山。有個人拖住一隻驢行過我身邊，話可以騎驢上山。我問價，最後七個丹拿成交。騎上驢背，我又孭住攝錄機，又要影相，又要拉住坐位前嘅鐵扶手，真係手忙腳亂。驢背冇避震，就算行平路都左搖右擺，拋上拋落，個八月十五受晒罪。開始上山時，就更加唔得了。驢大哥專揾啲古怪路行，佢好夠力，好斜嘅路都行到，我要好大力拉住，自己先至唔會跣後。最得人驚嘅，就係咁大條路，佢硬係唔行中間，專行路邊。好多時，路邊就係懸崖，一跌落去就係咁先喇。好彩都安全到步，還得神落咯。驢大哥咁辛苦孭我上山，就同佢影張相留念。

＜photo 1410，驢背上影相，手忙腳亂＞

＜photo 1411，辛苦晒，驢大哥＞









呢度主要睇嘅就係修道院 the Monastery ，阿剌伯人叫 Al Deir 佢係卡尼茲神殿嘅放大版，修道院高四十五公尺，闊五十公尺，係佩特拉古城最大嘅神殿。我走去正門，唔知係唔係出面地面下陷。正門地台，高出街嘅地面一米半。唔係個個可以爬得上去。一米半？難唔到我，三下五去二。睇我雙腳一蹬，舉高雙手拉住地台，上身一聳，隨即撐直雙手，單腳跨上地台，縱身一跳，搞掂。原來裏面大堂都好高大，牆上有雕刻，又鑿咗個兩邊有梯級嘅小講壇。此外，空洞洞，又係石室一個。

＜photo 1412，修道院＞



離修道院不遠，有兩個高點觀景台，喺山嘅兩個高峰，互相對望。我都唔會錯過，逐一探訪。呢度望嘅景，比祭天高地望得更遠，真係不枉此行。

修道院前面有小食棚檔，擺咗長櫈喺出面。我坐喺長櫈，慢慢欣賞二千年，先民智慧同毅力嘅結晶。咦，修道院屋頂外牆，離地四十幾公尺，居然有個人沿住屋頂凸出嚟嘅結構，由左邊行過右邊。唔怕死嘅小子。

＜photo 1413，修道院右上角，離地四十米亡命表演＞

我一路睇亡命演出，一路徐徐由背囊攞出僅餘嘅兩隻香蕉，補充體力，預半個鐘行番落山。

落山梗係比上山容易。行行下，仲落起微雨，好彩真係好微，雨具都未駛用。信步行番出古城，今次真係要同佩特拉古城講聲拜拜嘞。用咗兩個丹拿搭的士返旅舍，沖涼洗沙，不在話下。

雨停咗，又再出小鎭食晚餐。今晩行遠少少，試另一間小店。呢間睇嚟再平民化啲，個款似茶餐廳。我點菜後，問佢幾多錢，佢居然話：「你唔駛知喇，一定令你滿意」。 我只點咗半隻燒雞、一碗湯、沙律同麪麭，任你計，你收得我幾多！

呢一餐，又食得幾開心。眼闊肚窄，我食唔晒，留番隻大雞肶，叫伙記包起佢。佢將雞肶放喺一塊阿剌伯麪麭上面，再用另一塊冚住佢，變成雞肶三文治，再放入紙袋。咁樣打包，啲汁又唔會漏到四圍係，個包裝又食得，果然環保。唔該埋單。多謝四個丹拿。又食又拎，果然抵食。伙記，你係得嘅。

飽餐一頓，踱步返旅舍幫助消化。