嚤囉仔以色列、約旦遊蹤

嚤囉仔以色列、約旦遊蹤

自作自序：點解揾啲咁嘢搞

1945年8月6日及8月9日，美國佬分別掟咗兩個原子彈落廣島、長崎。太平洋戰爭結束，香港重光。大批避走大陸嘅人，拿拿聲返香港，喺呢片借嚟嘅土地，繼續揾銀。揾銀之餘，亦不忘祖訓，努力⋯⋯造人。結果搞到遍地戰後嬰兒。

流水淙淙，物換星移。十年後一個黃昏，西營盤贊育醫院手術室，一個BB喺媽咪剖開嘅肚皮走咗出嚟。個阿爸喺街市收檔後，周身濕立立，即刻喺大三元電車站，用一毫子搭叮叮上環。阿爸見到母子平安，又多個慈菇頂，梗係開心喇。左睇右睇，本來諗住肥肥白白㗎。肥就肥嘞，黑古勒掘噃。陀仔嘅時候，已經日日用壽星公煉奶開水飲嘅喇，都係冇乜用嘅。阿爸笑嘆一句：「乜成個嚤囉仔咁嘅」。自此，「嚤囉仔」呢個朶，就永遠黐住佢喇。

看官一睇就明，冇錯，呢個BB就係我，有幸加入戰後嬰兒行列。

走過香江五、六十年代，艱難，但係自由自在嘅開心日子。適逢其會，成長於火紅年代。又有幸受益於七、八十年代，社會經濟長升不倒嘅童話夢幻時期。九十年代，陰睛不定。翻開家史，民初時期，阿爺逃避官府，南遷香江。我延長佢嘅路線，一路向南，另闢蹊徑。

與袋鼠為伍，跳嚟跳去揾糧草。托賴，養大一對袋鼠仔女。低頭數下手指，身居古老紅土大地，咁又二十年喇！再數埋腳趾，原來喺呢個小小人寰，已經寄麈半個世紀有多。抬起頭，濛起眼，向前望。仲有幾多個二十年？仲有幾多個生生猛猛嘅二十年?嚇到出咗成身泠汗。

我喺商場工作，毎日，客人就好似金魚咁，喺我眼前游嚟游去。啲人大踏步行過，又大大聲同你講笑、打招呼。月復月，年復年，我睇住佢哋愈行愈慢。一日，佢扶住拐扙行過嚟，好開心咁話畀我聽，佢對大肶，啱啱換咗不銹鋼骹 hip replacement 。一日，佢坐咗喺電輪椅，照舊過嚟打招呼、講笑。又一日，佢坐喺輪椅，䕶老院職員推住佢，喺我面前掂行掂過。佢目光呆滯，已經唔認得我。一日又一日，以後都再見唔到佢。又見到日日出雙入對嘅客人，行行下，剩番一個。又行行下，連佢都冇埋。真恐佈！

不如又換一個角度，你睇人，人亦睇你啫。而家，經常有人走埋嚟同我講，「你喺呢度都唔少日子囉噃」。又記起，以前啲人稱呼我「son」前「son」後，而家「sir」前「sir」後。我副尊容，喺人哋眼中，都係一日一日咁變啫。有一日，一個六呎高嘅青年人同我講，佢好細個跟媽咪嚟商場就見到我，嗰時都未夠高睇到個櫃面！

眼前所有嘢都提醒緊你，時間唔等人，唔係講笑。

仔女在學嘅時候，又補習，又學琴，又打波，又跳舞⋯⋯，總之多嘢搞。呢個時候，你幫佢揾錢，佢幫你清倉，絶對係最佳拍檔。要攪掂日常呢啲嗰啲，乜費物費，已經費盡心力，邊有閒情諗下自己。前幾年，最細嗰隻袋鼠入埋大學，再唔駛幫佢交學費，再冇補習，再冇學琴。佢仲會揾兼職，自己養自己。自此，每個禮拜埋數，忽然覺得鬆動咗些少。咦，似乎我哋到咗一個新境界，係唔係可以打破一下常規，揾啲嘢搞下呢？

我喺互聯網得到靈感，我要試下做獨行背囊友，自己一個人去旅行。

少年時，無牽掛，孭起背囊大江南北四圍去嘅日子，而家諗番起都開心。細路出世後，此調再難彈，加上我哋住喺地球邊陲，去邊度都又貴又唔方便，更加唔駛講仲要開工揾銀，邊有機會去長途旅行。而家大好機會，就擺喺眼前。趁住眼未蒙、耳未聾，仲有心有力四圍行嘅時候，就要把握機會，將夢幻成真。大吉利是，有乜差遲，唔知幾時，或者扭親腳，或者仆崩鼻，或者唔知生咗嚿乜嘢，咁就邊度都唔駛去喇。

跟住要諗嘅，就係去邊。

其實，當時我冇乜去過邊度，普通如星馬泰、再唔講英美加歐洲，通通未去過。所以，去邊度，實在冇乜所謂。今時今日，資訉咁發達。喺電腦，有相，有影片。谷哥地圖，居高臨下又得，帶你行街又得。睇完電腦，已經好似去完旅行。再跨張啲，將自己個樣擺上旅遊照片，做埋相簿都仲得。所以，多人去，太大路嘅地方，我唔會諗。

我揀旅行目的地，要符合兩大原則：

最最最首要嘅大原則，就係愛妻絕對絕對唔會去嘅地方。如果佢都想去嘅，梗係留番有機會一齊去喇。而家係獨行俠闖天涯，兩個人可以去嘅地方，不在考慮之列。

第二，去嗰處地方，要有體力，意志要求。好多地方，尤其先進大城巿，誇張啲講，坐輪椅都去得到。而家要揀啲地方，例如要行好多路，例如要上高落低。即係話趁住而家仲有力就要去喇。唔知邊日，少啲體力，就去唔到。又或者心態已經轉變，亦唔會去嘞。（拉開一筆，之後，我去過尼泊爾遠足 trekking，行去額菲爾士峯五千三百公尺大本營，又去過中美洲三國單車旅行，就係本住呢個原則。）

同人講起獨行旅遊，十個有九個都問，「一支公？唔同老婆去旅行，佢肯放你走咩？」我身在福中不知福，從來冇諗過放唔放人嘅問題。啱啱相反，最大支持係來自愛妻。我提出呢個念頭，佢即刻全力支持。我外出時嘅工作安排、鎖碎嘅事前聯絡工作，包括搞掂所有賬單，我都唔駛點操心。只係專心設計行程，做下功課。到時到候，執嘢上機，跟住就醒醒目執生，小心行事。之後，完完整整交番個人畀佢就係嘞。我可以輕輕鬆鬆去旅行，一定要多謝佢。

多謝老婆支持！

獨行旅遊，唔知可以去到幾多次。一次兩次？十次八次？其實又有乜嘢所謂。到有一日，兩腳一伸之前，自己睇番啲相、錄影、遊記。又或者撳電腦睇相都要人幫手，遊記又要人讀出嚟。我諗我一定會笑微微。哈，衰仔吖，我曾經做過啲咁嘅嘢。


Xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

中東兩國遊，早籌謀，少困憂，咁就樂悠悠。

安全篇

第一次做獨行背囊友，我盡能力做好啲功課，希望行程中每個細節都安排妥當。朋友知道我要去以色列，第一個反應就係：「乜你唔怕危險咩？」危險？我梗怕。我揀以色列，就係因為佢安全！此話何解，且聽我道來。

覺得佢安全，呢個印象來自網上討論區，我嘅經驗，亦證明係啱嘅。喺以色列街道行走，感覺好安全。周圍嘅人多數友善而且樂於助人，感覺好舒服。唔駛識希伯來文，英文都好通行。再講，周街都係士兵，或者著咗軍服嘅軍校學生，絕對有震懾作用。好多旅遊重點，例如耶路撒冷舊城、車站等，都有安檢，或持槍軍人駐守。係麻煩啲，為咗安全，都值得嘅。

好多人講嘅所謂危險，就係恐佈襲擊，又或者警民衝突。如果你可以親身見到恐襲，即刻買六合彩。撳下谷哥，睇下咁多年來，發生過幾多單恐襲，就知中六合彩容易過死於恐襲。不過兩教磨擦，幾千年嘅事。到而家，穆斯林同以色列警察關係都幾緊張，例如舊城大馬士革門，每個星期五都好緊張。我嚟旅行啫，絕對唔會喺嗰個時間去趁熱鬧，更加唔會走埋去參加示威啩。入境問禁，常識啫。去到邊，問下人，乜嘢做得、乜嘢唔做得。總之趨吉避凶喇。

約旦人都好善待遊客，好友善，又少咗恐襲嘅因素。當地人多數都鍾意呢個皇室，社會幾穩定。雖然一般人都唔係富有，睇個樣，生活過得幾開心。而且，穆斯林自細喺濃厚嘅宗教氣氛長大，嚴守信仰規範，一般人都好自律，明目張膽嘅街頭罪案，一般唔多。

話雖如此，經常打醒十二分精神，唔好冒險，始終係正道。

住宿篇

又要多謝高錕，有咗互聯網，訂房住宿根本完全唔係問題，而且係豐歛由人。以色列大把靚酒店，不過我就揀咗青年旅舍協會嘅會員旅舍。後來都呻笨，其實，喺訂住宿網站，民宿式嘅旅舍，選擇更多。

房租，以色列比約旦貴。喺約旦，最平住過25美金一晚，單人套房，當然好小巧，基本設備齊全，好舒服。如果再要平啲，住牀位，唔駛十美金都有交易。不過，我當然唔㑹住牀位喇。

除咗房租平之外，選擇住民宿式旅舍嘅人，多數係比較開放嘅背囊友，每晚坐喺客廳傾偈，係節目之一。交流訉息，交流心德，係幾好嘅經驗。

如果喺旺季訂住宿梗係難啲，盡量提早訂，就已經係常識。有啲好誇張，一年半載前已經訂滿。橫掂網上訂，多數都有退出條款，好多仲唔收任何費用。當然，最好唔同人逼，可以嘅話，專揀冇咁旺嘅時候去，易訂啲，有時仲會有折扣。但如果係超級淡季，又要留意：天氣會唔會好差？成日落雨，你就夠死喇。又或者，重要景點收檔、維修。乜都冇得睇，去嚟把鬼咩。

再者，預早訂咗住宿，入以色列境時，向關員出示訂房確認信，過關又會方便啲。

交通篇

訂航班來往呢兩個國家，應該好容易。我嘅做法係，先設計好整個行程，預算好大約起程日子，回程日子，每處逗留幾耐等資料，即係一個初擬嘅行程表。我有一個做旅行社嘅朋友，佢就會幫我搞掂全程機票。真係好多謝佢。我相信做得旅行社、出機票嘅公司，都一定做得到。不過如果自己有耐性，又有時間，喺網上自助訂機票亦得。

以色列國內跨省嘅巴士，又新又靚又舒服，時間表可以喺網上揾到。而家咁方便，透過網絡，向巴士公司直接詢問資料，一定冇問題。以色列巴士公司 egged bus，甚至搞埋旅遊，佢哋一定好樂意幫手。市內巴士亦都好方便。如果真係短途，搭的士都唔貴。

喺約旦，較長路程都係搭小巴，有固定站頭，都幾方便。而來往小巴站頭，有時需要的士接駁。唔係當地人，言語不通，搭市內巴士，絶對係大挑戰。

我出街，一定袋住有當地文字嘅旅舍咭片。仲有地圖，人哋知你想去邊，就可以幫到你。

口在路邊，行寃枉路就唔好喇。所以我經常問路，多數人都好樂意幫忙。但係又唔好信晒一個人。有啲人太好人，佢唔係專登老點你，佢出自好心想幫忙。最弊雖然佢唔係好知，但都估估下，咁你就要醒目，識得鑑貌辨色。如果你信晒佢就大劑喇，所以都係邊行邊再問，問多幾個就穩陣。出街前做好功課，問下旅舍嘅人，叫佢哋用當地文字寫紙條畀你、車費大約幾多⋯⋯等等。我嘅經驗，唔太難。

美食篇

多數食得嘅嘢，我都認為係美食。全程我都未食個大酒店，或者高級餐廳。去嘅都係茶餐廳式嘅食肆，或者就就喺旅舍搞掂。以色列，根本就係歐洲城市嘅水準，唔愁揾唔到食。約旦係穆斯林國家，唔食豬肉。食好多雞、羊。如果有人唔食雞，又唔食羊，咁就好麻煩嘞。又，如果冇唐餐食會死嘅人，千祈唔好嚟呢度。全程，我都見唔到一間唐餐館（可能耶路撒冷會有啩）。

錢錢篇

一般使費，食嘢、搭車、買嘢等，都用當地錢。銀行有櫃員機，提取當地錢都好方便。旅遊區，亦有人攞住一大疊銀紙，好似流動銀行咁。我自己未試過。不過，找換些少救急，睇嚟都係可以嘅。小心為上喇。此外，美金都好方便，找旅舍嘅房租，參加一日遊，找換當地錢等，首選都係美金。

心態篇

話唔緊張就呃你嘅，每次旅行前，我都好緊張。因為前面係一個全新嘅經驗。唯有盡量做多啲功課，揾多啲資料。然後開放自己，一步一步實現自己紙上嘅計劃。計劃亦唔係一成不變，可塑性要高，隨時睇環境執生。

呢句說話，成日喺我個腦仔：「我而家嚟玩啫，唔係嚟搏命」。記住屋企一家大細等緊你返歸，佢哋好想聽你愉快嘅旅行故事。