中美洲單車三國遊 （2）2012.10.29 Granada 開始活動

中美洲單車三國遊 （2）

文章日期：10/31/2012 12:01 am

黃色屋仔就係 homestay 

中美洲單車三國遊 （2）

2012.10.29 Granada開始活動

As smooth as silk，講起呢個起程日，即刻諗到呢句說話。一切就如計劃進行，非常暢順。有一件事，一定要多謝大小姐。話說，要確定尼加拉瓜要否簽証，一路都揾唔到官方指示，所以成日硬係唔多安樂，猛咁谷哥。喺揾資料途中，經常見到兩組詞：VWP同esta，因為覺得唔関我事，又唔知係乜，所以冇理到。直至26號，出發前兩日，同大小姐無意中講起，至知可以好麻煩。一路以來，我以為袋鼠人去美國唔駛簽証，即係話乜都唔駛做，原來係錯嘅，互免簽証就係VWP，但係都要喺網上攞批準，即所謂esta （electronic system for travel authorisation），大小姐本來已經瞓咗覺，即刻起身幫我上網，幾分鐘後即批（好彩咋，可以幾日後至批都得）！如果去到機場至知，咁就上唔到機喇。  

講番噚晚Jamil喺機場接我去Homestay屋企。未入屋，就聽到狗吠，大佬，我最怕狗，已經即刻問He bites？佢又一定話，唔駛驚，佢叫Bago，好乖。我梗係扮作鎮定，一入屋，呢條狗由頭聞到落尾，第一個壞印象嘞。睇吓間房，淨得兩鋪床，一把風扇，好彩，都有冷氣機。乾淨？條咁意喇，都冇乜味嘅，厠所重係要喺出面。死嘞，心諗，半夜三更要去Bano，黑孖孖，見到Bago，後果會係點？唉！已經10點，又攰，瞓咗今晚聽日至算啦。

Homestay係學校同我揾嘅，女主人出咗門，佢大仔都成30勾喇，主要照顧我嘅係細仔，19歲嘅Felix。佢中學畢咗業，冇嘢做，又可以講英文，係一支好好嘅盲公竹。

Felix今朝叫我起身，整早餐畀我，又陪我返學，下午我自己由學校行番屋企，cinco（5） munutos搞掂。今晚，又約埋佢兩兄弟陪我出街食飯。雖然屋企環境唔多理想。有個人，可以同你溝通得到，更加緊要。

第一日返學。學校係居民區一條街上嘅普通屋，都唔太細，間成幾個小區，放咗書枱，就可以教喇，有嗰後院，擺咗枱櫈，我就喺樹底下上堂，幾有風味。重溫番簡單嘢，如數字、星期、月份，又有複雜到冇人識嘅文法。睇嚟，我唔會畀自己太多期望，因為呢一秒教咗，下一秒即忘。最緊要唔好激到先生嘔幾啖血就得喇。

先生叫Maria Lydia，有個8歲嘅女。中南美嘅人，好多黑古勒倔，佢幾歲，好難由容貌上估到。慘在佢唔識講英文，雞同鴨講場面成日發生，佢手舞足蹈，講到跑跳 ，又要扮跑扮跳。有時做極都no siento，真難搞。早上上堂，由8點至12點。正午因為大熱，所以冇乜活動。Maria就安排咗下午4點去睇博物館，一對一，西文對白，你估我明白得幾多！

12點落堂，行返屋企食飯。屋色都係太熱，不宜久留。不如返學校。喺學校又凉啲，又快速上網，都係好relax嘅。冇耐，Maria嚟，同我一齊去博物館，由學校行去，大約十零分鐘路程，Mi Muso，幾展覽咗BC2000年前，住民嘅生活點滴。解說西英對照，根本唔駛西文老師，重以為會藉excursion嚟學習西文，點知佢又唔多講，唯有我問，我嘅西文係有限公司，佢又聽唔明，到佢講，我又唔明。溝通有極大困難。

係咁意行個匝，又同佢講adios. Hasta manana. 不過冇話冇用嘅，因為 Mi Museo嘅所在，正正就係成個Granada嘅中心，乜都係晒度，I will be bck。

尼加拉瓜一年只有兩季，就係乾季同濕季，成年都熱到飛起，一般中午30度走唔甩，40度都經常發生，而家係乾季，當然舒服啲喇。

10月尾，5點左右太陽就落山，6點零，月光就出喇，今日幾時？重係個滿月！我同felix兩兄弟出街食飯，叫佢揀餐館，佢話食pizza，據說係意大利人開嘅。叫咗個特大兩種唔同餸嘅，連埋飲嘢，承惠320 peso，用1對24計，14蚊us連理貼士，皆大歡喜。成餐飯，西文英文大滙串，總之有講有食就開心喇。

食完晚餐行番屋企，家家户户都坐出門口乘涼，佢兩兄弟個個都識，周街打招呼，好懷舊哩！

返到屋企Bago照例又撲出嚟，我而家重會摸吓佢，都friend friend哋嘅。話時話，我都幾易適應，住咗一晚，好似乜都慣晒咁，搬乜嘢吖…搬…，一於住到星期六。