嚤囉仔遊蹤: 嚤囉仔以色列、約旦遊蹤第十一日離開以色列，飛安曼 ----＞阿卡巴

嚤囉仔以色列、約旦遊蹤第十一日離開以色列，飛安曼 ----＞阿卡巴

十日以色列之旅已經結束。凌晨時分，連埋全身家當，坐喺昏暗嘅大堂等的士，好彩，有巡夜嘅保安阿哥埋嚟同我傾偈，我冇咁悶之餘，對呢個國度又有多些少嘅認識。

的士準時兩點到達，實在係一架九座位小巴，已經有其他客人喺車上。小巴喺凌晨嘅耶路撒冷街道奔馳，冇行人、冇塞車，只需四十五分鐘就到達台拉維夫機場。我畀自己好充裕嘅時間，可以輕輕鬆鬆搞掂所有手續。離境嘅檢查遠比入境嚴，咁都係可以理解嘅。過晒海關，行去候機大堂，哈，居然有老麥，鬼咁肚餓，要咗個巨無霸餐。果然，人間之美味，就係當你最肚餓嘅時候食嘅食物喇。

機上，旁邊坐咗個猶太後生仔，同好多以色列人，擁有雙重國藉一樣，佢亦同時有加拿大身分。講起上嚟，原來佢啱啱攞咗澳洲工作假期 working holiday 簽證，今次經加拿大之後就會去澳洲。喺旅行途中，我得到個印象，唔少人，尤其年青一輩，表示鍾意去澳洲生活，原因係澳洲畀佢哋嘅印象，係自由自在，冇咁多拘束。我當然同意喇。既然咁啱傾，我同佢講起關於以色列服兵役嘅話題。原來佢啱啱完咗兵役，佢對服兵役又有另一種嘅睇法。佢話十零廿歲仔，唔係應該打下電腦，發下夢嘅咩，點解要攞起支槍呢？⋯⋯。我當然100%體會佢嘅心情，可惜人在江湖，以色列周邊係乜嘢環境。世事豈能盡如人意，呢一點，猶太仔點會唔明，所以佢先至試試另尋出路。希望佢心想事成喇。

四十五分鐘飛行時間，九點鐘到達安曼艾莉雅皇后 Queen Alia 國際機場。我用袋鼠䕶照，唔駛預先攞簽證，到步畀10個丹拿（約旦錢，Jordanian dinar，簡稱JD）做落地簽證，冇預備好丹拿？唔緊要，附近有找續，美金、歐元乜都得。

順利通過海關。先喺機場安裝預繳流動電話，然後搭巴士離開機場。今日嘅目的地係約旦最南端嘅城市阿卡巴 Aqaba ，離安曼大約320公里。我嘅計劃係搭完呢程機場巴士，再轉跨市巴士去阿卡巴。

巴士駛入安曼，冇耐就到總站。第一時間四圍問人，邊度有車去阿卡巴。原來呢個係南站，北站至有車去。咁又要張羅點去北站！唉，最方便又係的士。揾到的士哥哥，又出地圖，又郁身郁勢，希望講得佢明。好彩，的士佬多數都有語言天才，佢明白我想去邊之後，諗咗一陣，向我提出反建議：做乜要左轉右轉，我直接車你去。⋯⋯。到我要諗下。三百幾公里車程，就係大約由雪梨去坎培拉咁遠。我未試過搭咁遠的士，一定好貴。我問：幾錢？佢開70JD。咦唔太差喎，百一蚊左右美金去咁遠，來回幾次講價，最後50丹拿成交。我呢個失敗嘅背囊友，真羞家，又搭的士喇。

＜photo 1101，的士大佬，車我去阿卡巴＞

的士向南駛，離開安曼，駛入貫通南北嘅主要幹綫，沙漠公路 the Desert Highway。真係冇改錯名，公路兩旁，前後左右就係睇唔到盡頭嘅沙漠，偶然會經過小鎮，沙漠中嘅小鎮，真係好細好細。實在我有啲擔心，咁少錢都肯載我，會唔會有景轟。又見佢打電話，又唔知佢噏乜，都起咗戒備心。沿路，經常見到警車停喺路邊，咁我又放心啲啲。

＜photo 1102，沙漠公路係連接約旦南北嘅主要幹線＞

＜photo 1103，沙漠公路旁，貝都因人正在放牧＞

前面有人揮手截車，的士載咗佢，坐喺我後面，一上車雞啄唔斷講阿剌伯話。到咗佢目的地，畀啲錢司機就落車。我網上睇討論室，喺約旦搭順風車係好普遍，甚至唔計較畀唔畀錢，但係畀得起嘅都好自動自覺向司機貢獻多少，呢啲係約定俗成嘅社會行為。討論區就話幾安全，不過都唔建議單身女仔去試，始終係有危險嘅，我就唔敢試嘞。

長途車，梗係同佢噏多兩句。最有興趣問佢有幾多個老婆。佢話佢係窮人，得一個老婆，不過就好好生養，有七個仔女。我諗，一個人孭起咁大頭家，食麪麭都食到窮。佢猛呻話生活艱難，又話今日成日都冇發過市，仲打開個錢箱畀我睇。嘩，真係冇乜銀。佢又幾好傾，乜都講，咁我對呢個地方，又加咗多啲印象。

前面有路障，警察向我哋招手。一定係佢興奮過頭，超咗速都唔知。佢攞住張牛肉乾成個謝晒。我問，罸幾錢？30丹拿。我計一計，30丹拿再加汽油，佢呢程蝕突。我心諗，佢咁嘅情緒揸車，我會好危險。我同佢講，我唔想佢拎唔到錢返屋企，我幫佢畀罰款，不過，唔准再超速。佢即刻四萬咁口，繼續行程。雖然唔係我嘅錯，但係，我真係唔鍾意有人幫我做咗嘢，又要蝕錢。當然，我嘅安全，就更加緊要喇。

阿卡巴係約旦唯一海港，由呢度出紅海，過阿丁灣就出阿剌伯海、印度洋。呢度又係約旦嘅經濟特區 Special Economic Zone，貨物抽稅同其他地區唔一樣，所以公路有檢查站，防止將未完稅嘅貨物，運入約旦其他地區。
　
離遠見到紅海，好開心。我訂嘅旅舍係海灘區，離市中心12公里。的士車到門口，我畀80丹拿過佢，再用教訓口吻：唔好再超速。佢知我會再去安曼，所以畀咗咭片我，話要車就搵佢喎。

趁時間仲早，搞掂入房手續，即刻換好泳裝，攞晒相機，出去游水咯。由旅舍過咗馬路就係沙灘，非常方便。人唔多，好寧靜。第一件事即刻要做嘅，就係擺好攝錄機，攞出口琴，用紅海做背景，夕陽做燈光，演奏一曲。至此，我完成畀自己嘅功課。我喺加利利海、地中海、死海，同埋而家嘅，紅海，吹奏口琴。Yeah 我得咗喇。

而家可以大叫一聲，紅海，我嚟喇。撲入水中，畀紅海緊緊擁抱。水温適中，好好游。潛入水中。嘩，好多石，好多海草。我唔多鍾意喺海草附近游水，略略游一陣，就上返岸。一個人靜靜坐喺沙灘上，享受大自然嘅恩賜。海上有幾個人玩緊徒手潛水，呢一帶紅海，有珊瑚礁，所以不少人嚟呢度潛水。