喺以色列嘅最後一日，今晚半夜三更就要離開旅舍。早餐後即刻去櫃台，再次確認預訂機場的士，係唔係已經搞掂。櫃位小姐好交帶，所有資料都正確，咁就放心出街喇。
大前日去咗耶路撒冷舊城，節目真係好豐富，但略嫌走馬看花。今日上晝，再去多次。已經係第五日喺耶路撒冷，搭巴士？冇問題喇。
今次先去錫安山，重訪大衛墓、最後晩餐房間及 Dormition Abby 聖母歸天之所。各處花多些少時間，再睇得仔細啲。可能仲係好早，四圍都好靜，又冇好似大前日咁，跟住一大團人，行動快㨗好多。
避開 Jaffa 門，我沿南面城牆，由 Dung 門入城，一入就係猶太區。喺城內街道行緊，不遠處傳嚟鼓樂之聲，聽節奏，似乎係喜慶事。我好八卦，喺安全情況下，我都會去趁熱鬧。
前面有一為數約五、六十人嘅隊伍，男女老幼都齊，似乎係家人親戚嘅組合，有音樂、有鼓手，一路行，一路跳舞，好開心喎。又冇新郎新娘，唔係結婚，係乜嘢喜慶日子？我專登八八卦卦跟住隊伍後面，問下一齊行嘅人，做乜咁開心。
原來猶太法律，男仔到咗十三歲，叫做 Bar Mitzvah，女仔十二歲，叫做 Bat Mitzvah，就即係成年喇。之前，呢個細路嘅所有行為，父母都有責任。要賠錢、要坐監，父母都有份。成年之後，佢就要為自己嘅行為負責。哈，我明白喇，父母敲鑼打鼓跳晒舞，就係要慶祝自己已經甩身。再者，更要遊街示眾，敬告（警告！）各位鄉親父老。我呢個乖仔/乖女，已經夠秤，以後各位同佢有乜瓜葛，直接搵當事人，唔好麻煩我。⋯⋯，唔知係咪咁呢。
正當我諗得痴痴呆呆之際，我畀人半推半就，推咗出去人群之中，我唔客氣，即刻手拖手圍成一圈，跳埋一份，親身體會下歡樂。一路跳一路打聽，原來呢家人個仔到咗十三歲，而家進行緊儀式。
隊伍行行下，行咗去哭牆，我又跟埋入去。哭牆分男女兩部份，阿仔走咗過呢邊，阿媽阿姨、家姐阿妹，就喺另一邊。佢哋倚住中間籬笆望過嚟，阿妹及細路女唔夠高，索性企上枱面。
阿仔已經長大成人，要獨立，唔再依賴父母庇蔭。教士幫佢作福，等上帝嘅恩典可以顧及呢個長大咗嘅細路。阿仔亦要當眾朗讀經書，教士又向佢提問宗教知識。考試完畢後，小子變成大人。家人用四枝棍仔，竪起一個四方小布帳篷。阿仔企喺中間，浩浩蕩蕩向中間籬笆行去。嗰邊廂，姨媽姑姐細妹，紛紛攞起糖果，噼嚦啪嘞，掟過呢邊。呢邊啲𡃁仔當然唔會示弱，執番地下嘅糖果，掟番過去。一場糖果大戰就咁開始。唓，咪又係細路一個。十二、三歲就成年，會唔會細個咗啲呢？
＜photo 1001，哭牆內進行成年禮＞
＜photo 1002，猶太教信徒唔可以直接由出水口冼手，要先用容器盛水＞
上次嚟舊城，因為時間緊逼，行唔晒苦路 Via Dolorosa 嘅全程，非常遣憾。今次攞住地圖，非常容易就搵到第一站。苦路嘅起點而家係一間學校，當年耶穌就喺呢度受審。第二、三、四站，耶穌孭起十字架，遇到聖母瑪利亞 ⋯⋯。我睇住地圖，一站一站咁行。每次見到小教堂，必定入去睇睇。
一個小教堂，燈光昏暗。祭壇前有十個八個後生仔女，圍個圈企喺度唱緊聖詩。冇伴奏，男女高低音部和諧混合，歌聲喺教堂牆壁、圓頂，來回踫撞。回聲混和原聲，好有神聖嘅感覺。即刻坐前啲，開著攝錄機，錄低天籟之聲。
＜photo 1003，聲樂家，小教堂內獻唱＞
唔覺意參加咗生日 party ，又唔覺意聽咗演唱會。旅行就係充滿驚喜。
終於完成心願，由頭到尾行晒全段苦路。對舊城嘅認識，又加多一層。怱怱食過午餐，又繼續下晝活動。
＜photo 1004 聖墓教堂內壁畫 1 信徒將耶穌由十字架解下＞
＜photo 1005 聖墓教堂內壁畫 2 放上石板上，搽橄欖油、香料、再包裹＞
＜photo 1006 聖墓教堂內壁畫 3 將耶穌抱入洞穴內＞
＜photo 1007 耶路撒冷大屠殺紀念館＞
一程巴士直接去到。Yad Vashem，係希伯來文，就係 Holocaust Museum 大屠殺紀念館。嚟呢度睇，就預咗心情唔會好。
耶路撒冷呢一間，係全世界最大嘅屠猶紀念館。為咗鼔勵多啲人去睇，紀念館免費入場，不過歡迎捐款。
紀念館唔准影相，大啲嘅背囊都要寄存。我買咗個聲音導遊，帶住耳筒就行入去。
近代嘅猶太人根本就係寄人籬下嘅一群人，千幾年來，雖然住喺唔同國家，仍然對猶太文化，宗教、血緣等，非常執著。喺寄居國，儘管喺當地接受教育、工作、甚至成為當地官員、軍人，仍然不忘喺工餘時間去猶太教堂崇拜、敘會，而小朋友則去學希伯來文。亡國之後千幾二千年，仍然可以保有自己民族嘅身分認同，猶太人直情係好犀利。紀念館第一部份，就講述咗佢哋喺各個寄居國嘅生活，佢哋點樣安份守己，好多猶太人為當地點樣作出貢獻，有幾多幾多猶太人，喺各個範疇方面成為世界知名人士，最出名嗰個就梗係愛因斯坦喇。紀念館搜集咗好多當時嘅生活照片，日常家居照片、婚宴、野餐、聚會⋯等等，在在顯示猶太人無異於一般人，都係和和平平，喺當地社會，各施其職，發光發熱。
話雖如此，正正係猶太人呢種強烈嘅身分認同，基於宗教、基於種族，往往容易成為受攻擊對象。紀念館展出歷來世界各國，點樣打擊，排擠猶太人。當然最重點講嘅就係第一次世界大戰後納粹德國。
希魔點樣殘酷對待猶太人，我哋耳熟能詳。但係而家再睇埋圖片，電影，仍然覺得非常震撼。人類嘅仇恨，竟然可以去到咁盡！
最荒謬嘅就係居然發明好多種「科學化」嘅方方法，利用參數、工具，例如用好大嘅卡尺 calipers 去量度身體各個部位及其比例，用嚟分辨出優秀種族 superior racial stock ，佢當然認為亞利安人係人間極品。或係低等種族 inferior strain ，例如猶太、吉卜賽、黑人。既然低等，梗係要除之而後快咯。
人類無恥到想盡辦法去制造敵人，再以消滅「敵人」為口號，欺騙盲目追隨者，以達到一己私利。希魔咁做絕對唔係前無古人，更加唔會係後無來者。
紀念館而家仍然搜集緊屠猶死難者名單及遺物，使受害者有尊嚴咁留喺歷史之中。又加緊對倖存者做口述歷史紀錄，要同時間競賽，否則，死一個就冇一個。
喺黑暗中，好彩都有一線曙光。呢個世界仍然有好多好人，猶太人受緊難之時，亦有不少人冒住危險，本住公義信念去伸出援手。紀念館特別有一部份叫做國際義人 Righteous Among the Nations，講述呢啲人點樣幫助猶太人逃出生天，當然最熟悉嘅就係舒特拉 Oskar Schindler，佢嘅名單拯救咗千二個猶太人。展館有好大篇幅講述呢件事。
唔講唔知，原來當時不少猶太人逃難去咗上海。使我諗起張愛玲，喺佢嘅小說提及上海時，例如「色、戒」裏面嘅珠寶店，又或者佢同好友炎櫻常去嘅咖啡店等等，經常有猶太人嘅影子，唔知同猶太難民有冇関係呢。睇真啲，原來國際義人名單裏面，真係有個叫李鳯山嘅中國人。1938年，佢係中華民國駐維也納總領使，佢上任總領使頭三個月，已經發咗千二個簽證畀猶太人去上海。實際總共簽咗幾多，就冇確實數字。咁就解釋得到，點解嗰個時期有咁多猶太人喺上海。亦有猶太人攞住去上海嘅簽證，而留咗喺香港，有啲又輾轉去咗澳洲、紐西蘭。
睇紀念館就預咗愈睇愈傷感，不過事物總有兩面睇。當時歐美各國，完全冇盡力去阻止大屠殺嘅發生。甚至可能發出錯誤訉息畀希魔：猶太人？我哋唔會特別關注。1938年埃維昂會議 Évian Conference，32個國家開會，多數國家都聲明拒絕接收猶太難民。希魔見可以落閘放狗，咪有咁盡去咁盡。希魔甚至咁講：「如果有任何國家願意收留呢啲罪犯（佢講嘅係猶太人），佢會用最豪華嘅船，將佢哋送走！」而家冇人肯收，屠猶就係結果喇。
戰後，歐美各國或多或少都有啲羞愧、有啲內疚、有啲覺得對唔住猶太人。所以當聯合國討論巴勒斯坦分割方案時，就以大比數通過181號決議，猶太人於是可以喺巴勤斯坦地區建立以色列國。如果大屠殺冇發生過，以色列立國，又有冇咁順利呢？不過，歷史邊度有如果，但係，就非常吊詭嘞。
帶住沈重嘅心情離開紀念館，心情咁重，點搭巴士。橫掂今日最後一日喺以色列，豪啲，揮手截的士。
食完晚餐就喺旅舍休息。話晒喺呢間旅舍都住咗五日，四圍去同旅舍職員影相、道別。約咗的士今晚兩點嚟接我，執好晒背囊，坐喺大堂一邊等一邊寫遊記。
＜photo 1008，呢位係旅舍保安，同佢坐埋影相，知道佢腰間佩槍＞
No comments:
Post a Comment