嚤囉仔以色列、約旦遊蹤 第十三日 阿卡巴 ----＞ 佩特拉古城

嚤囉仔以色列、約旦遊蹤     第十三日 阿卡巴 ----＞  佩特拉古城


噚晚話畀旅舍知，我今朝一早要走，食唔到早餐。點知佢哋好好人，臨瞓前，包好早餐，送到我間房，等我起身有得食。都係啲烚蛋、阿剌伯圓形麪麭、青瓜、番茄。呢啲嘢凍食完全冇所謂。

馬燊果然守信，一早就嚟旅舍接我。八點左右，汽車就已經上咗公路。今日只行一小段沙漠公路，冇耐就左轉入國王公路 King's Highway。呢兩條公路，再加埋死海公路 the Dead Sea Highway，就係約旦連接南北嘅三條主幹線。國王公路，主要係山路，所以好多上上落落，好多轉彎抹角。行山路，景色確唔同，多咗經過村莊，草地亦多咗。行行下，仲落起微雨嚟。雨濕濕、行山路，我都有少少擔心，好彩佢唔係飛車黨，我都放心啲。

＜photo 1301，國王公路，手指指，北行方向＞

阿卡巴離佩特拉只不過150公里，大約兩個鐘就到。我哋先唔去旅舍，直接去古城。仲係早，人唔多，好容易就揾咗個街位泊好車。我叫馬燊打開個尾箱，想話將喺後座嘅大背囊收入去，唔好當街當巷畀人睇到，引人犯罪。馬燊笑笑口同我講：「唔駛咁麻煩，放喺後座都唔會有人偷，呢度係約旦，唔係美國」。我做唔到反應，心諗，乜你對自己嘅國家咁有信心。橫掂我習慣重要嘢一定跟身，大背囊都係衫衫褲褲。好，信你一次！

入古城門票，分本地人及外國人，票價當然好唔同。又可以買一日、兩日或者三日，我打算喺呢度慢慢hea，所以買咗張兩日票。

佩特拉城 Petra，阿剌伯話直譯，就係石頭城。2007年入選為新嘅世界七大奇觀之一。因為城內嘅沙、石都係粉紅色，所以又稱為玫瑰城  the Rose City，相傳曾經係納巴提人 Nabateans 嘅首都。佩特拉城座落喺絲綢之路，及蓬車商旅嘅交通要道，受益於商旅交易，當然盛極一時。後來畀羅馬人佔領，變成羅馬帝國嘅一個行省。好景不常，商旅貿易路線嘅改變，令佩特拉城逐漸衰落。不過致命一擊都係嚟至大自然，公元363年，一場大地震，徹底將佩特垃城摧毀。因為附近人口稀疏，冇乜人去騷擾佢，古城廢墟就係咁樣，擺咗喺度千幾年。盜墓者已經將所有值錢嘅嘢搜刮一空，除咗大自然嘅風化外，古城廢墟好大程度，保持佢嘅原貌不變。

既然係一國之都，梗係好大地方，梗係有排你行，就由售票大門行到古城入口，起碼都要十幾分鐘，我嘅入場券包埋呢一程騎馬。係阿剌伯馬，唔似澳洲高頭大馬，又比蒙古馬大啲。馬燊買當地居民票，佢又好慳家，冇騎馬，一路行，一路幫手，影我馬上英姿。

＜photo 1302，遊客中心騎馬去蛇道口＞










成個古城，就係建築喺石灰岩層。古城入口，係一條垂直天然石灰岩大裂縫 fault，將一座大山垂直分成兩半，裂逢就係峽谷。佢又窄又彎，稱為蛇道 the Siq。蛇道最窄處只有兩米幾，兩邊就係又直又平嘅石牆，峽谷頂可以高到百幾米。

＜photo 1303，蛇道入口＞

＜photo 1304，少見華人面孔，陌生人都要同我影相＞








蛇道地面舖嘅石路，部份仍然保留至今。因為咁嘅結構，行人置身其中，好似困咗喺個喇叭箱裏面，非常應聲。最刺激嘅係蛇道有馬車來往，清脆嘅馬蹄聲，撞起車轆聲，加埋車伕大聲呼喝，叫人讓路之聲，溝埋一齊。聲音反覆撞上石牆，造成多次回音。聲音由遠而近。好快，馬車就出現喺眼前，行人驚叫爭相走避，個個拉長個身，緊貼石牆，馬車瞬間高速擦身而過。然後，聲音遠去，蛇道再次回復平靜。又等下一架馬車，再玩一次。

＜photo 1305，瘋狂馬車，嚇壞遊人＞

蛇道石牆，刻有大量浮雕，反映佩特拉城盛極一時嘅風光。石牆邊鑿咗一條水槽，用嚟將水引入城，當時係一個非常犀利嘅水利工程。就因為呢個供水系統，佩特拉城可以講，係一個沙漠中嘅人工綠洲。據估計，363年嗰次摧毀性大地震，主要係破壞咗供水系統，所以招至滅城之災。

＜photo 1306，牆邊水槽，將水引入城內＞







行到蛇道盡頭，好似桃花源記一樣，豁然開朗。眼前景象，令我感動，卡兹尼神殿 Al Khazneh 就矗立喺我眼前。我設計行程時，呢個畫面，我喺電腦見過好多次。佢唔單止係佩特拉城嘅象徵，而且係成個約旦嘅象徵。就好似長城之於中國，富士山之於日本咁具象徵意義。

＜photo 1307，蛇道盡頭，豁然開朗＞

＜photo 1308，卡茲尼神殿＞

神殿拜乜嘢神，好多講法，莫衷一是。但係有個傳說就好有趣。相傳，法老王將佢嘅財寶，收藏喺第二層嘅瓶罐裏面，所以神殿又稱為寶庫 the Treasury 。當時嘅貝都因人，除咗好叻放牧之外，打家劫舍佢哋都優而為之。收到料話神殿有寶藏，佢哋點會放過。即刻帶埋槍爬上二樓。上到去，瓶瓶罐罐就擺喺樑柱旁邊，完好無缺，冇人打開過。嘩，發達喇，兄弟，做嘢。⋯⋯。咦，點解拎又拎唔起，蓋又打唔開？而家係偷嘢，邊有閑情硏究原因。貝都因人即刻舉槍，向住瓶瓶罐罐狂掃，想當然，打爛瓶罐，寶物自然就瀉到一地都係。一輪子彈橫飛，焇煙彌漫之後，睜大眼睇下，邊有乜嘢寶物，就只有灑滿一地嘅碎石。原來瓶瓶罐罐都係由石灰岩石雕刻出嚟。實芯嘅瓶罐，可以收藏到啲乜嘢。貝都因大盜無功而還，仲蝕咗好多子彈。而呢啲子彈窿就留到今日，導遊向客人講呢段古仔，就振振有詞，真嘅一樣喇。
實芯嘅瓶罐，原來只係建築物外觀嘅裝飾物。納巴提人 Nabateans 建築呢座城，用咗好特別嘅方法。一般講嘅建築，多數係一嚿嚿石，一塊塊木堆砌而成。而納巴提人就喺岩石上雕鑿建築物，所有樑，柱，室內空間，大堂、大廳，房間等等，全部係由石壁面向裏面雕鑿而成。原因好簡單，呢度嘅地質多數係石灰岩層，好脆、好容易雕鑿，所以就採用咁特別嘅建築方式。作過比喻，就類似中國山西窰洞，或者敦煌石窟。
　
遊人愈嚟愈多，話晒都係約旦首席旅遊點。再加上夏理信遜福嘅奪寶奇兵4，聖戰奇兵Indiana Jones and The Last Crusade ，都喺呢度取景，梗係多人嚟。
踏住玫瑰紅色嘅沙路，步入古城，兩旁都係雕琢出嚟嘅建築，有民居，有廟宇，有市集等等。最觸目嘅，當然係大劇院 the Theatre，可以容納六千人嘅弧形觀眾座位，一排排座位依山而建，全部雕鑿而成。舞台部份，接近路邊，高出地面好多，係由石板砌建而成。觀眾座位同舞台間，有個好廣闊嘅樂池 Auditorium ，一個大樂團放喺度，綽綽有餘。劇院前有圓石砌成嘅羅馬柱。原來公元兩2世紀，羅馬統治期間，連建築風格都受羅馬影響。

＜photo 1309，大劇院，可坐六千人＞

再向內深入，羅馬味就更濃。離遠就見到有羅馬柱排列嘅羅馬街 Colonnaded Street，街前居然有棵樹。原來旁邊就有個羅馬噴泉口，噴泉嘅水就係由蛇道引嚟呢度。眼前嘅噴泉只係一堆亂石，唔小心留意，遊人就會錯過呢個景點。當然，而家一滴水都見唔到。但係呢棵開心果樹，已經喺呢度生活咗四百幾年，依然支葉茂盛。希望佢可以喺度企多幾百年，繼續見證住古城歷史。

＜photo 1310，羅馬街＞

＜photo 1311，回望幾百年老樹、羅馬噴泉＞






街嘅左面寬闊嘅石階通上去羅馬大殿，the Great Temple，而家，當然已經全部都係廢墟。曾幾何時，大殿前嘅大廣場，來自四方國邦嘅商旅豪傑，雲集於此，評比物產、討論商機、交流文化，絶對有世界級大都會風範。俱往矣，站立大殿石階之頂，俯視頹桓亂石廢墟。嘆一句，千古江山，英雄可覓哉。

＜photo 1312，羅馬大殿廣場，曾經係豪傑雲集之地＞

＜photo 1313，廣場邊嘅斷柱＞







沿羅馬街行，到處都係倒下嘅樑、柱。穿過神殿大門 Temenos Gates ，左手邊就係法老王公主神殿 Qasr al-Bint Temple，佢係佩特拉城最大嘅神殿。四四方方嘅外廓，依然清𥇦可辨。屋頂有個石拱，石頭一嚿跟一嚿做成拱形。冇依冇傍，孤零零，睇嚟搖搖欲墜，就咁吊喺兩幅廿幾米高牆頂之間嘅半空，我行過佢底下，一路望住佢，慌死會中頭獎。噓！我安全穿過。唓！真係杞人憂天喇，石拱吊咗喺呢度，到而家已經一千六百五十年都未倒冧，我冇咁好彩啩。

＜photo 1314，神殿大門＞

＜photo 1315，法老王公主神殿外觀＞

＜photo 1316，神殿內，亂石處處＞

行到唔知肚餓，路邊有小食棚，賣阿剌伯式三文治、咖啡、果汁凍飲。對住千幾年古城廢墟，坐低食個簡單午餐，一邊發思古之幽情，善哉善哉。
佩特拉城實在好大，我只係睇咗古城嘅中心區。仲有周圍嘅山區、墓地、花園、修院等，留番做聽日嘅節目行程。
離開古城，揾番架車。馬燊不忘窒我：「咦，個背囊呢？⋯⋯哦，仲喺車裏面，哈哈」。
小鎮Wadi Musa，只係離古城兩公里。Musa， 即係摩西，直譯就係摩西之谷，據說摩西用手杖敲擊石頭，石頭就噴出泉水。呢度旅舍、食肆林立，四圍都係鋪頭，好容易滿足生活所需。我訂嘅旅舍亦喺呢度。
坐低喺大堂，先嚟杯阿剌伯咖啡洗洗麈，一路搞入住手續，一路同旅舍主人傾下偈。我讚佢哋約旦人，經常毫不猶疑接載路邊搭順風車嘅人，咁樂於助人，實在好難得。佢好自豪咁講，呢啲係出自佢哋宗教嘅教導。講講下又講到回教婦女自由受一定限制，例如，唔可以一個人出夜街。佢話，如果你愛呢個女人，你會保護佢。明知有危險嘅地方，點解你仲要畀佢去。我唔一定完全同意晒佢哋嘅觀點，但係我唔懷疑，個出發點，係出自真心愛護佢嘅家人。

＜photo 1317，旅舍小客廳，最好吹水＞

唔同嘅歷史、文化背景，可以多啲交流嘅話，誤解就會少咗，衝突應該亦會減少啩。
多謝馬燊陪咗我兩日，佢亦要返屋企交人畀佢老婆。
終於可以入房冲個涼，花灑下，成個地下都係沙，乜真係咁沙麈。黃昏時，落起小雨，氣温驟降，著番件褸，行出小鎮食晚餐。

＜photo 1318，骨子小餐廳，晚餐有雜會串燒、沙律，雞湯＞