中美洲三國單車遊（19）2012.11. 15 首都巴拿馬城，運河踩車

中美洲三國單車遊（19）首都巴拿馬城，運河踩車

文章日期：03/01/2013 04:33 pm

巴拿馬運河

中美洲三國單車遊（19）首都巴拿馬城，運河踩車

2012.11.15

今日要入首都巴拿馬城，因為驚住入城會塞車，唔單止要早起， 早餐重要 pack 上車食。領隊 Martin 同我哋簡介下巴拿馬城，同埋巴拿馬運河。今日係最後一日踩單車，明天一早，全團人就各散東西喇。喺巴士，傳緊三個信封，各人入錢做貼士，分別畀領隊、機械師同埋司機。入幾多錢，完全隨意，甚至你唔入錢都冇人知。我真係唔知入幾多，有人話，畀領隊，大概一蚊美金一日，其他減半。我就照做喇。

巴士向東行，一路駛向巴拿馬城。今日天陰陰，沿途有時落出雨，巴士喺時陰時雨嘅天氣下行咗270km，條路好暢通。忽然，領隊 Martin 叫大家預備相機，冇耐，一條鐵索橋就出現喺前面。因為橋喺山腰建成，橋面離水面好高，

跨過嘅，就係巴拿馬運河。過咗河就離䦕大路，向南駛向船閘 Miraflores Locks。呢個南端船閘，係巴拿馬運河向太平洋嘅通道。

巴士駛落山，駛向運河船閘及展覽館。一開始落山，就落起大雨，係好大好大嗰隻。喂，大佬，唔好落啦，陣間重要踩單車噃。果然係熱帶雨，落咗一陣就停。

巴士停喺展覽館停車場，領隊約好各人幾點鐘返番巴士，大家就走去展覽館。參觀運河船閘，入場費承惠8蚊美金。

咁啱有船過緊，大家快快手搭𨋢上頂樓，走出瞭望平台。船閘有兩條水道，可以畀兩艘船同時通過，今次呢兩艘船都係由運河南行駛出太平洋嘅。船喺水道中，有兩架火車頭喺兩岸陸地牽引，用鋼䌫由水道一端拉去另一端。調節水位後，打開水閘，船就駛出太平洋喇。

因為過程都非常緩慢，大把時間，參觀嘅人都他他條條四圍影相，十分休閒。問下其他遊客，原來參觀運河嘅人，多數都係郵輪乘客，落咗船，再搭車嚟參觀。

睇完船過閘。咦，肚餓哩，食嘢喇。展覽舘有幾個餐廳，都好骨子。如果時間充足，重可以食自助餐㖭，我又冇時間，又孤寒。晏晝啫，駛乜咁巴閉?落去樓下，走出露天小食部，買隻熱狗加罐可樂，醫飽個肚就搞掂喇。

展覽館地下有個小小展覽㕔，有照片、有影片、有實物展出。都係向當日開山劈石嘅人致敬。想當年，法國人嚟呢度，用原始工具劈䦕群山，造水道，造人工湖，工業意外再加瘧疾黃熱病，一定死咗唔少人。呢度附近，就有墳埸，長眠於此嘅都係建築運河勇士。

呢個展㕔真係好細，唔駛半粒鐘就睇完。同一層有個可以坐百幾人嘅電影院，放映嘅係一套立體電影，介紹運河嘅過去、現在及將來嘅發展。運河係巴拿馬嘅搖錢樹，為國家搵好多錢。巴拿馬係拉丁美洲數一數二嘅富國，都係多得呢條運河。

又食飽、又睇完，咁就預備踩車，呢段路，係今次中美洲之旅最後一程單車。巴士車我哋離開大路，就踩較靜嘅馬路。巴士入唔到細路，有架 pick up van 跟我哋。踩咗唔夠半粒鐘，就落起雨。又熱又濕，我都係唔著風褸，由得佢淋喇。條路實在好好踩，又平又闊又少車，落咗雨，天又涼啲，身又濕晒，踩車時，風吹埋嚟，好舒服。

踩過一條破爛鐵橋，繼續沿運河邊踩，岸邊係火車軌，遠望運河嘅人工湖，有一隻貨櫃船，喺湮霧中駛過群山，向加勒比海方向駛去，一幅好靚嘅圖畫。

今日只係踩咗10 km，踩到國家公園外圍就停止喇。巴士由另一條路駛嚟接我哋。點解咁多人一早坐咗上車?哦，原來頭先一落雨，呢班友已經放棄，上咗巴士。我哋四個踩喺前頭，就唔知喇。雖然只得10k，但絕對係值得紀念嘅一程。

同架單車講聲再見，就拆轆擺上車頂。巴士駛去首都巴拿馬城，離遠已睇到高樓大廈，䢖築物都好新淨，果然係首都，有大都巿風格。駛入巿區，更體會大都巿特色，就係塞車。左兜右𨍭，終於到達酒店。司機同阿 Mau 終於完成兩個禮拜嘅任務，連巴士帶單車，即刻駛番哥斯達尼加。多謝佢哋照顧咗我咁多曰，講聲拜拜，有緣再敘。

時間無多，略作休整，起程去舊城區。冇巴士，截的士都好方便。原來舊城區係巴拿馬政府辦公室集中地，各部門首長都霸住最靚海景嘅歷史建築物做辦公大樓，門外、街道都重兵駐守，睇嚟，喺呢度行街，應該都幾安全。沿海邊路行，呢度絕對係旅遊點，路邊擺滿賣紀念品嘅㰙檔。向海望去係一望無際嘅太平洋，隔個海灣，就見到高樓林立嘅商業中心區，矗立喺太平洋海岸。

一行十人，約好食晩飯時間、地點，趁重未係好黑，各散東西，四圍睇下。舊城好細，行行下，又見番，一齊坐低飲啤酒吹水，吹到夠鐘去食飯。睇餐牌價錢，都算係高級餐廳，門口街邊擺咗摺櫈餐枱，似足香港環頭環尾茶餐廳。坐喺街邊摺櫈，用西班牙話點菜，夠晒高級。愈夜愈多人，成條街坐滿人，衣香嬪影，原來係夜浦旺區。再夜啲，重有現場獻唱。唔好以為大牌檔，好高級哩。最後一餐成團人一齊食嘅晩餐，就喺街邊搞掂。

食飽飽，搭的士返酒店，咁又一日。