噚晚，一定係上演大昏迷。不過，有得六個八個鐘瞓，就叉足電嘞。去旅行，一定早起身，今朝一早就四圍逛。我租嘅小旅館，全部都係背囊友嘅熱點，就係一個字---平。好似呢一間，單人房每晚只係30蚊美金。如果你肯租牀位，肯定10蚊搞掂。雖然平，但係牀鋪、泠熱水、冷氣，骨骨子子、乾乾淨淨，仲包埋一個簡單早餐𠻹，我好滿意喇。
＜photo 1201，加埋杯加啡，就係我嘅早餐。房租包埋，好滿意喇＞
我住嘅單人房，實在係一間細屋仔，四四方方，可能係由士多房改裝，但係好舒服。旅舍有好多戶外空間，到處都係躝滿植物嘅棚架，棚架下有啲放咗花園枱櫈，有啲索性鋪咗毛氈，放滿咕𠱸，背囊友打大赤腳、攬住咕𠱸、拎住啤酒，盤膝而坐，笑談見聞樂趣，交換浪遊心得。絶對係 hea 得好開心嘅地方。
食完花棚下嘅早餐，即刻出發。今日完全冇計劃，遇到乜嘢就睇乜嘢，總之隨遇而安喇。不過，去邊都好，首先都要出番阿卡巴市區。我可以搭的士、小巴、大巴都得。企喺路邊，有乜上乜。好快有架巴士，都幾新淨，人又唔多，只收半個丹拿，認真抵坐。
＜photo1202，巴士上，隔籬阿拉法又影埋一份＞
落咗車攞住地圖四圍逛。前面有個清潔工人，攞住大掃把掃緊街，佢走埋我度，面露笑容，伸出手用英文講：早晨，歡迎到約旦。握手之後，繼續佢嘅工作。我受寵若驚，乜我咁受歡迎，抑或，呢度嘅人知道旅遊業好緊要，大家都自動自覺，令遊客有好印象。點都好，我就受晒嘞。
阿卡巴最觸目嘅景點，相信係一支旗桿。佢高130公尺，以高度計，世界排第五。阿卡巴灣雖然細，但係就堆咗四個國家。由西面數起，就係埃及、以色列、約旦、沙地阿剌伯，約旦阿卡巴市就喺正中間。旗幟喺呢度升起，海灣其他三國都睇得清清楚楚。不過佢唔掛國旗，係掛阿剌伯起義旗，用嚟紀念1916年，阿剌伯起義 Arabian revolt 。我由巴士站向海行五分鐘就到旗桿。嘩，真係好高，咦，乜得光棍一條，唓，原來旗桿修理緊，冇掛到旗，真可惜，緣慳一面。係嘞，旗捍，壞乜嘢呢？
＜photo 1203，130公尺高旗桿，可惜維修中，睇唔到旗幟飄揚＞
再向海行，海堤邊泊咗好多十零米長嘅觀光木船，好簡單嘅船，兩排座位加個篷，中間地下係玻璃，用嚟睇珊瑚礁。行行下，有船家嚟兜生意，我而家唔打算遊船，行多一陣再算。
時間仲係早，海邊根本冇乜人，只有幾個約旦小子，不停喺海堤上跳落海追逐玩耍，好有朝氣。
旗桿附近有個古堡遺址，旁邊有個簡單嘅博物館仔，介紹阿卡巴市嘅歷史。畀一個丹拿，入去逛逛。
＜photo 1204，阿卡巴古堡＞
古堡中間庭院有一群約十人嘅約旦小子，佢哋成朝鋸緊一棵樹，而家坐喺度，開著火爐，煲緊茶飲。可能見我一條友仔四圍騰，就大聲撩我過去飲茶。我當然奉陪，阿剌伯話撞埋英文，又係雞同鴨講。不過，嚟嚟去去都係問嗰啲嘢啫，又唔會講乜嘢複雜嘢，加埋手勢，大家都明嘅。
＜photo 1205，阿卡巴鋸樹小子請飲茶＞
呢群人有一個監工，著晒白裇衫西褲，斯斯文文。佢又會主動向遊客講解古堡，我仲以為，接待遊客係佢工作嘅一部份。睇完古堡時，佢知道我未有任何計劃去邊，佢主動話可以車我去 Wadi Rum。華地倫沙漠！ 係我想去嘅地方，不過公共交通非常困難，如果要一日來回就更艱難。最好能夠過夜，可惜安排唔到。做獨行背囊友，交通永遠係個大問題。而家有人肯載，梗係一個好提議。即刻同佢講價，來囘幾次，38丹拿成交。
佢叫馬燊 Mazen，係政府嘅樹藝師，阿卡巴市內嘅樹，都由佢打理。就係因為自己有架車，可以經常秘撈，接載遊客四圍去。今日，我就係佢嘅客人。可以一路返工，一路揾外快，佢都幾有辦法。
今日好熱，我哋食過簡單午餐就出發。佢見我冇帽，就車我去阿卡巴唐人街買番頂，佢話嗰度買，會平啲喎。我相信唔係好多人知道，阿卡巴市居然有條唐人街！之後，去油站買大量食水，再入滿油，沿沙漠公路北上。
＜photo 1206，食過午餐，出發華地倫沙漠＞
Wadi 就係山谷，Wadi Rum 又名月之谷 Valley of the Moon 。佢好出名，據說，摩西帶領猶太人出埃及，過嘅紅海，就係阿卡巴灣呢段紅海。摩西喺沙漠迷失咗40年，講嘅沙漠，就係華地倫。另一段歷史：1916年阿拉伯人反抗鄂圖曼帝國統治，當時英國將領羅倫斯 Thomas Edward Lawrence 協助阿剌伯人。阿卡巴、Wadi Rum 都曾經係戰場。荷李活將呢段歷史拍成電影「沙漠梟雄」Lawence of Arabia，1963年攞咗奧斯卡最佳電影等，共七個金像獎。其中沙漠實景，就喺華地倫呢度拍攝。
坐喺架冇冷氣嘅車，吹埋嚟嘅風都係又乾又熱，好似大焗爐。沿沙漠公路行，我哋居然執咗兩次搭順風車嘅人。原來，搭順風車，真係咁普遍。
車行咗百幾公里，到咗遊客中心。華地倫 當然係一大片沙漠，最特別嘅係，沙漠中平地凸出一座，又高又直畢甩嘅石山，石山有七個相連嘅山峯，石山嘅名稱，因此就用咗聖經故事，叫做智慧七柱 。羅倫斯將佢喺阿剌伯戰鬥嘅經歷寫成自傳，書名就係 Seven Pillars of Wisdom。之後導演大衞連將羅倫斯嘅自傳拍成電影「沙漠梟雄」，就係以上提及嘅故事嘞。
＜photo 1207，華地倫遊客中心望向智慧七柱＞
車仔入唔到沙漠，要轉坐四驅車，成架觀光車只得我哋兩個客。司機好有型，著住白色長袍，頭捲住阿拉發式頭巾，著住阿剌伯式膠拖鞋。出發，駛上沙漠。
＜photo 1208，好型仔嘅司機＞
呢度嘅沙係粉紅色，原因當然係石頭嘅顏色就係粉紅色。呢度啲沙，唔似沙漠公路啲砂礫、碎石。相反，呢度啲沙好幼細，地面又好平。原來遠古時代，呢度本來係一個好大好大嘅湖，而家我哋行緊嘅就係湖底，所以地又平，沙又細。偶然有一堆堆植物，附近就係地下水嘅泉口。相傳摩西迷途，曾經用杖敲石，敲出泉水，唔知同地下水有冇關呢？
我哋喺沙漠較深入嘅地方停低，呢度曾經有納巴提人 Nabateans 嘅廟宇，亦有五千幾年前嘅塗鴉及文字刻喺石壁上。呢啲文字，梗係佢識我，我又唔識佢喇。
＜photo 1209，幾千年古文字塗鴉＞
沙漠中間有露營地點，又有人煮埋畀你食，一般生活設備都係唔錯嘅。如果可以安排到，喺沙漠中露營，夜晚，食飽飯，瞓喺沙地，仰望星空，一定好正。
無端端又可以去到沙漠。旅行嘅經歷，真係估你唔到。
睇完 華地倫 ，跳上車仔，駛番入沙漠公路。行行下，前面又有人揮手，又係搭順風車，我慣晒喇。一上車，佢兩個雞啄唔斷，乜嚟咁多嘢講，我梗係唔知佢哋噏乜喇。忽然，馬燊問我，如果唔趕時間，去呢個人屋企一陣好唔好？咁都得？梗係好喇，有幾何，會有咁嘅機會。
約旦南部，一片沙漠，有一個族群，分散喺沙漠各處，掙扎求生，佢哋帶住帳篷，連同羊、駱駝等牲口，逐水草而居。佢哋就係 Bedouin 貝都因人，直譯就係生活喺沙漠嘅阿剌伯人。貝都因人多數都生活貧窮，約旦國王體恤佢哋，幫佢哋起屋，免費送畀佢哋住，連租都唔駛交。沿住沙漠公路邊，就有好多呢啲村落。每次馬森提起國王，都讚口不絶。佢真係好愛國⋯⋯王。
今次呢個搭順風車嘅人，就係貝都因人。原來佢同馬燊講，屋企煮食爐有問題，想問佢修理方法。點知馬燊太好人，話幫佢修理，所以跟埋佢返屋企。
汽車駛入村，全部都係平房，圍牆內有屋前屋後空地，雖然十分簡陋，但係空間就好足夠。我哋企喺圍牆外等，佢先入屋將女眷安置喺屋內，我哋先可以入去，但仍然唔會入屋，只係喺屋前，背靠牆壁，蓆地而坐，就算飲茶傾偈都係喺屋外。佢啲細路仔仲係好細，好少見外國人，對我好有興趣，但係當我舉機影佢哋，個個即刻有咁快走咁快，唔畀我影到佢，真係好過癮。呢個場景令我諗番起，當我係街童嘅時候，有美國大兵會影我哋相，我哋都即刻走，或者雙手掩面唔畀佢哋影到，嘿，容乜易攝咗我個魂魄！而家睇番呢啲細路。歷史果然不斷重覆。
＜photo 1210，唔覺意去咗貝都因人嘅屋企＞
搞掂個爐之後，功德完滿，我哋都要走人喇。旅行真有趣，成日都有意想不到嘅驚喜。
馬燊送我返旅舍，佢知道我聽日要去佩特拉古城，又話可以車我去。咦，咁又幾好喎。好，聽朝一早嚟接我。
No comments:
Post a Comment