中美洲單車三國遊 (13) 2012.11.09 La Fortuna 公路輕鬆50K

中美洲單車三國遊 (13) La Fortuna 公路輕鬆50K

文章日期：11/10/2012 10:45 am

Martin 帶隊

中美洲單車三國遊   (13)  La Fortuna  公路輕鬆50K

2012.11.09

住喺小木屋，又幾有風味，雨成晚冇停，打落屋頂嘅雨聲，正好摧眠，助我入夢，一覺瞓到天光。

噚晚黑孖孖到，冇留意酒店名，呢間叫Arenal Montechiari Hotel，我哋住嘅都喺亷價小旅館，多數係家爺仔乸生意。

今日領隊畀個選擇大家，一係，正正常常繼續踩車，一係，自由活動。如果揀後者，佢會幫手安排。呢度係湖區，可以喺Laguna Arenal湖玩水上活動，如獨木舟或遊船河。呢度又係火山區，可以遠足去Arenal火山。又因為係火山，所以有温泉浸。我嚟呢個團就係踩車，好易揀。

早餐後出發。吓！原來得三個人踩車，其餘六個人，就去浸温泉。今次大陣仗喇，三條友踩車，領隊、阿Mau、重有司機揸住巴士，一齊出發，夠晒suport喇。

噚日，由頭濕到落腳，用條晾衫繩，將洗過嘅濕嘢擺正喺冷氣底，吹咗成晚，居然乾得唔錯，連對鞋都幾ok。噚日成套衫褲鞋襪，今日著番晒。

由酒店開始，經過市中心區，沿住車路踩。雨繼續咁落，唔駛幾耐，全身又濕晒。今日實在係踩公路，連續踩過好幾個鎮。因為係鎮與鎮之間嘅主要公路，雖然唔似大城咁繁忙，路面不時都有車來來往往，踩車都要好小心。比起噚日湖邊嘅路，呢段路就平坦得多。偶然都有上落斜，亦有長命斜，但係經噚日一役，今日呢啲都係小兒科，濕濕碎喇。

成段路好好踩，速度又夠，只停過兩三次。今次威水喇，兩條友要我帶頭，點解？貪我夠慢，佢哋今日想輕鬆吓喎。

十點幾已經去到今日嘅目的地，全程只用咗2小時10分，就踩咗50km，十分滿意。揾間coffee shop坐低透吓，順便食埋午餐。呢間餐廳就喺小河邊，有好多約兩呎長嘅蜥蜴，有啲喺石頭，有啲爬到樹上，伏喺度郁都唔郁，好多日都冇太陽，呢班冷血動物一定有得震冇得瞓嘞。

餐廳自己又經營禮品店、順手睇吓，大小姐提過我，如果有廉價飾物，不妨買啲。行吓睇吓，果然畀我睇中啲手鈪仔，又唔係貴，買咗佢，考吓我啲眼光啱唔啱佢心水。

食過三文治，飲過咖啡。阿Mau一早已將單車放上車頂，我哋拍拍屁股就坐上車，有人打點一切，真好。

返到小屋，又係洗洗晾晾，預備聽日著。下晝冇節目，又係整吓相，上吓網，睇吓報紙咁喇。呀！重可以Skype叫阿珊起身喎！

一條友行出市中心兜個匝，冇乜睇頭，返歸喇。明天離開La Fortuna，繼續南進。