我一定瞓到好似死豬咁。鬧鐘響起，即刻落餐廳。係自助早餐，好豐富，種類又多，除咗好似火腿、蛋之外，有好多瓜爪菜菜蕃茄等等，非常健康。嘆完早餐，執好嘢，即刻起程。臨行記得攞旅舍咭片同巴士時間表。
迎住晨光，沿住加利利海邊行出公路。今日只係孭住細背囊，輕鬆得多。跳上巴士，好快就出到提比利亞市中心。
＜Photo 301, 巴士站離旅舍2公里＞
提比利亞係加利利海西岸一個小鎮，係猷太教四大聖城之一。公元前20年由羅馬人建城。古城牆廢墟仍然保留到今日。提比利亞城古建築全部用灰黑色嘅火山石做外牆，到今時今日舊建築唔准拆，可以改建或者加高，但係仍然要保留舊外牆。
＜Photo 302, 其中一截舊城牆，＞
＜Photo 303, 提比利亞街道，建築物外牆，都用灰黑色火山石，劃一顏色。＞
我漫無目的咁沿住加利利海邊行。加利利海係內陸海，其實係一個淡水湖。湖面低於海拔200公尺，水源由附近哥蘭高地約旦河流入，大部份以色列食水供應，嚟自加利利海。咁樣，你可知哥蘭高地係幾咁重要，以色列點會放手。加利利海再流向下游，又變番約旦河，經過沙漠 ，河水越流越細，最後流入死海。本來甜到飛起嘅淡水，就變成世界最鹹嘅海水。
＜Photo 304, 加利利海漁夫＞
加利利海好靜，四周畀翠綠嘅山環繞住。真係青山綠水，靚到不得了。我起身太早，岸邊餐廳都未開檔。路上乜人都冇，難得清靜，我亦放慢步伐，欣賞上帝𠎀作。遠望海面，冇風冇船，漣漪都冇一個，忽然見到近岸處有幾個小黑點浮浮沉沉。哦，原來有人游早水。迎面有兩個
繼續向南行，岸邊有個小廣埸公園仔，近海處，豎立咗一個雕塑，係加利利海嘅地形。加利利海形狀似一個豎琴，所以古希伯萊文叫佢做豎琴之海，Sea of kinneret。 旁邊有一排電子數字燈，打出一組數字，顯示水位嘅高低，藉此引起大眾對海水流失問題嘅𨶹注。
＜Photo 305 ，加利利海雕塑＞
倚欄望海一陣，走番轉頭。不遠處長櫈上，坐咗位比我年長些少嘅女士，好他條好優雅咁望住個海。我坐喺佢身邊同佢傾起嚟。佢住喺耶路撒冷，呢度好靚，佢哋一家每年都會嚟渡假。喺佢口中，我了解多啲風土人情。當知道我會去約旦，佢話佢都去過。咁我就問佢，䕶照會唔會係一個問題。
原來以色列立國，好多猷太人受民族、宗教使命所感召，由世界各地走到呢個本來稱為巴勒斯坦嘅地方，建立新國家。呢啲新移民根本就擁有佢原本居留國嘅國藉，甚至佢哋嘅下一代都可能繼續持有。因此，好多以色列人都有雙重國藉。好似呢位女仕咁，佢係美國移民，佢又係以色列人，當佢出國時，佢就可以用美國䕶照嘞。香港人咪係一樣，有特區䕶照，又有BNO，閒過立秋喇。
加利利海原來又係侯鳥遷徙路徑，候鳥由非洲飛過紅海，經加利利海，再向北飛。每到遷徙季節，可以見到雀群喺海邊棲息、揾食。一大群雀劃破長空，一定好壯觀，可惜無緣得見。旅行除咗睇嘢，同當地人傾偈、了解民風，實一快事。
提比利亞喺歷史上經歷多次地震。有地震，有火山石，亦有温泉，由公園仔沿海再向南行就到，温泉而家已圍起做咗一個土耳其浴室。我冇準備濕身，時間又趕，所以離開岸邊，走入市區。
經過提點，邊行邊留意身邊嘅屋，果然全部火山石外牆。人哋盡量保留點點滴滴嘅歷史文化、居留地嘅原貎。怪唔得猶太人被驅趕放逐二千年，居然可以本住自己嘅傳統宗教、文化再次立國，呢一點，我超級佩服。再諗起解放後，大拆北京城牆；又諗起朋友間，移民二、三代後，已經唔識講中文⋯⋯，咁重有乜好講。
行過街市，行過鎮中心，人漸多，但氣氛仍然優閒，行得好舒服。怱怱喺街邊食個餐，就搭巴士再去下一個景點。今日去嘅地方都係喺加利海嘅西岸，遊完提比利亞，一路沿岸向北就可以嘞。
跳上巴士，畀幅地圖過司機睇，手指指話我想去呢度，司機大佬當然明白晒，猛話OK。約10公里路程，話咁快就到，司機示意落車，佢鬼咁好笑容。我一路講唔該，一路跳落車。
尹加爾、阿隆中心，古船博物館 Yigal Allon Centre，由大路向海邊再行15分鐘就到。係一個海邊嘅博物館，展出加利利海、提比利亞嘅歷史。展館有一隻1986年出土，2000年前嘅船，當然係剩番棚骨。基督徒就話佢係耶穌嘅第一隻船，猶太人就認為呢隻船用過嚟打羅馬人。冇所謂嘅，各取所需喇。我唔係好捨係得離開，因為展館有泠氣，非常舒服也。
＜Photo 306 2000年古船骸骨＞
行返出大路，再等巴士。今日好熱，睇下温度計，嘩！35度！唔怪得之，我而家面紅紅啦。好彩，呢度天氣乾燥，咁熱都唔係好大汗，唔太辛苦。此時，有的士嚟兜客，問我去邊。職業需要，的士佬多數都講得兩句。佢開價20。OK喎，巴士都要15喇，殺你！
又搭的士？呢個背囊友真冇鬼用！的士向北行約8公里，就到塔巴 Tabha 。青年耶穌宣教時，經常使出神跡，好多神跡就喺呢度發生。司機喺大路停車，我行過馬路，嗰度好似一個小公園入口，路邊鑲咗塊石碑，用簡單線條刻咗幅圖畫：中間有個碗，裝住5塊餅，碗嘅左右兩邊各有一條魚。唔駛估喇嘛，就係頂頂大名嘅五餅二魚教堂喇。The Heptapagon，又稱為 The Church of the Multiplication of Loaves and Fishes。再向北行冇遠，就係 首牧聖伯多祿堂The Church of the Primacy of St Peter。教堂裏面有堆凹凸不平嘅石堆，就係耶穌餐桌。相傳，五餅二魚、神奇魚獲，就放喺呢度，供聖徒享用。聖經故事?看官比我熟，我唔會喺遊記內獻醜。都係講多啲所見，所聞、所感仲好喇。
＜Photo 307，五餅二月教堂外石碑＞
＜Photo 309，聖伯多祿堂內之耶穌餐桌＞
遊人多數都係嚟朝聖嘅信徒，佢哋一堆堆圍埋一齊，講道、唱聖詩、分享經驗等等，氣氛神聖、詳和，我呢個非教徒都受感染。
離開教堂，路邊停滿晒旅遊車，向司機問路。司機大佬知我要行路去，佢居然問導遊可唔可以載埋我。答案？梗係唔得喇，如果我係恐佈份子咪好大鑊？(一年後發生嘅馬尼拉康泰事件，就係教訓嘞。）導遊做得啱。雖然坐唔到順風車，我都好多謝司機大佬一片好心。臨走時，佢補多一句：一定要去，嗰度好值得睇。
車路邊有條好靚嘅小路，同大路分隔開，間中有矮樹做屏障，外面車來車往，麈土飛揚，小路仍然保持安泰，呢5公里湖畔小徑，行得好舒服。
＜Photo 310，加利利海邊寧靜小路＞
離遠就見到一個海灣，有碼頭，有小船。石灘上有茶座式嘅建築物、有舢舨等。有人企喺海邊，亦有人企落淺水處。呢度就係迦百農 Capenrnaum，青年耶穌顯神跡、宣教嘅地方。
不少人除咗鞋，摺高褲腳行入水中。亦有修女掀起裙腳走入水中。又有唔理三七二十一嘅修女，連袍帶帽，全身浸晒落去。當然亦有人換咗泳裝，暢游加利利海。我孭到一抽二拎，論論盡盡，點去游水。只好坐喺沙灘反轉咗嘅小船上，感受一下宗教氣氛。水上浸緊嘅人、岸上睇住嘅人，都掛住笑容。信徒感受恩澤，幸福嘅表情，都寫晒喺面上喇。
坐多一陣，時間唔早喇，計劃上，仲有一個教堂，八福堂 Church of beatitude ，據說，有好多彩玻璃窗 stained glass，不過係喺5公里外嘅八福山上，今次去唔到喇。掃乾淨腳上嘅沙，著番鞋，起程返歸。離開沙灘，有一架的士等客。我問價，唔知係咪唔啱路，佢居然話：唔遠噃，行路都得。我年少（？)氣盛，好，就憑你一句，我就行番去！
今次行得容易，因為唔駛揾路，只係沿住舊路一直向南約7公里就到旅舍。今日真係行咗好多路，預備去嘅地方，都八八九九喇，畀99分自己。
今日旅舍嚟咗一大批初中學生，由教師帶住，好嘈，好有活力。不過，最緊要唔好嘈住我瞓覺⋯⋯
⋯⋯班友真係好有活力，開門閂門，走嚟走去，真係好嘈。唔知搞到幾夜，今晚唔係幾好瞓⋯⋯。
No comments:
Post a Comment