喺起程前大半年，通過網絡，我已經訂好全程住宿，亦順便訂咗三個一天遊。全部由耶路撒冷出發。今日有人帶隊，我唔駛到處周章喇。
一早起身，房門外貼咗一紙仔。原來旅遊公司打電話嚟旅舍，通知等候時間。真交帶。
食過早餐，坐喺大堂等咗冇耐，有車嚟接我。走出門外。咦，乜係架的士?上咗車。乜得我一個人?的士哥哥係阿剌伯人。叫 Faisal，因為同沙特阿剌伯國王同名，所以花名叫 King Faisal。咦，同我個名有幾分似喎。我問佢，的士點做旅行團。佢一邊揸車，一邊解釋過我知。
旅行社集合晒名單之後，分別用幾架的士，分唔同區，將住喺相近旅店嘅客人載去一間酒店。集好全部客人，再轉大車，由該酒店出發。好似而家咁，Faisal 再接多個客，就車我哋去 Regency 酒店，同大隊會合。
八八卦卦同司機傾偈係我習慣，佢見我咁好傾，又同名三分親，就問我有冇去過西岸。西岸？⋯⋯⋯。
呢度要扯開講一筆。喺旅遊討論區流傳一個故事：有人喺入境時，向關員透露佢要去西岸，結果被拒入境。唔理故事係堅定流，都唔可以冒險。我一路都揾緊去西岸嘅方法，當然保持低調。而家正正應咗呢句：踏破鐵鞋無覓處，得來全不費功夫。
聽到可以去西岸，我個心差啲跳咗出嚟，但係表情仍然保持平淡。如果佢知我咁興奮，就一定吊高嚟賣，掠我水喇。我用無可無不可嘅語調問佢詳情。
原來係個一日團，去伯利恆 Bethlehem 同耶力高 Jerico，呢兩處正正係我想去嘅地方。來回講咗幾次價錢，終於成交。出發日期係聽日！係急咗啲，而且要取消原本嘅行程，但係有機會去西岸，絕對值得，即刻交錢落訂。哈，今朝一早就搞掂埋聽日行程，真爽，而家可以專心遊覧嘞。
集齊一團人，搭旅遊車出發，直去舊城雅法 城門。導遊係一個猶太後生仔，佢有大學歷史系背景。團友嚟自世界各方，猶太仔同時用英文及西班牙文講解。喺幾千年古城，聽猶太仔講述幾千年歷史千秋功過，真有意思。
背向雅法城門，望出新城，眼前都係頗新淨嘅屋，好多都係兩、三層高嘅平房，亦有貴價大酒店。風景怡人，氣氛優雅。點估得到，1967年前，呢度就係戰場。以色列立國之初，國土並唔包括耶路撒冷。1948年，約旦趁亂，揮軍西進，一舉佔領約旦河以西巴勒斯坦大片土地，包括耶路撒冷。1967年，6日戰爭，以軍打敗約旦，奪取耶路撒冷。舊城對開呢一大片土地，曾經連場大戰，炮彈橫飛。戰後，呢笪打到爛熔熔嘅地，擺滿爛軍車、鐵絲網等戰爭廢物。以色列政府清理好呢個戰場，起咗好多屋，平價賣畀由國外移民入以色列嘅藝術工作者。將呢笪爛地，發展成藝術家樂園。計劃相當成功，呢個區，不但充滿藝術品味，亦因此推高樓價。而家，呢笪古戰場，係全以色列最貴屋價嘅地方。
＜photo 701 由舊城外望 新耶路撒冷，古戰場變身豪宅區＞
揸住呢度豪宅嘅人，咪開心住。我係先天下之憂而憂嘅人。到而家，全世界，包括美國大佬，都唔承認以色列對耶路撒冷嘅擁有權。唔知邊日，邊度又出現乜嘢強人（狂人？），挾宗教、民族大義之名，揮軍打番𨍭頭。呢片寧靜咗半世紀嘅樂士，又陷戰火，生靈塗炭。千祈唔好畀我烏鴉嘴講中。
經歷大衞王、巴比倫、波斯、羅馬、鄂圖曼等年代，舊城已有幾千年歷史。古人為咗安全而建築城牆以自保，相同背景嘅人亦住埋一齊方便互相照應。而家，城內分成：亞美尼亞、猶太、穆斯林區、基督徒，四個大區。
古城不但係旅遊、朝聖熱點，到而家仍然係住緊人嘅地方，係一個活生生嘅城市。我哋由雅法門行入城，喺鋪頭、民居之間穿梭，行過蜿蜒曲折嘅古街道，嚟到亞美尼亞區。呢度嘅亞美尼亞人都係基督徒，為咗避險，搬入城內。佢哋嘅危機意識極高，起嘅屋好似城堡，下面大麻石牆，細小窗口開喺高處，屋門口唔開喺大街。冇辦法，幾千年血的教訓，唔好好防範，到吃虧時，邊個可憐？
＜photo 702，亞美尼亞區，防衛森嚴＞
一街之隔，走到猶太區。1948年，約旦佔領耶路撒冷，將成個猶太區幾乎全部摧毀，猶太廟變成街市、變成雞鴨欄。而家見到嘅所有建築物，都係1967之後重建嘅。
＜photo 703，猶太區內，羅馬街遺址＞
＜photo 704，猶太區，街頭音樂老人＞
今日點晴嘅景點就梗係哭牆喇。喺進入哭牆廣場之前，我哋企喺一處高點，可以俯視成個聖殿山。哭牆、圓頂清真寺、阿克薩清真寺亦一覽無遺。導遊亦喺呢個居高臨下之處，同我哋講述千年恩恩怨怨。
＜photo 705，聖殿山。哭牆、圓頂清真寺、阿克薩清真寺一覽無遺＞
聖殿山本來真係有個超級豪華、超級巨型嘅聖殿。佢係三千年前，由所羅門王興建。巴比倫時期，成個聖殿被摧毀。到波斯時期，猶太人原址重建，稱為第二聖殿。二千年前羅馬人將猶太人驅逐出城，自此，大量猶太人顛沛流離世界各地二千年。聖殿，當然再次被摧毀。可能有上帝保祐，又唔係乜都冇得剩。聖殿山西南角，向西面一幅長百多米嘅䕶土牆，依然䇄立不倒。呢幅牆就係猶太教神聖中最神聖嘅聖地 --- 哭牆。唔駛講，耶路撒冷聖殿山係猶太人聖中之聖嘅聖地。但同時亦係穆斯林三大聖地之一(其他兩個係麥加 Mecca、麥地那 Medinna）。係咁嘅，公元七世紀，先知穆罕墨德就喺呢度升天。穆斯林就喺佢升天嘅地方，起咗個回教寺，就係今日嘅圓頂清真寺。故事仲未完。穆罕墨德升天呢個位，亦係神考驗亞伯拉罕，要佢將個仔 Isaac 獻畀神嘅地方。對基督徒嚟講，呢度亦係聖地。咁即係話，三教都視聖殿山為聖地，咁就可以理解，二千年嚟，點會唔鬥個你死我活呢！
直到而家，仍然有激進猶太教士，主將喺聖殿山原址興建第三聖殿！咁，兩大清真寺點處理？咁，又係唔係新嘅衝突、戰爭嘅藉口？
聽完血涙史，進入哭牆廣場。哭牆係聖中之聖，保安梗係嚴中之嚴，除咗一般安檢之外，廣場南邊築起咗居高臨下嘅走廊，裏面駐咗重兵。廣場四周高點都有武裝士兵看守，力求萬無一失。
＜Photo 706，聖中之聖 --- 哭牆，留意右手面長廊＞
＜photo 707，移平摩洛哥區而建成嘅哭牆廣場＞
廣場接近哭牆部份，再分成男士同女士兩個區。進入區內，必須帶帽。戴帽嘅意思思，係要人知道，頭頂有上帝，做人唔好自大，要存謙卑之心。我鍾意呢個解釋。
我喺入口個盤裏面攞咗一頂小白帽載喺頭上。咦，原來係絲質嘅，又幾重手喎。奇怪，又冇繩，又冇夾，就咁放上頭殼頂，居然都幾穩陣。幾千年文化，真係靠得住。
＜photo 708遊客可以免費借用盤內小白帽＞
＜photo 709，戴小白帽，進入哭牆範圍＞
喺區內慢慢踱步，觀察虔誠教徒嘅一舉一動。有自據枱櫈，搖頭晃惱頌緊經，更多人面向哭牆誠心禱告。我就好似多數遊客咁，將心願寫喺紙上，摺埋，塞入牆嘅裂縫裏面。據說，我嘅說話，上帝會聽到，如果要求唔太過份，上帝會幫我手搞掂佢啩？我寫乜？「世界和平」。咁嘅要求，我都覺得有啲過份。願望會唔會成真？真係 God knows 。
＜photo 710，石牆縫塞滿禱告＞
略略遊過猶太區，走過兩間大清真寺門前，經過有一條條二千年羅馬柱嘅古羅馬街道，再走入穆斯林區。咁好彩，一入穆斯林區，就聽到清真寺叫拜塔上嘅喇叭傳嚟嘅誦經聲。可能同我作緊福喎，多謝晒。四個區之中，穆斯林區最多人住，最多鋪頭，最多嘢賣，街道亦最繁忙。
＜photo 711，進入穆斯林區＞
今日咁啱係星期五，四十五歲以下嘅阿剌伯人唔准入區，入口有鐵馬，警察撿查證件。我哋額頭鑿咗「遊客」兩個字，掂行掂過。
重要嘅伊斯蘭教景點都喺聖殿山，進入穆斯林區主要反而係睇基督教嘅景點。二千年前，耶穌喺耶路撒冷城畀羅馬人審判，並判咗要釘十字架。佢即時要孭起十字架行上山，喺行進嘅路途中佢跌倒過，佢同母親相見，有人幫佢孭十字架，有人幫佢抹去面上嘅血污⋯⋯等等。行到山上，羅馬兵將佢釘死喺十字架上。夜晚，信徒將耶穌解下，將遺體放入山洞裏面⋯⋯。後人將佢由審判開始，到被放入墓穴呢段路分成十四個站 stations ，稱為苦路 Via Dolorosa 。苦路頭七個站就喺穆斯林區內。每個站附近，都會有為紀念該件事而建嘅小教堂。我哋由第五站開始行。
＜苦路上，每站都有小教堂。此為第七站，耶穌第二次跌倒之地＞
＜photo 713，信徒仿效耶穌背負十架行苦路，以聖墓教堂為終站＞
＜photo 714， 聖墓教堂頂部，有一條非洲窰洞式埃塞俄比亞村莊，仍然有埃塞俄比亞教士居住。
沿苦路，行入基督徒區。相對於穆斯林區，呢一區嘅街道寧靜好多。最後五個站都同聖墓教堂 Church of the Holy Sepulcher 有關。呢個教堂應該係基督徒，聖中之聖嘅地方。行入教堂右手邊有窄窄樓梯通上第二層，祭壇底下地面有粒銀星，銀星所在位置正正係釘死耶穌嘅十字架豎起嘅地方，亦係苦路嘅第十二站。信眾排長龍上到嚟，然後跪落祭檀底，再用手摸甚至親吻銀星，緬懷耶穌流盡最後一滴血，為世人贖罪之苦。
＜photo 715，聖墓教堂＞
＜photo 716，當年，十字架就豎喺呢度＞
行番落大堂中間，橫放咗一塊兩呎乘六呎左右嘅石板。耶穌由十字架解落嚟，就瞓喺呢塊石板上面，信徒依猶太習俗，幫耶穌用香草、橄欖油抺身。呢個係苦路嘅第十三站。眼前呢塊石板，塗滿橄欖油。信衆跪喺石板旁邊，有人親吻石板，有人將自己隨身物品，例如頸鍊、手袋、照片等物件放喺石上揩拭。亦有修女靜靜將頭伏喺石板上，希望感受聖靈，場面令人感動。
＜photo 717，耶穌躺下嘅石板，修女誠心禱告＞
＜photo 718，信眾將隨身物品放上，祈沾聖恩＞
教堂左手邊係另一個室，就係耶穌之墓 Tomb of Jesus ，耶穌最後被放入呢個墓室。亦係苦路最後一站。三日後耶穌就喺呢度升天，返回天家。咁就係復活節嘅故事喇。
＜photo 719，苦路最後一站，耶穌之墓＞
行過苦路，舊城節目亦完結。食晏時間，揾間餐廳仔，怱怱食個雞肉 falafel，繼續下晝節目。
由雅法 門沿城牆向南行一陣，就係舊城嘅西南角。轉東沿南面城牆行上山就係錫安山 Mt. Zion ，原來呢度係耶路撒冷最古舊嘅地方，大衛王之城 City of David 就建於此。大衞王之墓亦喺呢度。再行上一層，就係 Cenacle，直譯就係樓上，耶穌同十二門徒最後晚餐嘅地方。
＜Photo 720由此路上錫安山＞
＜photo 721，大衛王之墓＞
＜photo 722，大衛王雕像＞
再行冇遠就係 Dormition Abby ，Dormition 就係瞓覺。天主教認為，瑪利亞係唔會死嘅，佢只係喺呢度永遠瞓著，並且升天會合耶穌。所以呢度就叫馬利亞永眠修院。修院內又係壁畫，又係馬賽克等等。最特別係有一幅壁畫，畫中係一個成年嘅耶穌，抱住嬰兒嘅聖母。同一般觀念啱啱相反。原來，耶穌比聖母早上天堂，所以用上天堂嘅日子計算，聖母就梗係BB嚟喇，好有創意。
＜photo 723，聖母永眠雕像＞
＜photo 724，耶穌天國迎接嬰兒形象之聖母＞
呢幾個點，幾乎集中喺一齊，唔駛好多時間就行晒。跳上旅遊車，穿過 Jehoshaphat 山谷，駛到橄欖山。呢度係高點，可以居高臨下望到好遠。向南就係一大片猶太墓地。西邊嘅錫安山，舊城牆都盡收眼底。
到達今日最後一個點，萬國教堂 Church of All Nations。第一次世界大戰後，十二個參戰國一齊科錢起呢個教堂。以為既然可以合作起教堂，就希望可以繼續合作，維護世界和平。歷史證明，呢個希望顯然落空。教堂正前中央有幅巨畫，橫跨整個教堂頂部。
畫正中間係三位一體嘅上帝。左邊係哲學家、富裕、高尚嘅智者。佢哋都蒙住眼，代表佢哋對耶穌嘅存在視而不見。右手邊係窮困嘅人、抱住病童嘅父母。無權無勇，無助無望。佢哋都接受上帝，並且希望得到上帝拯教。呢幅畫，好有意思。
＜photo 725，萬國教堂壁畫＞
呢個教堂原址係 the Church of Agony，部份本來嘅馬賽克地磚仍然保留至今。
點解教堂叫 Agony「 痛苦」咁慘呢？陣間話過你知。
進入教堂前要經過 Garden of Gethsemane 客西馬尼園。呢度種咗好多棵橄欖樹，相傳，園內呢啲樹，耶穌在世時已經喺度。當然係信唔過，橄欖樹係就係好長壽，閒閒哋可以去到五、七百年，但二千年就誇張咗啲。原來呢度同耶穌又有𨶹。
話說，耶穌同十二門徒食過最後晚餐後，就走到客西馬尼園禱告。諗番起前一日嗰件事，佢驅逐嗰啲將聖殿變成街巿嘅人，佢知道，咁樣一定有麻煩。佢雖然係神，但佢亦係真真實實嘅一個人，佢有人嘅弱點。佢會驚恐，佢會痛苦。滴出嚟嘅唔係汗，係血。佢跪喺一嚿石前面向上帝祈禱，希望可以離開恐懼，離開痛苦。呢個時候，猶大帶埋一班人嚟，猶大畀耶穌一個死亡之吻，呢個訉號一出，羅馬兵一擁而上，拘捕耶穌。
Church of Agony 個名就係咁嚟嘅。
＜photo 726，客西馬尼園，園內幾百歲嘅橄欖樹＞
＜photo 727，教堂內描述耶穌祈禱嘅馬賽克壁畫＞
沿客西馬尼園石路向教堂行，教堂有一石堆，呢度就係耶穌禱告嘅地方。好多朝聖者都效法耶穌，到此禱告。教堂好特別，裏面好幽暗。原來意大利建築師，專登用藍色、紫色等深色玻璃做窗，窗又特別細，造成教堂內沈鬱嘅氣氛。
睇完教堂後，行程就要結束。今日節目，非常豐富，一日絕對唔夠，其實，重有好多地方冇去，例如聖母墓⋯⋯。又有好多地方只係走馬看花，唔知重有冇機會再嚟呢？
＜photo 728，上咗堂歷史課，多謝猶太導遊 Eyal。背景係舊城東面圍牆＞
No comments:
Post a Comment