中美洲單車三國遊 （3） 2012.10.30 一年四季行好運，八方財寳進家門

中美洲單車三國遊 （3） 一年四季行好運，八方財寳進家門

文章日期：10/31/2012 09:54 pm

Corena 火山湖

中美洲單車三國遊 （3）

2012.10.30 一年四季行好運，八方財寳進家門

唔覺有時差，七點前已經瞓醒，好快Felix已預備好早餐，三文治，有塊肉仔，番茄加三文治醬。相對起佢哋嘅收入，物價梗係貴，又收唔得你多錢，點買好嘢畀你食。我畀US 10蚊過Felix仔，叫佢買啲蛋、腸仔，乜都好，一齊食。重有三日嘅餐要喺呢度食，食好啲，冇壞。

一路食旱餐，一路傾偈，傾到過晒鐘。即刻返學，遲咗半嗰鐘，Maria已經坐喺樹蔭下等緊我，我話disculpe，不過都要畀多十分鐘我。入線skype番屋企。

噚日第一堂做咗個小測驗，先生知我係水皮友，繼續西文初階，愈學愈多，睇嚟吃不消，左耳入，冇耳出，記極都記唔到，算喇，愉快學習喇。放中午前，Maria話，今日出外，佢講目的地，會面時間、地點。因為出外，所以我要100％明晒至得。講咗好耐，問完又問，佢應該覺得我好煩。

今日好熱，正午喺條街行，出晒汗，好彩已經係乾季，否則一定由頭濕到落尾。返到屋企，飯餸已經預備好，點半要集合，怱怱忙忙，食完就走。

同Maria行出大街，經過街市，去到巴士站。話時話，出外，好少搭公共巴士，回想起，只有喺以色列搭過。因為係總站，我哋上到車，都有好多位坐。有一個爸媽帶住幾歲小朋友嘅家庭上車，男人捧住一個呎幾Ｘ兩呎嘅方型生日蛋糕，放喺大硬咭紙上，冇盒、乜都冇。好彩上得早，重有位坐，我見咁得意，要求影相，佢居然抬高畀我影，影完靚相，大家都開心，不過諗番起，佢舉高，並且斜向我差不多90度，目的係想我影到蛋糕面上畫嘅紅色車。好彩蛋糕冇跣落嚟，唔係就唔知點算，祝佢生日快樂喇！

期間，小販攞住食物上車兜賣。有一串串嘅糖，有五顏六色，用小透明膠袋裝住嘅「果」汁，有大透明膠袋裝住嘅花生糖，客人要幾多，唔該自己伸手入去攞，客人隻手有幾乾淨，睇運氣喇。小販車輪轉，上完一個又一個，目不暇給，可能天氣熱，好多人買果汁。

有人嚟賣車飛，我冇peso，Maria幫我畀埋。 Cuento cuesta el boleto？我問，原來呢程車要14 peso。

上吓上吓，好快就滿。車駛出街市，沿途都有上有落。冇耐駛出市區，進入郊區，路程唔應該太遠，但係站站停，上上落落 ，用咗成個鐘頭至去到。目的地叫係Corena，落咗車再向山上行，都係好好行嘅車路。沿途有好多賣手信、工藝品、小盆裁等等嘅攤檔，咁即係遊客區喇。十零分鐘到達收費閘口，再向前行一分鐘。原來呢度係高點，前面山下，就係一個圓碌碌嘅火山湖，再前面就係望唔見邊嘅太平洋，真係好靚。Maria可能睇到厭晒，放我一個人四圍行。雖然話係旅遊區，遊客都係小貓三四隻，睇唔到有國外遊客。

風景係靚，不過都好單調，就算講解都唔明得幾多。打幾個匝，坐一陣，搭巴士番Granada。

實在咁樣學語文，應該係好生動、好有效。不過我太渣，一路上，Maria同我講：呢隻係牛，呢度好多狗、呢棵係椰子樹、花有紅有黃…。前面細路女喺度笑，擰轉頭望吓，乜有個白痴阿伯坐喺度？

沿路落山，車內播住南美勁爆垃丁樂曲。行過小镇，路好窄，前面有一隊人迎面行嚟，似巡行，隊頭有黑色物體帶引。近啲，啊！係棺木，幾個人用膊頭抬住，親友跟喺後面，原來係送葬隊伍。司機即刻熄咗音樂，算係致個最後敬禮。行列過後，扭大音量，繼續跳舞。That is life，嘩！好有哲理喔！

又一個鐘，返回Granada，穿過街市後，同Maria講Hasta la ocho la manana之後，各行各路，分頭返歸。

話分兩頭，如果冇佢帶住我，一個人，我點敢搭呢啲巴士，重去到咁僻！呢一程，OK嘅！

五點幾到屋企，約理兩兄弟去食comida de chino，有間叫中國年嘅唐餐館，由屋企去，只係行5分鐘。尼瓜拉瓜，唔係輕易可以話出街食飯，餐館前有檔口，做埋take away，賣啲我未見過嘅唐餐。坐低，我話，一人叫一個餐，再一齊食。最後叫咗春卷、炒飯、咕嚕肉，大家食得好開心。水準？比我預期好，有袋鼠國food court水準。

餐館內又有對聯，又有山水畫。我即刻演嘢，教佢哋睇對聯。佢哋好有興趣，梗係，大開眼界吖嘛。叫佢兩兄弟，揾日，考吓啲伙記，寫包單，冇人識！

找數，承惠300幾peso，只係18蚊美金。臨走，問伙記，原來成間餐館冇個中國人。咁，考起埋老細。呢次威水喇，全個Granada，只有佢兩兄弟識呢副對聯。