嚤囉仔歎世界之旅（六） 2016.10.04 Kumamoto to Hiroshima

2016.10.04

嚤囉仔歎世界之旅（六）

Kumamoto to Hiroshima

客棧交房時間係12點，朝早仲有幾粒鐘畀我去玩。熊本古城又封咗，市中心區，我前日用咗半日時間已經行完。今日節目係：由熊本站搭電車去到尾站 ⋯⋯ 健軍町。前日我初嚟埗到，見到電車寫住健軍町綫，離遠睇，仲以為有電車專誠接待我！因為同我個名差不多，記得小學時，有個同學講笑，稱呼我做「健軍」兄，我好有親切感，今朝就要親身去會你一會。

一早落樓，電車站就喺樓下不遠，車站前整整齊齊排咗一條好長嘅隊，都似係返工嘅人。開嚟熊本站嘅電車都好空，等到第二架電車我已經上到。過咗市中心區，約十個站左右，電車又空空如也，再搭15分鐘左右就到尾站 ⋯⋯ 健軍町。呢度其實只係一個普通嘅住宅區，今朝，我志在晨運四圍行，冇乜特別景點要睇，落電車後，打算用半粒鐘行去熊本動物園。

由健軍町站南行就穿過步行街，呢條步行街中間段封咗，原來地震時，步行街一段上蓋結構倒榻，而家正進行維修工程。兩三日嚟，我喺熊本行嚟行去，呢度係第一次喺市區見到嘅地震災場。時間仲係早，住宅區仲未瞓醒，街上行人稀少，我一路沿電車綫西行回程方向行。住宅區，少見高樓大夏，路邊都係兩層高獨立平房，當然唔似袋鼠國住得咁闊落，但係小小前後園，屋前旁邊有個小小泊車位，都係幾標準嘅設備。就好似蠟筆小新卡通裏面嘅場景，我而家就身處其中喇。

行咗二十分鐘，大路南面橫街，就見到熊本動物園嘅入口門拱，再行三分鐘就係動物園正門。真係門堪籮雀，乜人都冇。因為地震，唔知係唔係尐動物搬咗去第二度暫住，抑或係地震真係造成損害。總之，動物園就關閉喇。其實我都冇時間入去睇，不過，熊本市咁多旅遊點關閉，當然係對城市嘅沉重打擊喇。

由內街行返出電車路，喺市中心區外圍河邊落車，行下條橋，再行入步行街北面入口，用急行步速，行晒成條步行街。

講開又講，成日有人問：「點解你一個人去旅行」？問完又問，問完又再問！各位，就睇今朝行程：行咁多路去動物園，又唔係去睇動物！然後又好似操兵咁去行步行街，尐舖頭連眼尾都唔𥄫下！咁樣旅行，邊個頂得我順？都係一條冷，我行我素好過。大家以後唔好再問嘞，OK！

步行街南面出口搭電車，返到客棧，都只係十點幾！你話嘞，早起身，幾好哩！趁仲有些少時間，再落樓下食個吉野家。原來吉野家剩係賣飯，我本來想食碗麪，算喇，嚟個波蛋肉片飯。食得咁急，其實個肚仔都唔係好舒服，個餐食咗一半，埋單走頭，返客棧執嘢交房不在話下。

計我話，熊本市係可以玩長尐時間，以熊本為中心，慢慢玩，加埋用 JR 日鐵去埋周邊地區，一個禮拜，絕對冇問題。

喺火車站 Seven 買份 250 円嘅三文治，再坐入鐵路餐廳叫件餅，歎杯啡，就等時間過。

雖然，JR 日鐵，同新幹綫係兩個系統，但係大站，多數就喺隔籬，熊本站呢度就係入咗 JR ，再過新幹綫，有時，就要出咗JR 站，再入新幹綫，不過都係喺隔籬而已。就算我用 pass 訂飛，都係同一個售票處。JR 轉新幹綫，絶對方便。

由熊本去廣島，就要搭去新大板方向嘅車，廣島就係中途站。我拉住行李喼上車，搵到座位就坐定定。喺網上討論區睇過尐論帖，話日本火車唔夠地方放行李。其實係要睇下你搭緊乜嘢車，冇錯，有尐日鐵好窄，放行李係有問題，咁就要放喺隔籬位，如果滿座，就要放喺車頭車尾嘅空間。好彩我買嘅係 green pass ，經常有空位，行李就未試過離身。不過如果搭新幹綫，個人嘅座位已經足夠擺埋行李喼，所以放行李，從來唔係問題。

子彈火車開車時，會播一段音樂。當音樂響起，月台上嘅鐵路員工，都向住火車稍微躬身低頭靜立，就算清潔阿叔，都攞住掃把、垃圾鏟站立，直至火車完全離站為止。佢哋態度恭僅，真係好感動。你要人家尊重你，必先由自身做起，你敬業樂業，先至可以贏得人家嘅尊重。呢一點，世界上搵唔到有邊個民族可以匹敵大和。

新幹綫子彈火車，只需個零鐘，shiiiiiiirt 一聲就到。

已經喺曰本第五日第四個城市，我做足功課，又夠晒經驗，出站後即刻搵電車站，同站頭職員講明我要去邊個站。你問得明確，佢就答得準確。毫不含糊，跳上一號電車，就喺 Dobashi 站落車，承惠 160 円！廣島嘅電車系統相當好，相比於長崎、熊本，廣島電車新得多，感覺內隴亦大好多，光猛舒適。路綫又有九條咁多，市中心區，幾乎所有範圍都覆蓋到，所以又有街車 street car 之名，取其方便之意。

由電車站行去客棧，亦係十分鐘內嘅路程。客棧喺橫街，毫不顯眼，附近多數係四五層高樓嘅住宅區，上面民居，下面舖位個嗰隻。對面有間舖頭，普普通通，以為係士多、小型超市之類，行入去，完來係五金鋪？乜得嚟五金鋪都咁乾淨！我住嘅係民宿式客棧，兩個冧巴，五層高樓宇，樓下一邊係櫃位、客㕔，另一邊係廚房餐廳。入住登記時都見到尐講英文嘅歐洲客， 此後田雞過河，再踫唔返佢哋嘞。

今次我訂呢間房比較特別，係和式。即係入房小走廊過咗浴厠後，就係一個鋪咗榻榻米嘅空間，旁邊趟門牆櫃，擺咗備用牀上用品。中間墊褥上面已經預備好枕頭被鋪，近窗處就係雪櫃水煲等日用電器，五臓俱存，都算係一個舒服居所。

一如既往：搞妥手續，擺好家當，執齊用品，認清位置， 咁就出街喇。

嚟廣島，就係因為原爆。由客棧去原爆紀念公園建築群只係四個電車站（後來睇返地圖至知，由客棧後面行去公園亦係可以）。由電車上面已經見到一座甩皮甩骨嘅圓頂建築物，矗立喺巿中心，唔使講，呢度就係和平紀念公園。

電車站名 Genbaku Dome-mae ，就係「原爆拱前站」。落車後過咗馬路就係公園入口，廣島係第一粒原子彈掟落嘅地方，名氣當然大。公園內，到處都係一個個團，圍住參觀點聽講解。今日，更多嘅係一團團學生，佢哋由老師帶住嚟上一課國民歷史教育。

我就避開人群，由公園門口開始睇入去。經過門口石碑，步入公園，原爆拱就喺河邊左手面。
原爆拱原本建築係 1915年4月落成，由捷克建築師設計，咁靚嘅建築物當時係用作廣島縣物產推廣展覽館。

唔似長崎，做咗小倉替死鬼，廣島係首選第一大目標，毫無懸念，注定要受呢一劫。1945年9月6日上午8點15分，美軍 B29轟炸機帶住瘦仔彈 little boy ，差唔多喺正呢度上空（只離 hypo centre 160 公尺）600公尺處爆炸，原子彈嘅熱力將所及範圍嘅人即時燒死。跟住嘅原子風暴，一般會將所有建築物夷成廢墟，好彩（？），因為原爆拱呢度爆心喺正上空，垂直嘅風暴令建築樑柱得以支撐成個建築物不至倒塌，咁，大概原貌則可以保存至今，作為原爆災難嘅重要見證。

相比長崎，呢度嘅和平公園大得多，亦更具規模。我行過原爆拱，沿石橋過對岸，就係舉世聞名嘅和平之鐘 Bell of peace，其實係個好似一般佛寺前嘅大吊鐘，吊鐘放喺一個小亭內。每年原爆紀念日，都有撞鐘儀式，祈求和平，而撞鐘過程必然廣播世界，所以我話佢係舉世聞名嘅鐘。鐘亭前有個石碑，碑文係咁講：

Bell of Peace
we dedicate this bell
As a symbol of Hiroshima Aspiration:
Let all nuclear arms and wars be gone, and the nations live in true peace!
May it ring to all corners of the earth to meet the ear of every man,
for in it throb and palpitate the heart of its peace-loving donors.
So May you, too, friends, step forward, and toll this bell for peace !
Dedicated September 20th, 1964
By Hiroshima Higan - No - Kai.

我聽晒佢話，走上前撞響和平之鐘。噹⋯⋯，和平之聲劃破長空。

因為實在死得人多，和平公園內，周圍擺咗屬於唔同團體死難者嘅石碑：有工人、學生、志願人員等等。逐一睇晒，都要花唔少時間。

其中有一個係韓人死難者之碑。據碑文講：戰前有大約十萬韓國人喺廣島，佢哋有學生、有平民，又有韓藉日軍。原爆時，二十萬人即時喪命嘅死難者當中，原來十份一（二萬）係韓國人，廣島政府一路都冇正視呢一點。直至 1970 年，韓國人先至爭取到豎立呢個碑，以慰韓人亡靈。

和平公園正中間係和平水池，水池後方係長燃嘅和平火熖，和平祈像就守喺水池前方兩側。一團團學生喺呢度列隊，聽講解後就低頭默哀，向死者致意並祈求世界和平。

世界和平？當然係奢望！不過，追求不可得，正正係人類獨有嘅高尚情操。

我係調轉嚟行，而家行到正門前嘅主建築。佢分三部份：東樓、主樓及西面嘅廣島國際會議中心。主要展覽廳就係東樓及主樓。我買咗飛兼買埋個聲音導遊，又一次走入原爆展覽廳，回顧歷史悲劇。

原炸廣島長崎，只差三日，其實都喺英美同一計劃內，所以拆解歷史因由、預備過程、武器原理等都同長崎館分別不大。廣島、長崎展館最大不同者，就係各自用不同本地實例、個案，嚟展示原爆點樣對兩地人民造成傷害。


廣島展覽館有以下呢個故事：

一九四三年，廣島理髮師佐佐木先生屋企添咗一個千金，取名禎子 Sadako Sasaki。原爆當日，母女二人就喺爆心附近，一聲巨響，兩歲嘅禎子成個人畀巨大氣流拋咗出屋外，好彩冇撞到硬物，得以幸免於難。原爆後，落咗好多場黑雨，黑色嘅雨水，染黑大地，大家都唔知點解雨水會係黑色。農作物、河水、井水，甚至晾出去嘅衫都染成黑色。門窗，牆邊都留下一條條，長長、恐佈嘅黑色痕跡。

一九四九年，六歲 嘅禎子進入廣島市立幟町小學，佢好有運動天份，成為學校接力隊代表。

1952年開始，不知如何，廣島嘅原爆幸存者，一個又一個染上白血病。白血病就成為幸存者嘅魔咒，佢哋個個人心惶惶，唔知呢個魔咒幾時會降臨自己身上。

果然，惡運終於降臨禎子身上，1955 年，禎子診斷出有白紅病。當時有個大佢兩歲嘅初中朋友，探病時話佢知，日本有個傳說：如果摺咗一千隻紙鶴（千羽鶴 Senbazuru），祈求就可成真。禎子雖然只得十二歲，掙扎求生，乃人之本能，橫掂喺醫院都冇乜嘢可以做，佢就開始摺紙鶴 orizuru。各位，紙，當時唔係容易得到嘅嘢，禎子到處張羅紙張，甚至醫院其他病人用過嘅藥單，都係禎子摺鶴嘅材料，乜嘢紙都用，所以摺咗好多唔同大細、顏色嘅紙鶴。據原爆紀念館嘅資料顯示，佢真係完成咗千羽鶴，但到底天命難遺，1955 年10月25日，禎子病逝廣鳥紅十字會醫院。

廣島人知道所有同禎子同一命運嘅人，其實就係戰爭受害者。如果能夠消滅戰爭，咁就再唔會有其他戰爭受害者喇。既然禎子同紙鶴嘅故事已經廣泛流傳，順勢就用紙鶴作為反戰、鼓吹和平嘅代表物。

雖然禎子不敵魔咒，而佢摺紙鶴，亦主要為自己疾病而祈求，未必諗到世界和平咁嘅層次。但佢嘅故事，以及發展出嚟嘅呢種精神，就長存世上嘞。

正如我上面所講：「世界和平？當然係奢望！不過，追求不可得，正正係人類獨有嘅高尚情操」。禎子同紙鶴嘅故事，就係呢份情操嘅表表者。

就喺原爆拱旁邊就係 Orizuru Tower 紙鶴樓，對街外牆有霓虹燈，由二樓到頂樓咁高，藍色底白色燈，閃住嘅就係兩三幾隻巨型紙鶴。後面嘅建築物，而家係一間外科診所，佢嘅上空就係當日嘅爆心 hypo centre。




又係帶住複雜嘅心情離開和平公園。趁天未係好黑，睇下附近仲有乜嘢睇。地圖話，和平公園北面有個城堡，究竟係乜東東？我又攞住地圖去睇睇嘞，地圖好清楚，條路亦好易行，不過愈行愈黑，過咗兩條大馬路，對面馬路喺黑暗中隱隱見到城堡嘅輪廓，我知我搵啱地方，不過都係打退堂鼓嘞。

行返出電車路，經過 Sogo。我都話我唔會行公司㗎。前面電車路底下係地下街，有商場，有鋪頭。由地下街過馬路走返出地面，電車路行入一條街就係有蓋步行街。唔使審喇，一於搵間舖頭開餐。行咗好遠都見唔到啱食嘅，又鬼咁肚餓，求其喺一間食咗個拉麪加丼飯套餐，呢餐唔多滿意。

出返大路搭電車出廣島車站，先去售票處訂後日去境港 Sakaiminato 嘅車飛，跟住就去日鐵旅遊問下資料。推門入去旅遊辦公室，一位阿姐正在當值，道明來意，點知阿姐話：聽日？你邊度都唔使去喇，而家有個颱風，正在吹緊南韓，打到七葷八素，照移動路線嚟睇，聽日會影響日本海，廣島都會喺颱風環流影響之內⋯⋯。


呢個消息真係嚇咗一跳，一來，我知廣島附近有個離島，幾值得去玩嘅，聽日打風，嗰度又要搭船，咁唔知去唔去得呢？二來仲大劑，三日後我就要搭船過日本海經南韓去海參崴，打風又有冇影響呢？

離開火車站，行落地下商場，買咗尐生果、杯麪，又帶住一頭問號，返屋企喇。

喺屋企又即刻上網睇下颱風走勢，網上話，呢個颱風都好勁揪！即刻又發電郵，向出船飛嘅倫敦辦事處攞料。倫敦而家瞓緊覺，我惟有都瞓覺，等天光至算。

聽日去邊？都話天光至算咯！

再㬛過

嚤囉仔歎世界之旅 （五） 2016.10.03 Hitoyoshi day tour

2016.10.03

嚤囉仔歎世界之旅（五）

Hitoyoshi day tour

熊本市，喺我做手術後一個月發生大地震，四月十四號最高震咗次6·2級，點知只係預震，十六號，嚟次 7 級大震，仲有百幾次餘震跟尾，造成零零星星大小不一嘅傷害。除咗五十幾個條人命外，物質嘅最大損失，似乎就係熊本古城。據專家指出，地震就係釋放板塊壓力，壓力釋放後又要再由頭累積過，咁即刻話，邊度啱啱震完，就係最安全嘅地方，所以，我住得好放心。

做咗「細胃」總幹事後，因為唔可以一次過食得太多同埋太快，我而家習慣好早起身，先食少少嘢，一個杯麪嘅份量就啱啱好，之後行到邊食到邊，每次食少少，咁樣最啱我腸胃。不過成日眼闊肚窄，食過龍係經常發生嘅事。

今朝一早，坐喺窗台上，一路望住電車駛過晨熹嘅熊本大街，一路歎日本製合味道海鮮杯麪，真係神仙般嘅生活。

一日嘅活動，又開始嘞。

喺售票處排隊攞咗去人吉市嘅車飛，直趨月台。冇耐，一列火車埋站，有幾多卡車呢？兩卡！我未搭過咁短嘅火車。仲未止，火車車身有特別圖案，似主題公園嘅觀光火車多尐。再行入車廂，嘩嘩，唔得了，原來係古老火車，車廂最中間好似一個客廳，疏化圍住對坐，仲有高身 Bar 抬，可以擺小食、飲品，最啱一群人圍埋傾偈。車廂頭尾傳統木座卡位，椅背上有一排排幼圓木條屏風，同隔籬位造成間隔，十分古色古香。呢卡車用嚟開 party ，無以尚之。

呢條咁靚火車綫叫肥薩綫。原來熊本古稱肥後國，而鹿兒島就叫薩摩國，行走兩古國之間嘅鐵路綫就係肥薩綫喇。呢條火車綫又分成兩段，我搭呢段 Isaburo - Shinpei，伊三郎－ 新平，喺 2004 年增加成為觀光綫，所以營運起嚟，就有尐特別。話雖如此，自古以嚟，呢條綫已經係服務沿途居民，所以火車有兩卡車，我坐嘅係頭等卡，一早已經劃晒位，唔可以亂坐，前面卡係散座，就係普通座位嘞，一般人日常使用呢條綫，就冇可能好似遊客咁化錢。如果人太多，好似返工返學時間，散客亦可以入嚟頭等卡，不過就唔可坐卡座，頭等車廂前後有少量靠牆座位可以坐，當然仲可以企喇。

日本公司文化以服務為先，絶唔會吝嗇人力，每卡車都有兩個乘務員，每逢火車離站，等客人坐好後，佢哋都會嚟檢查車飛。而出入車卡時，乘務員都向乘客躹躬，呢一點，相信搭過日鐵嘅人，都會有好深印象：使唔使呀，有禮貌成咁？嘿，你咪理，呢尐就係傳統嘅堅持，我好欣賞，有得睇就好睇喇，傳統？買少見少喇。

講開講，JR pass 可以買普通嘅，亦可以化多些少錢買綠色 green pass，訂飛時就可以攞到指定座，坐入 green car ，因為郁下就兩個鐘頭以上車程，咁樣可以保證有位坐；二來，green car 當然冇咁多人，旅途就比較舒服，尤其係拎住行李𠻹。

話得觀光綫，一路山水河川，炊煙良田，風景優美就梗嘅喇，呢條綫係全日本三大美景之一。諷景外，最令我感受深嘅，係嗰種寧靜，嗰種出塵。能夠和和平平喺度生生世世，一代傳一代，真係福份嚟。另外，沿途望窗行咁多公里車，我留意到路上，如果話完全搵唔到一尐垃圾，咁講可能過份咗。不過我會話：真係好難喺條路搵到垃圾，呢句話就人頭搏竽頭嘞。日本仔，點解可以咁有公德？

沿途田舍、小農村，久唔久見到喺小屋屋頂，一笪笪鋪住大幅藍色防水膠布，呢尐梗係地震造成嘅損失，睇嚟都唔算乜嘢大災害，不過，食食下飯，跌咗塊瓦片落嚟，咁啱扑親個頭都未定。天災焉可免，不過都希望熊本居民，吉人天相，大步檻過。





鐵路公司又搞搞新意思，當火車每過一個景點，靚女乘務員，就會攞住大張過咗膠嘅風景相，向乘客展示，等大家知道車外係乜嘢光景。佢又會派紀念甫士咭，乘客可以去乘務員櫃位蓋紀念印章；一陣又拎住有日子嘅肥薩線 Logo ，又畀乘客戴上钀路員工喼帽，佢仲親自幫你揸機，喺咁有特色嘅車廂內影返張紀念靚相。我？全部都做齊喇。

車廂咁忙碌，粒幾鐘，好快過，火車到達本綫總站 ⋯⋯ 人吉市。一齊到站落車嘅，全車數埋都係十幾人，再行出站各散東西，就剩返我一個企喺站前。呢度冇巴士站，睇嚟有二十座小巴作為市內巴士之用。我連自己都唔知去邊，不過都跳上小巴問一問情況，喺雞同鴨講之下，不得要領，返返入車站。咁細嘅車站都有 JR 旅遊中心，而且裏面有三位女士開緊工，大家用簡單英文，都係溝通得到嘅。我只係一日遊，人吉市內漫遊就最啱嘞，佢畀咗一份市內地圖過我，有參觀路綫及景點位置，而且佢仲寫埋漢字畀我，個市好細，絕對用腳可以搞掂。謝過體貼服務，帶住地圖出發。

而家世界旅遊主流，首選要避開強國遊客。我行出條街，唔好講強國人，基本上連人都少見。行過銀行，醒起要換尐銀両嚟使，即刻入去問人。原來唔係間間銀行可以做兌換，銀行小姐非常好，慌死我行錯路，仲帶埋我出銀行外，為我指示方向。幾個街口外嘅另一間銀行，大堂接待小姐幫我撳機攞籌，我就坐喺大堂等候。其實我好鍾意睇人哋嘅日常生活，同埋人與人之間嘅互動，坐喺大堂等候，非常享受。就表面觀察，職員客人都客客氣氣，但又不失親切，大家都顧及對方感受，氣氛和諧得很。有時我好難理解：有尐人見到日本人客客氣氣，就一口咬定「好假」、「扮嘢」、「口蜜腹劍」⋯⋯！點解無憑無據，就睇衰人！

喺呢度，兌換外幣唔係日常工作，佢哋都要搵兩個人嚟招呼我，一個女仔佢完全唔識英文，不過可能對銀行操作瞭解多尐，另一個男仔就識少少英文，佢好努力咁做翻譯。三個人大家郁手郁腳，又英文，又漢字，搞咗成半粒鐘，卒之我換咗 400 蚊美金，一定夠跟住嗰六日使嘞。

人吉市步行遊正式開始，古城嘛，就梗有傳統手工業。行入 Kajiyamachi-dori 街，離街口不遠就係麪豉醬、豉油廠，門口就好似普通一間屋，好彩都散發出一陣陣豉油香味，跟住香味放膽行入去先至去到工場。冇人會招呼你，你就自己行。家庭工業，只得一個人做緊嘢，佢喺個大醬缸前面「搞豉棍」。屋前㕔有個小小展覽室，我行入去。女主人倒茶招呼，又攞出醃菜畀我試味。有冇生意唔緊要，我感受到小鎮風情。鼓油工廠對面有間打鐵作坊 Blacksmith workshop，今時今日，呢尐小工場應該都係煉製（唔係打造）小小遊客紀念品多過實用工具。又行過家庭式魚蛋小食店，推門，掀開門簾進入，支持本土生意，買咗一串嚟食。不過⋯⋯真係唔係幾好食。

地圖話可以坐划艇遊球磨川 Kumakawa River ，不過而家係淡季，一排排好似龍舟咁嘅划艇鎖咗喺河邊，休養生息，恕不招待。咁啱又話食晏時份，就喺河邊餐廳食埋晏晝喇。坐落睇餐牌，完全唔明，唯有指住隔籬枱嗰份餐。上枱，一個人點食咁大份餐丨好彩我經常帶備三文治袋。食一半拎一半，埋單走人。

沿石橋過球磨川，就係古城遺址。古城最早建於一千年前，經幾百年不斷加建及修補，變成現時所見規模。為方便防禦，古城起喺山崗，我䠮上䠮落，撑石級、攀城牆，盡情燃燒體力，出身汗。好玩！

古城呢家嘢，其實，日本喺統一前，咪就好似世界各地一樣，各個部落互相爭奪，留強汰弱。強者由小村落變成大帝國，弱者被吞噬、同化，消弭於無形。喺咁嘅弱肉強食嘅世界，建造堡壘自保就係常態。日本各處，咁樣嘅堡壘遺跡其實不少，再加多尐尐歷史原素，加埋週邊設施，就可以成為旅遊景點。日本，加油！

晏晝繼續行理歷史館、米酒廠同埋幾間神社。神社邊小廣場有塊橫幅，好多人喺上面提字：鼓勵熊本市加油重建，我又寫「 add oil 」，唔知佢哋明唔明。

一日遊又到結束時間喇，呢個城其實好好行，如果一早預備得再好尐，仲可以歎埋溫泉至走。行喺小鎮路上同大城又真係好唔同，呢度路上見人迎面嚟，又真係會點頭打招呼喎。仲有，我回程行返火車站時，正正係學校放學時間，女學生着住海軍藍水手裝校服，真係以為返返七十年代。不過，條裙長到膝下六吋！

搭返觀光火車返熊本，都費事再搭電車出城，就喺火車站附近食埋晚餐，攞埋聽日去廣島嘅火車飛，就返客棧喇。

再噏過

嚤囉仔歎世界之旅（四）2016.10.02 Nagasaki to Kumamoto

2016.10.02

嚤囉仔嘆世界之旅（四）

Nagasaki to Kumamoto

交房時間係十點鐘，我仲可以利用呢幾個鐘再行下先。由唐人屋附近開始行，河嘅東面山坡較高處，喺一間間神社，神社下面就係密密麻麻嘅民居，唔係大廈，全部係一兩層嘅簡單平房。神社旁邊多數都有小墓園，即係話，附近居民打開門，就係一座座墳墓；每日早出晚歸，都行過一座座墓園。華人嘅陰宅陽宅，涇渭分明；大和民族，神人一家親，真好唔同嘅觀念。今朝，我亦沿住泥條陰陽神社小路，晨 （神）運一下咁話嘞。

山坡上，就喺唐人屋不遠處，有座崇福寺，牌匾、橫額、門聯等，全部用正統漢字書寫，睇得好舒服。我鍾意睇寺院、教堂，佢哋多數起喺高點，而且，又多數要行上又長又斜又直嘅石級，我視之為考驗。一口氣行上去，跨過山門檻，進入寺內。寺院文化呢家嘢，我其實唔係好識，不過畀我嘅印象，呢間寺非常漢化，由文字、神像造型，以及建築風格，都好有唐風。睇介紹，原來崇福寺係長崎最古老寺院，所以叫寺院而唔叫神社。

我同門房叔叔雞同鴨講問路，好彩可以用漢字溝通，行日本，識漢文有着數。我滾水淥腳，合什別過門房叔叔。

繼續北行完成晨運，離開小路出大路，搭返南行電車返客棧。

執齊行李搭電車出火車站，其實早一日，我已經嚟過車站問時間，今日，就喺售票處攞飛去熊本。係！係「攞」！唔使買。因為：

我預先喺澳洲買咗七日 JR Pass，只要出示 pass，行入售票處，講出你想去邊度，就攞到車飛，實在非常方便。我嘅經驗，日本非常注重服務，到處都係工作人員，好容易就搵到人問，搭日本火車，非常舒適方便，實在係旅遊日本嘅好方法。

攞到車飛後，仲有半個鐘先至開車，多數大站都有咖啡小食餐廳，等你可以舒舒服服 Hea 走呢段等車時間。車站又有好似 Seven 咁嘅便利店，我買咗尐三文治，加埋一早喺客棧預備嘅熱茶，旅途中，絕唔會餓親自己啩。

由長崎去熊本市，我要搭兩程新幹綫子彈火車，中間喺「新鳥居」站轉車。今次轉車，又唔使四圍走，就喺返相同月台等車，車票上資料齊備，對照月台水牌，應該好難會搭錯車。我好「蛇 kwea」，又天生晤怕醜，上車再問人，保證萬無一失。

子彈火車果然子彈咁快，兩個幾鐘已經到熊本車站。車站大堂中座，擺咗個巨型紅面珠 dung 嘅黑熊頭，佢係熊本市嘅吉祥獸，個個都爭住同佢影張相。

今次我訂咗 JR 日鐡熊本客棧，就喺火車站旁邊，由車站出口行50公尺就到，非常方便。

嚟日本之前，有個印象，就係日本客棧多數冇 wifi ，一係就用 land line，iPhone 就要用 wifi 轉駁喇，所以執行李時，借咗亨利個轉駁器，以備不時。呢個客棧，叫得日鐵 JR，都唔差得去邊（其實，真係我日本全程最靚客棧），佢就冇 wifi 嘞。不過，日本仔，當然體貼入微，入住登記時，喺櫃枱借一個轉駁器，咁就有 wifi 用喇。

出火車站時，已經見到電車軌，即係話熊本市四圍去，就有着落嘞。客棧接通網絡，又係 ET phone home 時間，報告行踪後，即刻攞住電車路綫圖去行街街嘞。市中心、商業街，只離火車站十個電車站內，我初嚟埗到，其實冇乜概念，四圍望，睇下街外環境。電車駛到一個露天廣場，有表演、有觀眾、有攤檔，仲使等？即刻跟隨人群落車。

離遠見到馬路邊有間鋪頭，擺滿單車。嘩，發達喇，可以租單車，咁係我首選遊覧方法。行埋睇真尐，唓！原來係單車停車場，真失望，此後，一路行，一路都睇到泊滿單車嘅車場。熊本市非常平坦，好多人以單車代步。又係嘅，既然好多人都有自己單車，遊客又唔多踩車，租車生意，好難搵食碢。係咪咁呢？

成三點都未食晏晝，走入步行街搵嘢食。我唔識日文，就只有按圖索驥。睇門囗價錢牌，感覺中，熊本呢度比長崎平，咁就放心食多尐喇。喺街口不遠，畀我搵到間餐廳仔，居然有類似港式炒麪嘅食物（就係半煎炸蛋麪，炒肉菜再淋芡汁上面嗰隻。不過此後，再見唔到類似食物），即刻叫碟野菜豬肉炒麪，仲有生啤一杯，呢碟炒麪，有港式炒麵九成相似。得喎！呢間餐廳滿分，非常滿意。I will be back！

飲飽食醉，趁天未黑，馬上起程。照地圖顯示，熊本古城就喺附近。向東北行 10 分鐘，就到古城山腳嘅市集， 市集遊人不少，似乎多數係日本人，而且係家庭樂嗰隻，攤檔賣嘅係本土特色食物、小飾物等遊客紀念品。今日唔知係乜嘢日子，市集張燈結彩，旗幡飄揚，當然唔少得嘅就係隻熊本黑熊，到處都有佢嘅蹤影。

由市集再行五分鐘上坡，就見到熊本古城。一路上，路邊都有臨時欄杆，將行人路同古城分隔開。再行上尐，就見到古城一個角樓下邊一幅牆腳已經倒冧，角樓樓底嘅砂石都露咗出嚟。

熊本古城外圍，有窄小車路環抱，而家，車路邊都用臨時塑膠圍欄團團圍住，我惟有沿外圍行一個匝，遠眺古城風彩。

熊本古城建於日本文明年間，又同豐神秀吉有關，五六百年，咁多歷史故事發生，梗係名城喇。要知詳情，大家自己谷歌可也。不過，一般人如我，只係知熊本熊  Kumamon ，呢一隻成功公關吉祥獸，同埋今年啱啱地震過。成個古城好大範圍都受地震唔同程度嘅傷害，正因為係古跡，唔可以求求其其。一磚一瓦砌返上去，都有古物專家參與，真係唔知要化幾多資源、時間至可以重開！

古城旁邊一笪大草地，今日擺咗五六行臨時搭建嘅市集式帳蓬，估計有成百個獨立㰚檔，市集前有小舞台，另一邊空地處又有小小侏羅紀公園畀細路騎恐龍。我嚟得遲，而家已經成五點，㰙檔已經收得七七八八，不過喺其中一檔前，企咗成百人，大家好有紀律，前面舉起大貓紙一齊唱歌、跳舞、叫口號，好夠氣勢，睇下橫額，好彩其中有唔少漢字，原來今日山坡上呢個臨時市集，係為支持熊本災後重建而搞嘅，咁就解釋晒我嘅疑團喇。

人哋都收檔喇，我亦跟隨人群落山，返返入步行街。講開又講，日本步行街多數喺市中心鬧市大路入一條街，通常可以貫穿成個商業中心區，好鬼長，用佢嚟做路標行街，就包唔會盪失路。我係齋行唔買嘢，甚至唔會入舖頭睇嘢，只喺開着個 tracker 計下自己行咗幾多路。

步行街非常闊落，足以應付大量人群舒舒服服行街，除咗兩邊舖頭外，中間有時又擺咗臨時攤檔。近街口處有檔賣堅果嘅，大大隻字寫住「落花生」，冇錯，就係花生嘅正名。成日聽有人話：「禮失求諸野」。「野」？我咁諗：又會唔會華夏文明發展到某一階段，原來花開兩朶，各表一枝。一支喺中土發祥地繼續演化。經過宋後成吉思汗摧殘、明後滿蒙打壓、清後歐化新文學入侵，再到上世紀中，神州巨變⋯⋯，原來近幾百年來，華夏文化不斷受衝擊，中土文人風骨有幾硬，歷史可鑑。正是花果飄零，今日嘅文化發祥地，仲剩返幾多，大家自己評價。至於東瀛呢一枝，我唔瞭解，不過見微知著，日本衙門有「厚生省」，政府人員有「知事」⋯⋯ 。再睇返而家特區，以及中土人民政府官方發言、用語，嗰種低俗粗鄙；港方有「降低食物中鹽和糖委員會」、中方有「人流辦」⋯⋯！孰優孰劣，看官自評可也。據說胡錦濤去日本，有日本細路唸咗一首李白靜夜思，居然同我哋熟知版本有出入，有考據，原來我哋讀咗咁多年嘅，係篡改版本，原版正本，喺日本，保留至今！「禮失求諸野」？邊個係「野」，都未可定斷噃！

三點幾至食過嘢，而家六點幾，又話肚餓，今日咁𩟔得，一定係行咗好多路。又去返頭先嗰間，叫咗碗豬肉湯拉麪加煎餃子餐，仲有 350 ml 生啤，夠我歎一粒鐘，靜觀人生百態。

日本呢類餐館仔，好多單身食客，佢哋尐枱櫈，都係以設計畀孤獨食客為主。食客坐低就先嚟一杯凍水，就算茶都係落冰嘅凍茶。餐廳未必有廁所，但係牆邊又會有洗手瓷盆，梘液、抹手紙齊備，餐前餐後洗洗手就係日本國民教育學返嚟。一般餐館餐牌都好簡單，唔似港式茶餐廳咁誇張。大多數食完就即走，自己攞埋張單去收銀機找數。就算稍為似樣尐嘅，唔似美國，客人埋單畀貼士，似乎都唔係習慣。不過咁講，我又冇去過尐高級嘅，我講就我所見啫。

日本人非常有禮，侍應同客人講嘢，會換咗另一個語調，令客人覺得誠懇及放心。躹住躬講「喺」就必然嘅嘞。喺日本幾日啫，搞到我都成日立正躹躬，禮多人不怪嘛。

真係又再飲飽食醉，跳返上電車，熊本站就係屋企，認真方便。

日鐵每個大站都有旅遊中心，通常就喺售票處附近。佢哋唔係開辦收錢嘅旅行團，而喺介紹旅遊地點，等客人自己搭火車遊覧。為咗就火車班次，佢哋有時開到好夜。我返屋企前就去請教日鐡旅遊大使，佢介紹我「人吉」一日遊。Hitoyoshi ？聽都未聽過。再睇下熊本城個地圖，市中心區都畀我行過晒，行下第二度都好，攞晒地圖資料，再去 seven ，買埋杯麪做聽日早餐就返歸瞓覺喇。

再噏過。

嚤囉仔歎世界之旅（三） 2016.10.01 Nagasaki tours

2016.10.01

嚤囉仔歎世界之旅（三）

Nagasaki tours.

早起係我旅行秘技，六點唔夠，已經清醒。噚晚架的士到達客棧，我已經留意到典型唐人街牌樓就喺隔籬。今朝即去會佢一會。我由頭行到落尾，唔夠一百公尺，都係尐好一般嘅唐餐館，連唐人雜貨舖都欠奉！我會唔會千里迢迢嚟到日本，食埋尐冇厘火氣嘅酸甜排骨呢？頭也不回離開唐人街。

七點左右，周圍都未瞓醒，攞住地圖漫無目的四圍行。向北行過咗條馬路，路邊有個廣場仔，我係唐人，對帶有唐文化特色嘅嘢，特別敏感，硬係覺得呢附近有陣唐人除。

走上斜路，路邊有街牌：「唐人屋敷通」！嗱，真係要信下我嘅直覺。再行上尐，見到一組唐人式金字瓦頂建築物，四圍有圍牆圍住，門又上鎖，似乎唔係開放畀外人參觀，好彩附近豎咗個簡介牌，原來⋯⋯：

十七世紀江戶時期，曰本實行鎖國政策（唔知有冇種族歧視成份），作為政府，就係要防止走私、犯罪。再者，作為佛國，亦要防止基督教傳播。為咗方便管理，1689 年就建造呢個唐人聚居區，政府起咗兩層圍牆，仲有濠溝，將唐人屋氹氹轉圍住。除唐人住民外，就算政府管理人員都唔可以進入第二圍牆之內；城內，就係一個唐人特區。⋯⋯ 都有例外嘅，妓女就可以入城嘞，又係嘅，「食色者，人之大慾」，人性嚟啫。我又諗起，香港英治時期嘅九龍城寨，又真係有尐相似噃。

鎖國呢單嘢，只會害到自己，日本仔邊有咁笨。到十九世紀中，日本放棄鎖國政策，外國人可以自由居住，唐人敷通亦開放出嚟，就只剩低而家呢組唐人屋，作為歷史印記嘞。

再回頭返去客棧附近，行行吓，都應該係早餐時間，周圍食肆亦陸續開檔，再行過大馬路，就係一條長長嘅典型日本式有蓋步行街。咦，我真係住正旺區噃。

大馬路邊，有間食店，叫 Sukiya，一個舖位咁大，廿四小時開舖，咁就唔使驚冇嘢食喇。睇餐牌，以抵食招徠，好似係類似大家樂咁嘅集團經營，睇嚟，呢度嘅連鎖店都興細細間。推門進入，搵張向街嘅高櫈坐落，冇靠背前面長枱嗰隻款。人生路不熟，先睇吓人哋點樣叫餐。睇餐牌，叫咗個鮭魚朝食，有湯有飯，薄薄嘅一塊 fillet，仲有些少醃菜，五十円有找！又真係好經濟噃。

我係嚟 Hea 嘅，加上而家，我亦唔食得快，我慢慢坐，畀自己大把時間，去觀察周圍人與人之間嘅互動。旅行，就係想近尐距離，瞭解一下寰宇中其他人，佢哋係點樣生活嘅。

孤獨旅行者最麻煩就係交通，喺長崎，交通，似乎唔係問題，長崎市內電車系統相當方便，攞住電車路線圖，市内多數景點都唔難去，每程都只係收 170 円。冇散紙？唔使擔心，司機側邊嘅收銀箱非常犀利，好似叮噹百寶袋。可以買多次使用 pass ，可以增值；可以紙幣換神砂，神砂又可以換再散尐嘅硬幣，實在非常方便。每個電車站都有站名，而且英日對照，又有漢字，仲編晒冧把，只要上車前問吓司機，以防上錯車，咁樣，搭電車四圍去，真係易過借火。日本仔，真體貼。

長崎第一必去之地，就梗係原爆遺址，我亦係因此而嚟。由客棧附近搭北行電車，十一個站就到和平紀念公園。

長崎市係一個河口城市，窄窄嘅蒲上川 Urakami - gawa 由北向南流入長崎海港。小河兩岸民居依山而建，河口冲積平原，則係市中心所在。遠喺 1570 年，長崎已經對外開放，成為一個國際商港，貿易遠至香港、東南亞，更遠至葡萄牙、西班牙⋯⋯。長崎，好早已經有定期班次開往上海，當時「上海丸」Shanghai Maru 及 「長崎丸」 Nagasaki Maru 就係世界有數嘅豪華郵輪。 對外開放嘅結果就係工業化，長崎工業領日本風騷。有謂「罪在懐壁」，叻過頭，就係罪。戰爭爆發，先進嘅長崎工業，即刻全面轉成軍用工業，製造飛機大炮供應戰時所需，長崎市孭起呢個歷史責任。

1945 年，二戰已近尾聲，歐洲戰場已經大定，日本海軍亦喺中途島戰役全軍覆沒，協約國即刻全力對付日本呢個軸心國嘅死剩種。當時有個披頭散髮嘅猶太佬，佢發現 E＝MC2 嘅威力。既然咁猛料，不如用佢嚟攪掂日本仔，如果可以早尐結束戰爭，戰區就死少好多人。美國佬喺南太平洋比堅尼島試過呢件武器，非常滿意，隨即放入一肥一瘦（ fat man and little boy）兩枚炸彈備用喇。

好嘞，日本咁大，炸邊度呢？英美兩巨頭開會，列出名單，排成優先次序，入選嘅都係工業重鎮，以打擊日軍作戰力，廣島當然榜上有名。1945 年8月6日，世界第一個原子彈 （瘦仔彈），廣島人就率先受晒（呢一筆，而家唔講住）。炸完後，日本政府仲未有清楚明確表明投降意願。不過而家又有一說，話日本仔都講明投降，不過想美國佬解釋清楚：乜嘢叫「無條件」投降先？正喺雞同鴨講之際，三日後，8月 9日，B29 轟炸機帶住「肥佬彈」飛向呢次行動目的地 ⋯⋯ 小倉 Kokura！！小倉先前已經畀美軍炸過幾輪，汽油彈嘅黑煙仲喺上空未散，機師喺小倉頭頂打咗個白鴿轉，就向總部報告，話能見度低，行動有難度。總部指示，轉南飛，次選行動目標 ⋯⋯ 長崎！

你話命運係幾咁吊詭，機師嘅一句說話，本來小倉要受嘅惡運，就畀長崎人受晒。

8月9日，上午11點零二分，肥佬拋落，空中爆出一團白光，長崎上空，好似多咗個太陽。不過，底下嘅長崎市民嚟唔及睇下發生乜嘢事，已經畀高熱即場燒死，熱力波及嘅地方，全部著火，咁唔係人間煉獄係乜嘢！佛家講「業力」（我雖然唔係佛家人，都攞嚟講下），長崎人民，未必個個係軍國主義者，其中不乏行善積德之人，但係喺「共業」下，佢哋都免不了呢趟果報。雖然避唔過共業，如果個人有其行善業力，亦可以喺惡運中得善果！咁講，係咪好矛盾，惡運又點善？卻原來，原爆共業中，當下能夠即刻死咗，已經係幾生修到嘅福份，因為後來至知，幸存者所受痛苦係一生一世，甚至禍延後代。雖然，「業力」呢種理論，說服唔到我，作為受災者安慰之詞，應該可以理解。

搭電車喺19 號站松山町落車，行過馬路，就係和平紀念公園入口。公園喺山坡上，我由中間有花圃嘅長長石梯拾級而上。和平公園係山坡上一幅好大嘅平地，公園前有一個噴水池。原爆當日受高溫燒傷嘅人，除咗痛，就係口渴，甘甜解渴嘅池水就象徵對受災者一點點慰藉。噴水池後面，沿小路旁豎立咗好多個由各國捐贈嘅現代雕塑，主題當然都係和平、反戰。再向前，就係一個大廣場，盡頭處就豎立咗公園嘅代表雕像 ⋯⋯ 「和平祈念像」，雕像有十幾廿米高，佢右手指天，指示當日空中原爆，左手伸直，掌心朝下，寓意和平。

和平公園呢幅平地，當日原來係一所監獄，呢度只係離爆心（ hypo centre）幾百米，原爆將呢度夷為平地，人與物毀於迅間。

和平公園只係原爆紀念建築群其中之一，向南行就係原爆資料館。入口設計成螺旋斜坡，牆邊標示倒數年份，寓意進入時光遂道，觀眾收拾好心情去體驗該段日子。我買飛入場。

資料館展出美國點樣預備原子彈，及轟炸經過，好詳盡，文字、圖片，連影片都有。又介紹原子彈嘅原理，當然最重要就係突出原爆造成嘅禍害。試想，本來日出而作，過住平靜嘅生活，一個唔該，家鄉迅間變煉獄，天火焚城，長崎人目睹家人子女掙扎於熊熊大火之中，嗰種痛苦，作為一個個局外人，雖然唔能夠感受萬一，仍然一路睇，一路毛骨悚然。但係，另一方面，作為一個唐人，不期然，又有另一個聲音由心裏面透出：作為日本人，呢尐災難，又係唔係幾十年嚟侵略他國嘅共同果報？我知，我咁諗係對無辜者殘忍，但真係 can't help ，呢種感受不斷浮現，唔知係咪為咗平衡，對回顧極度悲慘歷史嘅心理創傷呢？

資料館地下有個大堂，好寧靜，係畀人喺嗰度默哀，向受災者作一點點表示。大堂後面用一層一層玻璃砌到二十米咁高，頂到上透明屋頂，每一層都放咗厚厚嘅一本冊子，冊子裏面就係一個個受災人嘅名字。日本仔如何珍視自己國民嘅每條生命，於此可見。

由紀念館行落山坡，馬路邊小公園內有個黑色雲石石碑，碑座上書「原爆殉難者名奉安」，前面有矮祭壇。以石碑為中心，用石頭砌成一層又一層擴散開去嘅圓圈。好似音樂台或者講台周圍圓形觀眾席。原來石碑中心處嘅上空，正正喺原爆嘅位置（hypo centre），一個個圓圈就代表由原爆擴散開去受災嘅範圍。

我埋唔到去影相，因為一群學生正在集會。幾個學生代表企喺講台發言，學生就企喺烈日下進行儀式 ⋯⋯。頭先喺和平公園同埋原爆資料館，都見到一群群學生。怪唔知，八月九曰，原來啱啱過咗七十一年！

今日所參觀嘅地方，任何解說嘅字裏行間，都冇怪責任何人，更加唔會話：「鬼叫自己侵略人先咩」。所帶出嘅訊息喺：以往種種，隨它去吧。呢個係歷史教訓，希望以後唔好再發生，尤其係核武戰爭！

坐喺 hypo centre 之下食個三文治午餐，感觸良多。

喺爆心東北面不遠，有座天主教堂 Urakami cathedral 。上世紀初以前，日本禁其他宗教宣教，當然唔會容許建教堂，二、三十年代開放教禁，呢個教堂正係當時興建。佢只係喺爆心幾百公尺之遙，覆巢之下，豈有完卵，成座教堂即時變成廢墟。好彩教堂喺以磚結構為主，雖然倒冧，專家將教堂大門及部份樑柱，復修後放係資料館，成為展覽嘅一個部份。而家嘅教堂係之後重建，教堂亦有特別展覽室，展出受過原爆嘅原物，好似石像、祭壇用具等。

原來真係要足足一個朝早至勉強睇𦚵。攞出地圖，仲有乜嘢好睇呢？長崎係港口，咁就去海皮睇海港喇！搭返電車一直南行，就係港口。電車行行下，見到海皮有座大商場 Youme ，我即刻跳落車，直趨公司食物超市，攞住個籃，學人四圍逛。哈！畀我有斬獲。我買咗天婦羅蝦、天埽羅開邊魚，每件只係89円，再買可樂，咁就係我嘅下午茶。

經郵輪碼頭沿海邊行，畀我撞咗去長崎出晒名嘅海鮮街。呢度海邊一列舖頭，間間向海，食肆將抬櫈開出舖頭外，有太陽遮或者帳篷遮蔭，非常 yuppy，餐牌銀碼當然亦唔少嘢。我喺一列舖頭外面，坐喺碼頭石墩上，同一天空，同一海景，拎出 89円天婦羅，食我嘅特色下午茶餐，唔⋯⋯ yummy。

繼續沿海東行，係一個海濱公園，人唔多，今日星期六，偶爾亦見到家庭樂；年青父親帶住幾歲嘅仔女逛海邊，搕石頭 ⋯⋯ ，廿幾年前，我都做過尐咁嘢，情不自禁，舉機影低父子情。細路怕醜，匿埋喺老豆懷裏：「呢個阿伯做乜影我相！」佢詐嬌。

公園西北面係長崎港全境，對岸有高山，可以搭船過海搭登山吊車上高點，由對岸俯覧回望長崎港。今次，恐怕我冇時間，下次喇。

由公園行返出馬路，what？居然見到孫大炮！呢個雕塑係孫文同一對日本男女，睇下地圖，對面馬路係香港上海匯豐銀行舊址！呢座建築物夠晒懷古，地下呢層直情係舊式銀行格局，大堂中間係辦公地方，三邊畀矮櫃枱圍住。參觀地下呢一層，免費。如果想知詳情，就要買飛上樓上喇。

究竟孫文、日本男女，加匯豐銀行，三者有乜關係呢？

先前已經講，日本好早已經解除鎖國政策，長崎就係其中一個率先開放嘅港口，既然同香港、上海都有生意連繫，長崎就開咗匯豐分行。呢座建築物，係長崎嘅工商業革命重要標記，所以用咗天大力量，保存至今。因為商業需要，當時已有海底通訉電䌫，由呢度直通上海，舊匯豐銀行展覧㕔有詳細介紹。

除咗工商業互為影響外，政治形勢嘅互動亦避免唔到。孫文喺香港受教育，自認佢嘅革命思想啓蒙自香港。1895 年一個偶然機會，喺香港，因為老師康德黎醫生 Dr James Cantlie  嘅関係，孫文認識咗呢個日本長崎商人梅屋庄吉 Umeya Shokichi ，宋慶齡仲同佢嘅夫人 Toku 更加成為好友。梅屋認同孫文嘅革命理念，佢對孫文話：「你搞到一隊軍隊，我就籌錢支助你」！二樓展覽館好詳細咁介紹咗多次同孫文有關嘅獨立革命活動，有圖片、影片，仲有中英日三種語文解說。

日本自明治維新，開始拋棄自己民族糟糠之物，喺保有自己民族特色基礎之上，擁抱現代化思想，其中跌跌踫踫，經歷百年。終於成為今日現代化日本。卻原來，百年前，中原大地，亦曾經有過咁嘅機遇，亦曾跌踫無數次，可惜每次喺歧途之間，硬係要揀條最衰嘅路嚟行，民主、自由、現代化，總係失諸交臂，可望而不可即。今日身處大和之地，西望中原，天命如此，搖頭三嘆。

睇過中國革命，繼續揸住地圖四圍䠮。長崎市區小斜坡上都有好多特式小景點，有神社、教堂、古老屋、小工場、小茶室等等，就住自己嘅興趣，留幾耐，睇幾耐，悉隨專便。我再搭電車沿另一條支流北上，搵到長崎其中一個地標式建設：眼鏡橋，呢條河比較得意，行人係可以沿河堤邊小樓梯行落河邊，直接掂到河水，亦可利用河中間淺水處踏腳石跳過對岸。眼鏡河一帶亦係家庭樂嘅好去處。

沿小山坡行返出市區，又係有蓋購物街，四圍食肆，我繼續係咁意四圍行。行到食飯時候，今日又去 Sukiya 餐廳，叫份鰻魚定食，仲加支冇酒精啤酒，大家樂格局，都要收千一円，好豪喇。

食完行到天黑至返歸， what a day, 乜一日可以做咁多嘢！

再噏過。