文章日期：03/06/2013 06:16 pm
星光大道
中美洲三國單車遊（22) 走馬看花洛杉磯
2012.11. 18
酒店話包早餐，原來所謂早餐，又只係超巿包裝甜到死麺包，任扭 cereal 加奶，自冲咖啡或茶。好處就係任食，咁你又食得幾多?百幾銀住三晚，唔要求得咁多，係咁意塞啲甜麵麭落肚，食得飽就算數喇。
我起身起得早，噚晚幫我登記嗰位印度阿叔收咗工，今日係個印度青年人。我問佢有乜好地方去。佢畀咗張單張我，VIP Tours ，呢間公司專搞一日、半日遊，啱晒我。有一團叫 LA grand tour，搭旅遊車四圍遊，價值79蚊。唔駛諗喇，去馬。慌死你甩底，酒店先收25蚊，再打電話幫我報名，9點鐘有車嚟酒店接。
重有兩個鐘，第一朝喺美國，出街四圍行下。一直向海方向行，條街又闊又大，行咗十幾分鐘，行唔到一個街口，見唔到一個鋪頭，踫唔到一個人，LA真係好大。咪嘞，褪番𨍭頭，向另一方向行。呢面好啲，係酒店區，重有 Burger King ，入去買咗個豬柳蛋漢堡加小型薯餅 meal，留番個漢堡做午餐。
VIP Tours 公司準時到逹酒店，載咗我去公司，先交埋54蚊餘額，就安排換車開始行程。司機兼埋導遊，一路開車，一路講解，事先聲明，最少要畀15%貼士。如果做得好，成日咁長，講咁多嘢，都係值得畀嘅。
LA果然大，如果冇車，真係好煩。旅遊車一路向海行，第一個站去 Venice Beach。未出海灘，先遊遊海灘後面嘅靚屋。主街叫大運河，Grand Canal，旁邊真係有條運河，再90度打橫伸出四條支流，做成一個四四方方嘅水城，運河邊當然起滿平房，住得起嘅，都係有米之人，當然不少大明星都係呢度嘅住客。
巴士停喺沙灘嘅後街，約好集合時間，大家分頭四圍去。跨過步行街行出沙灘，一望無際嘅沙灘，一望無際嘅太平洋，就係一個字 --- 大。有步行徑，單車徑穿過沙灘。跑步、踩車、滑板、滾軸溜冰、放狗、拍拖，男女老幼，各色其色，認真有活力。
巴士繼續開行，司機導遊不斷介紹邊個邊個大明星，住喺邊度邊度，有乜嘢趣事，講到眉飛色舞。行下行下，又話食晏。第二站去農夫巿場，當大衰退時期，政府開放巿埸，農夫可以賣自己嘅農作物以補充生計，到而家當然變成係旅遊大生意。有疏果，有肉賣，亦有Tee，帽等標準遊客貨品。更多嘅係熟食攤檔，意大利、黎巴嫩、日本、唐餐、乜都有。睇睇下，好有鵝頸街巿熟食大牌檔 feel，咁梗係乾淨好多。行個匝，只買咗一支玻璃樽裝可樂，同埋啲生果。行出空地，揾張櫈，攞出今朝 Burger King個麭，坐低，一邊矖住太陽，睇住川流不息嘅遊客，觀賞人生百態，一邊咬住 burger，十分寫意。
午餐過後，向何李活出發，駛入何李活大道，經過 Rossevelt Hotel，1929年，第一屆金像奬頒獎禮，就喺呢度舉行。前面嘅 Chinese Theater , 門口有好多明星嘅手印腳印。大街唔可以洎車太耐，約好集合時間，分頭各自精彩。時間唔多，要急步走，何李活大道最出名嘅就係鑲喺路邊，一眾表演藝術名人嘅名牌，walk of fame，遊客個個頭耷耷，揾自己鍾意嗰粒星，影番張相。係咁逐粒逐粒星咁影，都好花時間。
咁著名嘅旅遊區，鋪頭都賣何李活紀念品。Chinese Theater 門口最多人，好多扮成各種影視角式嘅人喺度揾食，例如蝙蝠俠、星球大戰人物、神奇女俠等。舉機影相，佢會問你攞錢，又係嘅，化妝化成咁，都係揾銀啫。
喺何李活大道向北望，可以睇到半山上嘅 HOLLYWOOD 地標，時間緊迫，唔會車上何李活山。睇完，返回旅遊車，咦，重未人齊，叫個團友揸機，幫我錄影，我喺星光大道上面打三個側手翻。旅行喎，放肆啲，無所謂喇。
巴士繼續行，經過唐人街，轉入 Olvera Street ，落車行一行。原來呢度係洛杉磯最早開拓嘅地方，早於1781年，已經有西班牙人喺呢度定居，。唔怪得走入呢度，到處都聽到西班牙話。有間古老屋，陳列好多古董，免費畀人參觀，古老屋外面有攤檔賣工藝、紀念品，據說古老巿集亦喺呢度。隔籬有個公園仔，有墨西哥人表演樂器，音樂一起，幾對叔嬸嬸聞曲即刻起舞，舞步優美，娛人娛己。一曲既畢，不少觀眾慷慨解囊，放低幾両，梗係銀兩，皆大歡喜。
又到回程時間，順路經過音樂中心、係全美三大之一。又經過迪士尼音樂廳，1987年為紀念和路迪士尼，佢老婆 Lilian 起咗呢個音樂中心，送畀洛杉磯人民。音樂中心外形都非常前衞。至此，所有景點，參觀完畢，司機逐個逐個客送返酒店，落車時唔好忘記要畀貼士。我好聽話，15%，即係12蚊，多謝司機導遊大佬。
返到酒店至覺肚餓，鬼唔係咩，咁耐食咗個麭咋。用 Skye 打電話叫唐餐，廣東話落單，好親切。叫咗豆腐海鮮湯、生炒骨、招牌炒飯。半個鐘多啲就有得食，方便得很。咁多嘢，食唔哂，留番炒飯聽日做早餐。
早抖。
No comments:
Post a Comment