文章日期：10/29/2012 07:36 pm
月光都出嚟，休斯頓機場飛尼加拉瓜首都，馬拿瓜Managua
中美洲單車三國遊 （1）
2012.10.28 好長好長嘅一日
上個禮拜心情緊張，食又食唔好瞓又瞓唔好，今朝鬧鐘鬧，即係話，要嚟嘅終於要嚟，籌備幾個月嘅嘢，今日將佢付諸實踐。
大小姐唔返工都陪我去機場，真係有我心。阿珊睇嚟有啲緊張，可能受我嘅感染。梗係再三多謝佢，永遠都係咁支持我，連我做埋啲儍嘢都係咁，冇得好講喇！食個機場麥記早餐，揮手入閘，又要廿幾日至再見，好彩有網絡，日日傾都得。
今日嘅目的地係中美嘅尼加拉瓜，因為冇機由雪梨直飛，路途都好轉折。先由雪梨飛洛杉磯，再轉休斯頓，至可到達尼加拉瓜。
喺雪梨chesk in時至知，原來LA機場，行李都要再攞番，不過喺出閘前，又要放番入輸送帶，此後，行李就一直到目的地。個人就要再做安撿，重新入閘。LA機場有副透視機，可以照穿你啲衫褲，好似畀人剝光豬。不過，你可以選擇唔照，咁就要畀人全身摸勻。睇嚟，啲人又唔太反感，唔係咁，又可以點！洛杉磯係，係我第一步踏足美國土地嘅地方，畀埋你睇又點話。LA機場，free WIFI，Skype畀阿珊！
雪梨去LA呢一程，。星期日2點出發，一路跨過太平洋，飛過火奴魯魯上空，飛咗13個半鐘，時光倒流，變番星期日中午。蔡灡經常出門，有人問佢點樣克服時差，佢話，一上機就校當地時間，跟住呢個時間作息，我都係咁做，好work！
LA機場好忙碌，我以為有兩個鐘做轉機，乜都夠喇，點知都係啱啱好，去到閘口，買咗支可樂同薯條，食咗一半，就要上機，啱啱炸好嘅薯條，變成垃圾，太浪費。
休斯頓係南都墨西哥灣稍北嘅城市，由天空睇落去，飛咗好長時間，就係見到平到不得了咁平嘅大大….大平原。河流喺地面上彎彎曲曲，咁大幅肥沃土地，可以種幾多嘢！養活幾多人！美國佬，上天太偏心你喇。比起LA，休斯頓機場新得多。呢嗰機場原來係中南美洲嘅重要接駁站。我喺呢度，只得唔半個鐘嘅時間轉機，上機前已問清楚。一落機，就有工作人員，揸住份花名冊，邊個好趕嘅，佢都即刻執到你，指你清楚方向。我急步行，後面有電動車仔追上，送我一程，我行都唔駛行。LA機場亦係一機，如果趕機要排隊就一定死得，所以開放特別通道，畀呢班友打尖。睇起嚟紛紛擾擾，實質亂中有序，唔錯嘅印象。
電力小車載咗去登機口，辦好手續，遊目四昅，冇乜動靜。問，去厠所得唔得？「得！」搞掂返嚟，都係咁款，我諗，坐低睇吓上唔上到網都好。一坐低，櫃枱小姐話，做乜唔入閘！！原來入得，過機橋，一上機，原來成架機嘅人喺晒度，我係最後一個上機嘅，好彩冇話阻遲。
飛機駛出跑道等指示，我見到跑道盡頭地平線上咸蛋黃嘅落曰。飛機喺跑道上奔馳，日已落盡，地平線上只留下一抹艷紅。再向北望，原來月光已升到半天。到飛機飛上雲上，大地已漆黑一片。由日光日白到烏卒卒，十零分鐘搞掂晒。
三個鐘就到達尼加拉瓜首都，馬拿瓜Managua機場。我以為落後國家，冇乜期望。點知出我意表。清潔整齊，指示清楚，關員全部後生仔女，有啲女仔又細細粒粒，唔知夠唔夠秤。工作態度ok喎。我哋袋鼠人，可以唔駛預先簽証，攞住護照直踩入嚟，畀10蚊美金攞張遊客咭Tourist Card，佢有權畀到90日你。不過，唔係個個國家都得嘅！
報關、scan行李，好快搞掂，好好印象喎！
出閘，一早已經預約西班牙話學校會派個叫Jamil嘅人嚟接我，未出門口，喺玻璃門外，我個名用電腦印咗出嚟A3咁大，成個人定晒。咪住，今次我問佢Como se llama? 佢話Me llama Jamil，.....Si！梗係ok啦！上佢架車，係冷氣9座位，只載我一個。
語言學校唔喺馬拿瓜，而要向南再揸50公里車程嘅Granada，係–個歷史名城。Jamil送我去到民宿屋企，呢篇嘢就係喺homestay度寫完。
好似40幾個鐘都冇瞓過覺，今朝食完飛機早餐都未乜食過嘢，都係早啲瞓，聽日再講過。
No comments:
Post a Comment