嚤囉仔以色列、約旦遊蹤 第五日 台拉維夫單車遊
地中海式早餐，每朝都食好多番茄、青瓜等沙律。又易整，又健康，如果養成習慣，真係冇壞。
每朝嗰杯咖啡，真係唔少得。自助早餐，自冲自飲，照例又係落咖啡粉、糖丶奶等。但係今次呢杯咖啡，有啲奇怪。顔色寧舍深，最特別就係攪極都唔溶，硬係剩咗成半杯渣，沉咗落杯底。我試過特登搞勻佢，趁未沉底，就即刻飲。味道好濃，但係唔夠滑，成口一粒粒，口感好差。咖啡渣又會搞到個杯黐滿黑色一粒粒，食相亦唔好睇。
＜Photo 501， 以色列咖啡，攪極唔溶＞
我係每事問嘅人，即刻問下正在冲咖啡嘅猶太嬸嬸。嗱嗱，我又學嘢喇。
原來呢啲叫以色列咖啡 Israeli coffee，就真係點攪都唔會溶。所以枱面預備嘅杯碟都好唔同：係一隻墊碟，上面放咗兩隻杯。一隻杯用嚟冲咖啡粉，攪勻再等佢沉澱好，再倒咖啡落第二隻杯，梗係唔要渣，咁咪即係隔渣囉。之後加糖加奶，或者飛砂走石，就悉隨尊便。的確，咁樣飲，個食相係好睇啲。
執過簡單行裝就起程。真幸運，旅舍不遠就有單車鋪，老闆同一個伙記都唔識英文，雞同鴨講。另一個伙記，叫 Lolly Boy，佢由菲律賓嚟嘅，可以同我用英文溝通。
喺租單車之餘，都噏多兩句。Lolly boy 十幾年前都係嚟以色列旅行，冇諗過要喺呢度長住。點知遇到個以色列嬌娃，當然係鬼火咁靚嗰隻（係佢話咋）。雙雙墮入愛海，不能自拔，咪就搞成咁囉。人生際遇，點會有早知。二十幾年前，我又點知我會長居袋鼠之鄉。Lolly boy嘅遭遇，理解嘅，理解嘅。
抄低證件資料，找埋條數，踩車走人。Lolly Boy 追出舖頭，喺我背後叫：「Hey man, be careful of Israeli beauties」。「哈哈哈」。我咁樣答佢。
＜Photo 502，單車鋪巧遇 Lolly Boy＞
＜Photo 503，沿單車徑，一路北上＞
沿路都見到跑步、急行嘅晨運客。踩單車、帶狗嘅亦不少。
單車徑邊，一個伸出沙灘嘅平台上，三幾個教師帶住一班小學生喺度畫緊畫。我好八卦，停低同教師嗲兩句，原來係上緊堂。上美術堂，喺沙灘畫地中海，真幸福。當知道我由澳洲嚟，佢大聲同班學生仔用英文講：「呢位先生由澳洲嚟，我哋係朋友（friends）嚟㗎」。小朋友都望住我，滿面笑容，舉起手仔講 Hi。國民教育，由細做起。以色列周身牙齒印，四圍都係敵人。誰是我們的敵人，誰是我們的朋友？呢個梗係保家衛國嘅首要問題，唔由細教起點得?既然我哋咁 friend，一齊影張相。之後，我踩我嘅車，佢哋繼續上堂。
望向海面，見唔到游水嘅人，但係滑浪嘅就不少，今日冇咁大浪，滑浪者都企唔到上板，一定好失望。不過，有咁多滑浪嘅人，想當然，呢度一定經常出現大浪喇。我鎖好單車，行落沙灘，雖然游唔到水，但係都要濕一濕對腳。
＜Photo 504，地中海濕濕腳＞
沙灘好闊，每隔不遠，就有一個大帳篷。帳篷三面圍住，可以擋風，向海嗰一面打開，冇遮風景。睇個樣，人人都可以用。風好大，我走入其中一個帳蓬。裏面瞓咗一個人，厚睡袋加大褸冚住，旁邊放咗一個大背囊。咁大風，噚晚一定好凍。我向佢致敬，咁先至似一個背囊友。而我?噚晚冲熱水涼，高牀軟枕。自稱背囊友?我好慚愧。
剝晒鞋襪，開住攝錄機，跑落地中海。人唔多，稀稀疏疏有人跑過，有人帶狗經過。我行番帳篷，坐喺沙上，攞出口琴吹奏起嚟。風聲、海浪聲為我伴秦，晨運嘅人，奔跑嘅狗，係我舞者，地中海作我佈景。
＜Photo 505，沙灘上的口琴聲＞
今次呢個中東兩國行程，我有個功課畀自己，就係用四個海做背景吹奏口琴。邊四個海?加利利海、地中海、死海、紅海。而家完成咗一半嘞。一曲既畢。有掌聲?來自睡袋。原來我嘈醒咗佢。千里有知音，我哋惺惺相惜，都算緣份一場。
繼續踩車。而家仲係早餐時間，食肆開出路邊嘅餐枱，坐住一雙一對嘅情侶，曬住朝陽，吹住海風，享受住香濃咖啡，訴說住甜蜜情話。我呢個不速之客，踩住單車，轆過木板車道，發出轟然怪聲。佢哋亦不為所動，當我冇到。我亦不宜久留，溜之大吉。
好快踩到沙灘北端。好大好大一個用長木條搭成嘅平台，由路面一直伸出沙灘上面，遊人唔駛踩落沙地就可以行出海邊。木條砌得好密，喺上面踩單車，絕冇問題。由呢度向南回望。雅法港燈塔，隱隱可見，我今朝就由嗰度出發，而家已經喺五公里外。
＜Photo 506，雅法港燈塔，就喺最遠處＞
正在喺木平台上錄影緊，好似聽到有人叫我。平台上近海邊處，橫七豎八、或坐或瞓，聚咗一班阿剌伯人。有一個著紅衫嘅，佢真係揮手示意我過去。日光日白，怕你乜嘢？我行埋去。
人堆中，地上有一個生住火嘅露營用氣爐，上面有一個燒到黑孖孖嘅鋁水煲。「嚟，影我點煲咖啡」。紅衫客笑笑口，用英文加埋手勢同我講。我點會托手㬹，猛話OK。佢打開煲蓋，又落咖啡粉、又落糖，再放喺火上，一路攪一路煲。佢一定好興奮，又對住鏡頭做埋解話，一時又拋起匙羮，一時又拎高水煲，總之動作多多。最後互相介紹，又一齊飲咖啡。我唔識阿剌伯話，佢哋啲英文又係有限公司，大家噏唔明就手勢搭夠，總之哈哈大笑，夠晒高興。阿剌伯人，以好客豪爽見稱，今次都算領會過嘞
＜休閒的阿剌伯人＞
＜Photo 508，鬼馬紅衫客＞
別過阿剌伯朋友，跳上單車，繼續行程。回過頭見到佢哋大叫大笑單純嘅樣，忽然閃出恐佈念頭。呢班好客友善嘅人，假使一日因為宗教理由而走上戰場，我相信佢哋會奮勇殺敵、絕不留手。政棍高舉宗教、主義大旗，欺騙善良人民互相廝殺，佢哋自己就坐收漁人之利。喺呢個古城，呢啲咁嘅歷史，幾千年來不斷重覆，到今日都未中斷過。如果真係有全能全知造物者，又點解容許呢啲咁嘅事一路發生？我唔明。
長長嘅沙灘盡頭係 Yarkon River 嘅出口，離開沙灘，沿河向東行，係一片河畔公園。單車徑林蔭夾道，免咗日曬之苦，踩住兩個轆，清風徐來，好鬼舒服也。呢度居然有個狗公園、又有一個小小動物園。規模當然好細，不過，作為小社區嘅設施，唔錯嘞。
以色列有好大量年青人口，沿路都見大肚婆。年輕媽咪，推住BB車散步，到處可見。又係啱嘅，要抗衡阿剌伯人鍾意生仔嘅民族性，猷太人都要鼓勵生育，有咁多生咁多。冇咁多青年，唔夠兵源，點樣保家衛國。
河畔公園旁邊就係住宅區，再過啲就係中心區。好闊嘅行人路，四圍都係商舖、食肆，好熱鬧，但又唔係逼到死嗰隻。我問過，原來單車係可以踩上行人路。一路踩都冇人鬧，亦冇人眼超超，即係冇問題喇。
＜Photo 509，單車鬧市遊＞
Dizengoff Centre 係呢個區最大嘅購物中心。正門都唔細㗎，但係只開兩扇門做入口。原因?看官一定估到。所有客人都要過安檢，先至可以入去。門口排咗條隊。作為遊客，雖然唔買嘢，都入去感受一下。條龍唔算長，好快就入到去。啲人唔知係唔係嫌麻煩，唔多肯入嚟。商埸內人流稀疏，鋪頭嘅裝飾、所賣嘅貨品，都有大城市水準，可惜客人唔多。又係嗰句，咁點做生意。
作為遊客，呢個商埸，我覺得好好行，又有冷氣，又冇乜人行。做人唔可以咁自私嘅，嘆咗咁耐冷氣，都要作啲啲貢獻啩。哈，今朝到而家都未食過嘢，就喺呢度食個晏。有乜好食吖，又係三文治加汽水。話時話，到而家，我都未見過一間唐餐館。
我繼續踩住單車四圍兜。經過一個橫街露天市集，似足大笪地，裏面賣平價日用品，亦賣啲旅行手信。再行遠些少又有專賣布料、手工藝市場。我係咁意都行個匝。台拉維夫街頭，整潔、繁忙而有序。印象唔錯。
＜Photo 510台拉維夫大笪地＞
再踩番出海邊。嗰度有個博物館，咁啱又裝修緊。難得清閒，海邊揾張長櫈坐低，吹住由地中海嚟嘅風、曬住就嚟西下嘅陽光，望住銀光閃爍嘅波濤，係好有詩意喎。咦，海邊石頭上嗰嚿黑色嘢係乜？睇真啲。貓！曬太陽嘅貓。草地上、單車路邊、櫈底⋯⋯，原來四圍都有貓。貓嘅自理能力好高，睇嚟，呢度係佢哋屋企。呢度離埃及只一海之隔，唔知同埃及妖后隻貓，有冇親戚関係?
＜Photo 511，地中海嘅陽光，呢隻貓真識嘆＞
別過貓群，原路返回，還車，返旅舍不在話下。我第一次咁樣踩車單遊覽，其實係一個好好嘅旅遊方式，有機會應該多試試。
No comments:
Post a Comment