嚤囉仔歎世界之旅（十三）2016.10.11 Vladivostok City tour

嚤囉仔歎世界之旅（十三）

2016.10.11

Vladivostok city tour

單人房小客棧，五臟俱全，交通方便。仲有一個窗望到金角灣 The Zolotoy Rog Bay，好滿意嘞。基本上，噚晚瞓得好舒服，不過，可能舊式建築，牆身較為單薄，隔籬房洗手沖涼，開水閂水，聽得一清二楚。就算鼻鼾、發開口夢，甚至極其私密嘅夢中秘密，都一一傳入耳中。幸好多數都年青力壯，唔使夜晚起九十幾次身，否則冲水聲此起彼落，咁點瞓。

噚晚做咗些少功課，設計咗今日城市遊嘅路綫。根據地圖顯示，海參崴市中心區嘅景點相當密集，而個城市根本就唔大，市內目標景點絶對可以用腳搞掂晒。

噚日唔知埞，着少咗衫，今日着住兩件薄褸，外面再加羽絨。而薄薄行山褲似乎都搞得掂，雪褲可能誇張咗尐。食過早餐，孭起背囊出街嘞。

第一個站就係中央廣場。中央廣場係海邊一幅大地，最繁忙商業大街就喺前面周圍，政府行政大樓，郵輪碼頭火車站都喺投石之遙，佢梗係城市焦點之所在喇。最點睛嘅標誌，就梗係廣場中間面向海嘅巨型雕塑 Monument to Fighters for Soviet Power。

當一個城市有價值嘅時候，就必然有人嚟霸地盤，古今中外，人類、野獸，莫不如是，海參崴亦唔例外。以前，當只係原始經濟活動，如採集海參、人參，或者入森林打獵之時，因為大把空間各自搵食，尚可保持生態平衡。到大航海時期，海參威呢個不凍港，而且係連繫歐亞大陸嘅要塞，當然就係大國必爭之地。

海參崴曾經屬於僚、金，女真。大清時，長期禁止漢人踏足海參崴，入嚟採集人參野味嘅漢人，就係禁之不絕嘅非法入境者喇。鴉片戰爭後，大清國無力守土，唔好講佔咗二百幾年嘅漢人中原土地，連關外女真自己老巢都守唔住。俄國仲唔趁佢病攞佢命，1860 年，Captain-Lieutenant Alexey K. Shefner 領導俄軍殺到，隨即將海參崴建設成為一個俄羅斯遠東城市，並且驅逐大清子民。

海參崴就算經歷日俄戰爭，都仍然喺俄羅斯嘅掌握之中。十月革命後，歐洲嗰邊推翻咗沙俄，不過遠東呢邊，白俄聯同中、美、日三國曾經佔領海參崴，同新生紅色政權對抗。隨住白俄 1919 年徹底冧檔，中美亦退出聯盟，就剩返日本仔。卒之到 1922 年十月蘇聯紅軍由 Ieronim Petrovich Uborevich (1896-1937) 帶領，重奪海參崴。中央廣場嘅雕像，講嘅就係呢段歷史。咁又解釋到，噚日提到嘅列寧像，佢手指指，指向日本係乜嘢意思嘞！

既然廣場係城市焦點所在，國家、城市有乜節日，有乜興典，呢度當然有重大角色喇。

今朝我嚟得早，周圍都係怱怱而過返工返學嘅人潮，廣場前巴士站更聚集咗大批等車嘅人。朝早嘅城市，忙碌有序，充滿生氣。我唔使返工，就好整以暇，一邊欣賞人哋忙碌，一邊慢慢擺機影相。

廣場近海邊角落有間紅頂屋仔，門口有個巨型吹氣俄羅斯套疊公仔，睇個樣應該就係遊客商店。行近睇，重門緊閉。乜仲未開門咩？不過門口寫住營業時間，而家應該開工喎。膽粗粗，推開兩重門，真係一間舖頭，對住門口有小櫃位，小姐向我打招呼，Hi  good morning！講英文，好得很。由廣場睇，舖仔係間屋仔，原來佢仲有下面兩層。呢間鋪賣好多前蘇聯嘅徽章，列寧、斯太林時代都有，非常有趣。不過我就買咗頂有海參崴市徽嘅喼帽。

行返上樓上，知道小姐佢講英文，我咁多口，即刻向佢 ⋯⋯ 查詢旅行社資料。哈哈，真係得來全不費功夫，櫃位玻璃面就擺咗好多資料，佢一一解釋，又畀旅行社嘅地址我。

事不宜遲，即刻出發。地圖話，旅行社都係喺我今日所行嘅路綫之上。

旅行社所在地係一條步行街，街中休憩空間有長櫈畀遊人歇歇腳，兩邊都係兩層高嘅建築，上居下舖，亦有食肆開喺樓上。我一早嚟行呢個條街，見到所有舖頭都閂門大吉，有尐有招牌喺門外，亦有食肆將餐牌貼喺窗上。一來係俄文，我鬼知佢寫乜；二來，因為玻璃窗太細，如果唔係專登就去睇，根本就唔知佢做乜嘢生意。加上重門緊閉，我仲以為時間尚早，舖頭仲未開門，點敢貿然推門入去。卻原來 ⋯⋯

各位，呢度尐鋪頭，就係閂埋門做生意嘅。原來呢度天氣凍，而家日間仲係五度六度，到真正冷天，早上零下廿幾三十度，完全唔出奇，所以所有舖頭都有暖氣，門口亦有兩重，用嚟保溫。食肆內都有衣架、掛衣柱畀客人除低大褸。所以，入舖頭，就要放膽推門入內。不過，好似今日咁，中午，天氣稍暖，有尐舖頭，尤其做零售嘅，失魂街客 passing trade 好緊要，佢哋就會打開門，希望吸引客人進入。不過食肆就多數唔會咁做。

頭先，我喺小窗門望入一間咖啡室，又幾似樣喎，推門入去。卒之，成個鐘，喺度他他條條歎咗杯啡，食咗件餅。咁先至暸解上述海參崴人做生意嘅故事。

咁啱，咖啡室就喺旅行社對面。飲完咖啡就過旅行社。道明來意，佢介紹咗幾個地點，我就揀咗 Russky 島炮台歷史遊。而家係旅遊淡季，只辦私人旅遊，咁樣五粒鐘，承惠7000盧布。即係100美金多尐，殺你。咁就約定聽日喺客棧大堂見。卒之搞掂埋聽日活動，咁就安心繼續市區遊。

手揸呢份地圖，標出景點。噚晚亦對照過 trip adviser，所介紹嘅熱門景點都真係大同小異，就放心跟住地圖走嘞。

海參崴其實係 Russky Bay 上一個半島嘅南端岬角 headland ，海路由四面八方嚟，最方便就係駛入金角灣登陸海參崴，再由呢度，就可以連接成個俄羅斯大陸。而家就親身體會不凍港嘅位置，幾百年嚟，令海參崴成為兵家必爭之地嘅道理。海參崴嘅發展，亦係由岬角金角灣碼頭呢邊開始。

由步行街走向岬角嘅北邊（其實都只係十零分鐘路程），就係 Amur Bay ，呢度而家發展成海濱步行長堤，中間有噴水池圓形廣場，長堤邊全部係帳篷式食肆，薯條小食、雪糕汽水。長堤盡頭仲有海洋水族館，長堤仲可以繼續向北行，不過就齋行冇舖頭喇。好快行咗個匝，由中間圓形廣場入返市區。

自古以嚟（我鐘意呢句說話，因為「古」成點？任你點噏都得），海參崴就係民族大溶爐，邊度有錢搵，做生意嘅人就會四方八面湧入。海參崴以出產林中野味及海產著名，咪以為「海參崴」呢個名係流嘅，海參就係呢度第一著名產品，咁，乜嘢人最鍾意食海參？唔使問喇，所以自古以嚟，除咗韓國、日本之外，呢度就有唔少嚟自中土嘅華人喺呢度聚居，做生意。喺步行街下一條街，就有唐人聚居區 Millionka living quarters，地圖話呢度有華人痕跡，我行嚟行去，點睇都睇唔到乜嘢痕跡。不過建築物向街嘅外牆鐵樓梯，我又覺得幾得意。

由北面經返最大最旺、又貫穿岬角南北岸嘅 Okeansky Avenue ，又走返出中央廣場，一直沿南邊海岸行，就可以穿過金角灣吊橋橋底。喺橋底行過，你就感覺到佢嘅高度，佢亦係世界數一數二高嘅吊索橋。當然喇，而家如果條橋唔夠高，點入巨型郵輪，點做生意？

過咗橋冇幾遠，一隻潛艇擺咗喺岸上，呢度就係開放式海事博物館，我話呢隻潛艇似一個紀念碑   Monument ，多過係一個展覽品。成個海邊博物館，就係用嚟紀念二戰時喺海上陣亡嘅官兵。前面有台階小廣場，燒住永恆之火 eternity flame ，後面一大列牆，上面刻住陣亡官兵嘅官階，名字。wall of  honour ， 呢尐係戰爭紀念館所必備。我地坎培拉有、美國有、英國有⋯⋯，神州？我就未見過嘞，只有「無名英雄」紀念碑。中國人，真委屈。為國而死，寫個名都咁孤寒！

其實，紀念館廣場呢度後面就係海軍總部（指揮部？），一列兩三層樓咁高嘅鐵枝重重包圍，裏面有孭住機槍巡邏嘅士兵，我硬係覺得佢哋嘅眼神銳利，盡量都唔會同佢哋有眼神接觸，影相時，動作都要慢慢嚟。

小心翼行過呢區，就係老少咸宜嘅步行休憩海濱長廊。長廊邊有會議中心。2012年，海參崴至開過 APEC 亞洲經濟峰會。普京都有出席，海參崴除咗係軍事要塞之外，亦係俄羅斯大力發展經濟嘅重要遠東海港。

呢度絕對係悠閒嘅地方，不過我仲有好多地方要行，所以用操兵嘅步幅行過。行過咗市中心區，海參崴就冇乜平地，一離開海濱區就係斜路一路上山。就好似上環西營盤，一離開電車路就上山一樣。

喺山坡邊，就有一座大平洋盤隊博物館 Pacific  Fleet museum。佢正門喺半山，但我由海邊入。到我睇到正門告示牌，至知逢星期二休館，我摸咗門釘，惟有就繼續向山上行。地圖話，高處有兩個景點，一個係觀景台。明白吖，高點，梗係睇景嘅好地方。另一個叫 funicular，乜嚟呢？唔理三七二十一，繼續上。呢一段，又特別斜，好似由高昇戲院撑上嚤囉街、文武廟咁。過咗一個細細公園仔，一間打斜咗嘅四方水泥屋仔，裏面打斜得好緊要咁停咗一架類似電車嘅物體，咁仲唔係纜車係乜嘢？原來 funicular 就係纜車。再查下資料，香港山頂纜車就係 funicular 而唔係 cable car，所以個英文名叫做  Peak Tram。

我讀書水皮真係有原因，就係樣樣求求其其。 Funicular ，其實遠喺 1972 年，香港雞時代，我已經好清楚咁接觸過呢隻字。當時中樂組阿Sir，甘仔，佢將一隻西洋歌劇咁嘅款嘅樂曲，改用中樂演奏。馬仔、阿樹同我，就拉二胡，凝芳、麗姐就係彈撥部份，雷公、仲有成日走音嘅文士，組成香港雞中樂團。我哋第一次嘅演出，好有可能就有呢隻歌： Funiculi funicular ！個名係乜意思？冇問，亦冇興趣知！二十年後，1992 年移民澳洲，有個伙記係意大利人，我成日喺舖頭一路補鞋，一路同佢一齊唱  Funiculi funicular！咁又知多尐，原來係意大利歌。乜意思？又冇問，又唔知！四十五年後，喺地圖又見返呢隻字，終於知道係乜！再摷資料，原來就算 Funiculi funicular 呢首歌，都係為意大利一條登山纜車線開通而寫。有冇興趣聽下呢隻歌？

https://youtu.be/XW0W7j04iRQ

我最鐘意坐有軌嘅車，即刻一個箭步標入車廂坐低。有位阿嬸坐喺車尾，佢對住我講嘢，我唔識俄文，但我知佢同我收錢，問佢幾錢都費事，因為都係唔識聽喇。我倒晒尐散紙出嚟畀佢攞，原來只收二十盧布。冇耐，阿嬸打個無綫電話叫開車，大䌫除除將纜車扯上山。其實纜車並非作觀光用途，而纜車車程亦約只一百米左右，就係等半山居民出入唔使咁辛苦，當然尤其係嗰尐老弱及行動不便嘅居民。

唔使五分鐘，䌫車停喺半山大路邊。離開纜車站，再迂迴向山行多十五分鐘路程，就係鷹眼高點。呢度向南望住成個金角海灣，巍峨嘅金角灣大橋就喺眼前，汽車出入大橋都要經過腳下呢條大馬路。

企喺高點憑欄遠望之餘，梗係好忙碌咁擺機影相，遊人三三兩兩咁上嚟，又三三兩兩咁落返去，今日絕對唔係多人，都係川流不息咁喇。我睇夠本亦落山，搭返纜車走人。回程唔落海邊，沿半山馬路一直行返中央廣場。

返到廣場，天色已黑，條路都係歸心似箭嘅人群，個個怱忙大踏步，呢個城市嘅節奏都好快噃。廣場邊政府大樓對面有梯級行落地下，以為係過馬路行人隧道，原來係一間地下餐廳。旣然咁就腳，今晚就試試你 ⋯⋯ 。

飲飽食醉後，漫步踱返屋企。睇下個 tracker ，原來今日行咗 26 公里路，我都真係幾行得。咦，今晚個餐如何？OK喇，咪又係咁，出街食嘢，我唔會有乜嘢奢望嘅。

咁又一日。

再噏過。

嚤囉仔歎世界之旅（十二）2016.10.10 Valdivostok

2016.10.10

嚤囉仔歎世界之旅（十二）

Vladivostok

由東海港開去海參崴，約 650 公里，只係由雪梨屋企來回坎培拉嘅距離，實在唔算遠，不過隻船就要行成 24 粒鐘，其實真係好慢喎。今日成個上晝，都係繼續行船。

噚日，終於見到俄國人加伏特加嘅場景。今朝早餐後，我又坐返上去咖啡吧，霸返同一張枱，做返差唔多嘅嘢。冇幾耐，同一班酒鬼又到。佢哋真係飲得，一早又伏特加酒，然後又重演噚日好戲。唔知係咪見慣不怪，今朝我又唔覺得有乜嘢特別喎。

正喺佢有飲，我有我寫之際，渡輪喺下午兩點駛入海參崴郵輪碼頭。慣喇，船公司依照登船次序，128 個俄人，首先登岸。爭先恐後，原來唔係深圳過關專有場景，俄人行船爭解䌫，原來都唔係省油之燈。我哋等俄人上晒，就上岸排隊過海關。

俄人唔興拖喼，個個都拎三幾個大行李袋，又有帆布袋，又有紙皮箱，又孭又拖又拉又踢，實在十分論盡。我行李過咗 X 光機後就等過移民局  ⋯⋯。到我喇，行埋櫃位，一睇，咁靚嘅移民局 Madam ，真係第一次見，佢睇電腦，掃描指模再影相，之後蓋印，全程帶住微笑，交返䕶照畀我時仲不忘咁話： Welcome to Russia ！我就回句： Nice to meet you。 咁樣進入俄羅斯，第一個印象，真係十分良好喎。

一樣喇，每次到達新地方，第一件事就要搞清自己所在地，喺谷歌地圖已經大概知道去客棧嘅路綫，我都有好充裕時間，首先走返上郵輪碼頭辦公大樓上蓋。呢度係碼頭觀景台，接船或者送船，都可以睇住親友上船落船。由呢度影返落我搭呢隻東方夢幻號，呢隻嘢，外觀又實在幾呃得下人。回望兩日航程，唔算十分滿意，但都算係經驗一場。

火車站就喺碼頭前，我沿住天橋落返地面，想話行入火車站問下四日後嘅火車資料。要入火車站大堂，全部都要過安檢。地面大堂原來係火車站最高層，我要揪住行李落到底層至去到票務窗口。雞同鴨講係我嘅預期，好彩我預備晒資料，又有俄文車飛，我相信佢明白我來意，並叫我四日後返返嚟，不過記住唔好搞錯時間。

原來俄羅斯東西部地區時間，最長相差足足七個鐘，日常生活，唔同時區都用自己時間，就係所謂 local time。但係火車時間表，全國就劃一用莫斯科時間，車飛上印住嘅時間，就係莫斯科時間，而你喺火車站見到嘅鐘所顯示嘅，亦係莫斯科時間。例如四日後我嘅火車開車時間係 0402 ，其實就係海參崴時間 1102，所以票務窗位阿姐，用俄文千叮萬囑，唔好搞錯（我估佢喺咁講），仲用鉛筆喺我車飛上寫住 1102 。公務員，都唔係個個 Hea 嘅。

搞掂咗最重要嘅嘢，就放心晒。根據計劃，我由火車站行去客棧，應該係15分鐘內嘅行程。

過咗馬路，就係著名嘅海參崴列寧像，佢趟開大褸，左手垂低，拎住除咗出嚟嘅毡毛，右手指住東面日本方向，佢話：「Comrades，you're going the right way」。乜嘢意思呢，吓？

我都幾有信心我係行啱路，不過沿途都不斷問人。我發覺英俄對話，大家喺語言方面，係唔知對方噏乜，不過整體而言又明白你想點，所以原來語言係冇意思嘅，反而手勢、表情就最可以表達意思。

好快到達客棧。我呢四日住嘅，係呢間五 ⋯⋯ 層高客棧，喺正最旺區嘅後街住宅區，交通方便到不得了。

登記後想問下櫃枱有冇旅行社介紹，佢十問九唔知，我又問有冇乜嘢著名景點可以介紹，佢個樣十分為難，我又問尐客入住呢度多數去邊度玩？今次佢終於畀到個好有用嘅答案我：佢叫我上網搵！真聰明。

我謝過佢之後就上房擺低嘢，ET phone home 一輪後，攞住用 150 盧布買嘅地圖，出發行街喇。其實冇乜目的地，只係想瞭解一下周圍環境。

客棧喺斜路最高點，我向街嘅另一邊走，斜路底係警局，咁係咪安全尐呢？轉過彎，就已經係好繁忙嘅中心區。已經五點，天未黑，條街似乎好多放工嘅人。成條馬路都係車，繁忙時間，相信一定塞車塞到飛起。中心區馬路十字路口，都有行人隧道過馬路，隧道囗有街頭樂隊，少女合唱團，個個省鏡，賞心悅目。走出路面，融入人潮。個個都衣衫整齊，道路整潔，行人忙碌而有禮有序。俄羅斯少女更加唔得了，金髮碧眼身材高佻，高踭長筒靴係潮流，皮樓冷帽披肩。嘩，邊得嚟咁多 Models 通街行，如果我話個個靚女，此話都假唔晒喇。呢度行街，真係唔會悶喎。

天好快黑，收太陽後，原來都幾凍，我著 Tee 同埋兩件薄褸，原來唔係好得，街上嘅人都著住羽絨、冷帽。我又餓又凍，走入一間餐廳，睇餐牌，俄文！問有冇英文餐牌？冇！好，預咗嘞！橫掃一輪，指住隔籬𡃁仔嗰碟麪，伸出一隻手指。OK，佢明。跟住叫飲品，我作狀飲嘢，佢醒目嘞，即刻畀個酒餐牌我。呵，有公仔，指住細啤，搞掂。遊目四顧，原來呢間叫做 Wok noodle bar，仲寫住 China Beijing 。呵呵，海參崴第一餐，居然係唐餐！睇下開放式廚房，件件鬼。咦，唐人呢？

原來我叫嘅係海鮮炒拉麪，個碟好大隻，連餸連麪大約有一個拳頭咁多。咁珍貴，我要慢慢食。

應該感恩，Touch wood 。因為做咗「細胃」總幹事，旅行前，我以為唔可以一邊飲啤一邊食嘢，so far 慢慢斟，慢慢飲，如果有得個零鐘食個餐，就算一杯 500 ml 啤，都搞得佢掂。 no complains 喇。

埋單，呢一餐，又啤又麪，又有靚女侍應，又喺正旺區，居然唔使 500 盧布！我喺客棧買張地圖，得一張紙咋，都要百五。尐物價真係古怪。

離開餐館，天都黑喇，條街仲係人多車多，原路返歸。客棧隔籬不遠有間街角士多仔，入去賣尐早餐、生果、茶包等食物。士多老闆娘唔識英文，其實，日常嘅嘢，好多時，手勢表情都可以達到溝通效果，盡力而已。呢位老闆娘仲犀利，佢叫我入去櫃位埋邊自己攞，都費事同你講咁多。真醒目。

俄國人習慣內歛，所以畀人有冷漠嘅感覺，其實，你對人有禮、誠懇，多數都有相同回報。呢個係我一日嚟嘅初步感覺。

再噏過

嚤囉仔歎世界之旅（十一）2016.10.09 Donghae （Korea ） to Vladivostok

2016.10.09

嚤囉仔歎世界之旅（十一）

Donghae ( Korea)  to Vladivostok

船艙裏面，不知天昏地暗，好彩有 iPhone ，佢好準時叫我起身。船上個喇叭又叫人去餐廳食自助早餐，做過一次蠢仔，點會做第二次。一早起身，攞住杯麪上二樓滾水機冲滾水，返房慢慢歎我呢個自助早餐。

雖然我喺船住兩日，但係不知如何，竟然要我換房。不過，既然佢應承，之後都係一個人住晒間房，換房又有乜所謂。今日嘅安排係咁嘅：早餐過後就執好行李。大部份韓國人就落船返屋企。如果有人好似我咁，繼續坐呢隻船去海參崴，就有兩個選擇：其一，可以簡單留返喺隻船上等換房；又可以將行李暫放喺接待處附近，跟手落船行下街，夠鐘就返上船。我梗係揀落船行街喇。

其實，船上除咗嗰個垃圾自助餐廳之外，二樓有個唔錯嘅咖啡吧，喺嗰度買一尐基本小食，總好過嗰尐垃圾食物。我執好行李後就拎上個咖啡吧，叫咗杯美國咖啡，就預備坐到落船喇。

朝早九點半，船就靠岸，船公司已經做好登船次序，韓國人以旅行團做單位，首先逐一登岸，我哋幾個外國人，就押到最後喇。登陸後離開碼頭，東海港原來離市中心都好遠，如果你話有返三幾個鐘，或者都可以搭的士出去睇下個城。不過而家只得嗰個零鐘，就邊度都唔好去，喺附近散下步算數喇。

仲係好早，周圍都冇乜人，我就喺附近條街兜咗一個大圈。嗰度其實都有尐食嘢嘅地方，不過全部都未開檔。除咗影咗幾張相外，就一無所得咁返返碼頭。

離開咗船嘅人，一切就要重新登記，再排過隊攞登船證，然後過海關，咁就上返船嘞。又咁講，今次離船都唔係一無所得嘅，起碼本䕶照就多咗個韓國出入境印嘞，

由今早韓國人上岸到下午俄國人上船，咁就即係渡輪種族大換血。每個民族都有唔同嘅民族性，而家進行咗大換血，船上嘅氣氛當然亦改變不少。

我上船攞咗鎖匙，換咗隔籬房 1101，自己鋪自己牀已經做過一次，今次照辦煮碗，再做一次咁啫。搞掂咗間房就走上咖啡吧。原來全船最精彩部份就喺呢度！

呢架只係渡輪，當然唔會提供乜嘢娛樂，甚至連公共空間坐嘅地方都冇乜。我發現，原來最好就係坐入個咖啡吧，咁上下買尐飲品、食物，就可以好舒服咁消磨一日，我一個人就霸咗一張窗口枱，最啱我寫埋尐遊記。

今早，韓人喺度時，因為就快上岸，唔值得化錢飲咖啡，所以餐廳十分寧靜，只有我一個人自斟自飲。到我上返船，我又坐返入咖啡吧，食個腸仔蛋做午餐，然後就開始歎咖啡，寫遊記，都係十分寧靜。中午過後，船上自助餐廳收檔。逐漸，咖啡吧就人多起嚟，起初，都係正常嘅，慢慢，咖啡吧氣氛就沸騰起嚟。

伏特加同俄羅斯人密不可分，佢哋一入嚟，每人就叫咗一份，兩吋高圓身窄杯嘅水狀物體，我唔使問，都知呢杯就係酒精濃到燒得着嘅伏特加。點飲呢，就係攞起個杯， bottom up 一次過全部倒晒落肚，睇個樣都唔係點經過個口！再要飲，又要再出櫃位畀錢，船上侍應攞住一公升大樽幫佢哋逐杯加斟。起初慢慢飲，斯斯文文有講有笑。不過咁樣飲唔過癮，逐杯畀錢亦唔化算。

此時，有尐人成樽私伙伏特加拎入嚟，逐一斟滿枱上空杯，仲自備薯片、花生。船上韓人侍應當然埋枱干涉。好彩都係一輪交涉，唔算爭執，都係斯文。酒客做好做醜，將大剌剌放喺枱面上嘅大樽伏特加酒放落側邊櫈上，咁就當解決咗問題，然後繼續不斷攞出嚟斟酒。韓人侍應都冇佢符，惟有當睇唔到算數。

飲飲下，講嘢愈嚟愈大聲，動作又愈嚟愈大，再加上酒精上腦，控制動作機能就愈嚟愈水皮，酒杯、餐具跌落地下，此起彼落。有時唔知邊個激動過頭，拍抬拍櫈大發牢騷。好彩其他未醉仲控制得住嘅人，就會撳住佢，又或者要佢坐埋一邊，搵人安慰佢嘅情緒。

佢哋有時又不甘寂寞，要企起身行下。一揸住個杯企起身，就成杯酒倒晒落地下，佢仲一臉茫然，企喺度，唔知自己做緊乜。而行嚟行去個尐，又一仆一碌，碰跌杯碟有之，自己跪低埋有之 ⋯⋯ ！

真好睇，我係唔飲酒嘅人，一生人未去過酒吧（啤酒算唔算？）。咁高密度見醉酒佬，呢次係人生第一次，算係見識見識。

公道講，佢哋就算點樣，都冇騷擾其他人，友儕亦互相照顧，避免鬧事。我就坐喺隔籬枱，除咗有時拍枱拍櫈嚇我一跳外，我繼續飲我嘅咖啡，寫我嘅遊記。醉酒佬，佢哋都算自律。

又有人會落呢個定論：俄國佬？咪係伏特加同埋醉酒佬囉。

我唔知呢個結論有幾啱，就今次，呢隻船有 128 個俄羅斯人，剛才我描述嘅場景，有份參演者只係廿人留下。一竹篙打一船人，從來唔係我嘅信念。不過又要講，呢二十個人嘅行為，就做咗一場大龍鳳喇。

又真係，就算大部份人係常人，甚至有部份係一等一好人，都千其唔好低估少數人嘅破壞力。

好抱歉，呢大部份人嘅聲譽，就會因為少部份人嘅行為而受損，咁係唔公道，不過，就係十分無奈嘅事實。

船上喇叭又叫人去食自助餐，我又預備杯麪，返房食我嘅晚餐。

冇乜好做，沖涼瞓覺喇。

再噏過

嚤囉仔歎世界之旅（十）2016.10.08 Sakaiminato to Vladivostok （via Donghae , Korea )

2016.10.08

嚤囉仔歎世界之旅（十）

Sakaiminato to Vladivostok  via Donghae ( Korea )

今日係呢個行程日本段最後一日，早上有些少雨紛紛，一丁早餐後，執好行李，天氣就一路變好，可能係因為颱風逐漸遠去啩。交低房門匙，拉住個拖喼就去巴士站，站頭係皆生溫泉區旅遊中心。離遠送咗架三號巴士車尾，惟有喺旅遊中心四圍 Hea 下，我攞住巴士時間表，問一問工作人員巴士幾時到。
佢睇下，話：「27分」
我睇鐘「而家咪 27 咯！巴士呢？」
「咪喺你背後囉！」

唔係作嘢，而係真係咁準時。搭公共交通，佢哋準時，仲有一個好處，就係有時唔識睇、或者睇唔到站頭嘅名，如果有時間表喺手，你就知道自己身處何方嘞，所以有可能嘅話，盡量上車前問站頭攞份時間表。

攬埋行李，跳上巴士，即出米子車站。我嘅七日 JR pass 前日已經到期，今日要科水買去境港站嘅車飛。行咗第三日，熟晒架步。出站後，即刻去旅遊中心寄存行李，再用 500 円租單車，今朝就專心尐行下鬼太郎之鄕。

今日星期六，遊人真係多咗，而且有一批批搭旅遊車嚟嘅遊行團。

鬼太郎，絕對係呢度嘅主角。火車站大樓向廣場嘅外牆，就係一幅好巨型嘅鬼太郎牆畫。向市集方向行，由廣場中間鬼太郎圖騰柱開始，去到成公里外嘅市集盡頭鬼太郎展覽館為止，街兩邊行人路，都擺放咗鬼太郎卡通嘅人物雕塑 Yokai statues，全部係非常精美嘅銅雕，總共有 153 個。就算連呢條街，都以鬼太郎作者水木茂為名，叫做 Mizuki Shigeru Road 水木茂通。我其實之前唔認識呢套卡通，不過好似隱約聽過鬼太郎呢個名。

我踩單車由廣場開始，慢慢踩，慢慢睇。 兩旁舖頭，好多都以鬼太郎卡通做招倈，例如糖果店叫妖果堂，饅頭舖叫妖怪饅頭 ⋯⋯，等等。亦有妖怪工房，教人點樣製作鬼太郎卡通人物，而小小卡通紀念品，好似匙扣、水杯、毛巾等等就到處都有得賣。我一直踩到去水木展覧館，仰望一代大師，瞭解一下，佢究竟係乜嘢人。

泊低座駕喺門口就入館喇，首先承惠 700 円。我走上樓上，發覺全部都係日文，就走返落樓想買個聲音導遊。門口知道我唔係本地客，首先回返三百円過我。呵，原來外國人收平尐！咁樣做，我第一次見。好彩小鎮人情，發乎心，只講直覺、常識，唔講乜嘢「政治正確」，唔係又有人去「平機會」告一告鬼太郎，話佢歧視本地人！我都話喇，最憎政治正確！再者，聲音導遊，又係免費！乜咁着數，真係多謝晒。

展館係一座兩層高建築物，以小鎮嚟講，咁嘅規模都唔算太細。樓上用咗好大篇幅去介紹水木茂本人生平，佢冇吹噓話自己幾叻幾叻，反而講咗好多自己嘅瘀嘢。好明顯，一個已經成功咗嘅人，梗係可以自嘲，瑕不掩瑜，佢嘅自信心足夠抵消生命中點點砂石。反之，一個失敗嘅人（當然，成功、失敗，絕對係個人嘅感覺，此處不論），就好介意人哋點睇佢，你話佢唔好，佢就話你睇小佢；你話佢好。佢又可以話你諷刺佢，總之有乜依郁，都上綱上線話人歧視。呢度拉開講一筆：

我初嚟澳洲時，知道鬼佬唔敢講「Chinaman」，話係 racist，我就認為 man come from China 就係 Chinaman，有乜嘢歧視！我係專抝氣嘅人，就專要講 Chinaman。個個鬼佬聽到都話：「嗱，你講咋，唔關我事！」我再問佢哋，點解講 Chinaman  係 racist ，佢哋冇個知。又有一個荒謬嘅例子，我上西班牙話堂，講到咖啡，如果齋啡，本來叫 cafe negro , 因為 negro 唔講得，所以叫 cafe solo。其實 negro 就係顏色，黑色咁解，但係政治正確起嚟，就連「black」都唔准講，真豈有此理！不如我又問，同樣係講顏色，點解「白」又唔係 racist 呢？好明顯，唔關顏色事，係黑、白背後代表嘅意義。

有人話喺鬼佬地方畀人叫 Ching 、 Chingie ，就會大打出手。咁啱，蔣家大小姐就叫 Ching ，朋友間，佢嘅花朶就係 Chingie，行不改名，坐不改姓。大小姐信心爆棚，使驚畀人歧視？一字咁淺，歧視與否，根本唔在於用乜嘢字，某實，更重要係呢個群體嘅集體表現，畀外界人一個乜嘢印象。又例如，鬼佬根本唔怕畀人叫「鬼」，就算本來係歧視，但係問心講，講起「鬼佬」，你又點會因為「鬼佬」而岐視佢哋。哈哈，咁啱，大小姐個 fiancé ，佢都叫自己做鬼仔占士，歧視你個頭！

不過掉轉講，如果人哋話「偉大光榮正確」、「強國崛起」、「強國人民」；又或者話某人「愛國」，咁又係咪讚揚呢？大家心照嘞。

又多口講多咗，講返水木茂。

據展館介紹，水木茂四歲先識講嘢。讀書唔成，考試唔好，似乎係好多漫畫家嘅不過最經典嘅係佢想考入大阪園藝學校，當時要取錄五十人，有五十一人報名，水木茂係唯一落選嘅考生。二戰時入伍參加新畿內亞戰役，做號角手，吹喇叭又走音，受傷時唔記得自己型，搞到冇咗隻左手⋯⋯。總之就係失敗人生。戰後復原，先至搵到自己原來係屬於漫話界嘅。又係一樣喇，由出公仔書開始，到變成動畫上電視，再有真人鬼太郎電影，水木茂名利雙收，更喺1991年獲頒「紫綬褒章」。境港人有咁嘅鄉里，梗係與有榮焉，封佢做全鄕偶像 ⋯⋯ blah blah blah。

個館細細哋，不過都真係好用心去經營，況且，因為水木茂嘅名氣，亦為境港帶嚟旅遊收益。心田先祖種，福地後人耕。水木先生在天之靈，都會保佑同鄉子姪順風順水嘅。

展覽館門口有隻鬼，好多人都想同佢影相，佢當然唔會托手㬹，但係整古做怪嚟嚇下人，就係佢嘅工作範圍喇。

我諗，香港都不乏咁樣嘅漫畫家，最著名就係老夫子王澤喇，點解做唔到好似水木先生咁呢？水木先生係境港土生土長，先天已經有份鄉情，如果自己人對原居地有歷史感，有歸屬感。咁樣，大家嘅念舊、人情味就油然而生，呢尐感情唔係可以「打造」出嚟。喺香港，鄉土情，喺大一統政策下，係受打壓嘅思潮。冇鄉土情，又何生人情味，何以念舊呢？好悲觀！

終於對鬼太郎有多一尐嘅理解。

踩車喺附近兜多兩兜，就直接踩出漁市場附近嘅食肆，既然係今次日本段最後一餐，咁就豪氣尐。叫咗份饅魚定食，承惠 1800 円，係我今次最貴嘅一餐，如果唔係要踩單車，我可能要杯啤酒𠻹。

送君千里，終須一別。交還單車，攞返行李，走去廣場巴士站，嗰度，每逢船期日，下午有免費穿梭巴士，接送客人由火車站呢度，去國際碼頭。我正在等緊車之際，有大旅遊車駛到，車頭玻璃有個牌「永安五天廣島團」，跟住有廿人左右落車，bee lee ba la 廣東話，哈，原來香港團都嚟，失覺晒。

穿梭巴士帶咗我去國際碼頭，咁上下，有人開檔賣杯麪小食等，又有檔口換錢。唔執輸，唔知船上會係乜嘢環境，即刻入尐杯麪零食，以備不時。再換  400 蚊美金做盧布，咁樣，一到海參崴，就即刻有錢使。

差唔多等到六點幾，候船室都係小貓三四！唔係啩，咁大隻船，得咁少乘客。忽然間候船室熱鬧起嚟，幾架旅遊車，載咗一大批人到，而且，清一色，全部韓國人。到而家我大概明白，呢間 DBS 船公司根本就係韓國公司，佢主要服務韓國旅遊公司，就係載韓國乘客來往日本。不過有多餘位，就載埋我呢尐外國人。呢一程去南韓東海港，而家唔係旺季，全船有二百幾人，外國人（非韓）只得5個，四個日本，一個袋鼠。

登船時間終於到來，攞咗登船證，就過日本海關櫃位，蓋印離境，沙唷喇嗱日本。咁好地方，梗係： I'll be back soon。

行上船橋，登上東方夢幻號渡海郵輪 Eastern Dream。船上菲籍船員為乘客逐一驗明正身後，就派船艙鎖匙，我係第一層 1103 室。打開艙門，房間冇牀，只得一個四四方方嘅空間，不過有獨立浴廁。地下放咗四套枕頭被鋪，墊褥係街市有得賣，兩吋厚，三摺海棉嗰隻，全部放晒落地，咁即係瞓地下。都唔緊要，四套枕頭被鋪係乜嘢意思，係咪有另外三個人？四個人，三唔識七咁瞓，又未免難堪尐。我係買咗頭等飛，就算經濟艙都有自己張牀，有間隔、有自己私人空間！即刻去問個究竟。正在要向接待處小姐發牢騷之際，佢一句說話就說服咗我：「呢間房，你瞓晒」！嘩，好嘢！佢又補充一句，咁樣唔係老逢，不過而家係淡季，就益下我。係咩？咁就真係多謝晒。

即刻返船艙，兩套變成一張牀，另外兩套用嚟坐，咁嘅環境，I can't complain 喇。

搞得嚟，又話食飯時間。船上用美金都得，九蚊美金買份自助餐。入到餐廳一睇，九成係辣嘢，好多泡菜。我全部唔啱食，其求搵咗尐唔辣嘅嘢，裝埋得一小碟。非常失望，食完就算數喇，下次唔再幫趁。

唔好以為自己搭緊豪華郵輪至得㗎，呢架只係渡輪，係載我過海嘅渡輪，只不過而家要過一個好大嘅海，渡輪就大尐咁話啫。

瞓喺地下就梗係感覺到摩打聲，公道講，就算豪華郵輪都有摩打聲。今晚咁大間房，又有私人浴廁，我實在太滿意。摩打聲？催眠曲至真，早唞。

再噏過

嚤囉仔歎世界之旅（九）2016.10.07 Yonago, Sakaiminato

2016.10.07

嚤囉仔歎世界之旅（九）

Yonago , Sakaiminato

我住嘅客棧其實好近海邊，初初睇谷歌地圖，以為係沙灘，可以游水。又話係溫泉區，仲以為四處地下冒晒煙 ⋯⋯。噚日略略睇過，似乎唔係咁嘅一回事，呢個海灘，唔多啱游水噃，附近，四圍都係幾層高嘅樓宇，根本就係一個普通嘅住宅區。話時話，成日出咗街，其實又冇乜時間游水啫。

今朝食過早餐後，就踩單車去街街，初步計劃係由皆生溫泉呢度，踩車直入米子市 Yonago，再睇下邊度有咖啡飲，然後再算。


呢度踩車慣上行人路，一路上，都係踩車返學嘅學生仔學生妹多，踩車返工嘅人似乎少見。由皆生溫泉客棧踩入米子市，只係五公里路程，我慢慢踩，盡量融入當地交通習慣。正在等燈過馬路，對面有三幾個人，其中一個身掛斜孭布條，手拎住大聲公，一邊噏嘢，一邊躹躬，我梗唔知佢噏乜東東喇，不過睇樣，九成係做選舉拉票宣傳。佢側邊有條直幡喺風中飄飄下，Hah，寫住乜呢 ⋯⋯ 日本⋯⋯ 共⋯⋯ 產黨！我一生人第一次，咁近距離接近日共。綠公仔着咗，我踩住車同日共份子貼身而過，之後，就愈走愈遠⋯⋯，繼續愈走愈遠 ⋯⋯。

一直踩出米子車站，連車站都冇乜人，呢度真係人丁單薄。好彩車站周圍都有幾個特別尐嘅雕塑，同佢哋影下相，都謀殺咗半粒鐘。真失望，一直沿大路踩都見唔到咖啡室，再攞出地圖，睇下跟住去邊度好。

客棧所在地皆生溫泉（北面）同米子站呢度（南面），向境港（西面）方向直出，其實係一個半島。半島嘅北面就係日本海，遠望韓國，南面就係「中海」，中海好似一個地中海，周圍都係陸地，而境港就係半島嘅盡頭，前面就係一條長形海峽，海水穿過境港海峽進出中海，調節住中海嘅生態。地圖顕示，向境港方向，沿路都有尐值得睇嘅嘢噃。好，跳上單車，向境港方向出發，

沿馬馬路邊行人路踩，唔夠幾公里，左手邊就有「湊山公園」嘅路標。我八卦，鍾意四圍睇下，踩入公園。原來公園邊係中海堤岸，有梯級形觀海斜坡，長堤可以踩車，又可以漫步。根據地圖方位額示，呢度應該係極佳位置欣賞日落。長堤後一大塊草地，就係公園中心所在，一大群小學生正在活動，似乎係進行緊隊際比賽，氣氛熱烈。草地邊三三兩兩一群群媽咪，離遠為自己乖乖打氣，感覺溫馨。忽然一陣風沙，吹到我眼矇矇 ⋯⋯ ，咦，嗰邊細路咪係翀翀澄澄⋯⋯，跳緊健康舞噃。 one more , two more ⋯⋯！風沙入眼，流晒眼淚𠻹。踩緊車，都唔得閑抹去淚痕，踩盡長堤，離開湊山公園。

呢條路好古怪，沿路有時係貨倉，有時係工廠仔，有時係上居下舖嘅民居，有時係一大塊農田⋯⋯。我醒起少年十五二十時，著住嗽叭 Red  Texwood ，踩單車喺汀角路由大埔經新娘潭入鹿頸，真係差唔多喎。嗰時車尾仲坐咗個人⋯⋯。

乜解究，呢條路咁多感觸！

前面有漢堡麭咖啡室，係麥記、家鄉雞咁嘅規模。泊好我嘅座騎，坐低歎杯啡，食個麭先。

經過一大幅清䓤農地，不遠處海邊平地突起咗一個高百米左右嘅小山丘，圓碌碌，好似一個餐麭放喺平地一樣，翠綠嘅山丘相比於周圍都係矮矮嘅農作物，呢個麪麭山特別顯眼。路邊有小路引入，路口個牌寫住「粟島神社」。左轉入小路穿過典型神社牌坊就到山腳。呢個山真得意，話上就上，一尐緩衝、慢慢斜上嘅地方都冇。上山路就係一條直筆甩石級，由山腳呢度一直上到頂，冇「之」字、冇轉彎。唐人見到，就一定叫佢做「天梯」。我話過喇，教堂、寺廟、神社⋯⋯，最鍾意起喺高點，並且鍾意畀條又長又直嘅石級過你行，我視為挑戰，最鐘意一口氣上晒佢。

上山路中間，有鐵通扶手將石級分隔左右，扶手由山腳起到山頂，亦方便行人攙扶。而家四野無人，由左邊抑或右邊上山又有乜所謂。不知如何，我揀咗右邊。正當我一口氣急步上山去到大半時，上面出現一個落山人，佢見我拿拿冧由右邊上緊上山，顕得不知所措，捉住中間扶手郁都唔郁。我離遠見到人，當然知錯，呢度係日本，好似香港咁，係英式，左上右落。即刻由扶手捐返過左邊，行到佢身邊，同佢躹躬微笑，佢同我講一輪㗎文，我當然唔地除。當知道我由外國嚟，我哋就用英文雞同鴨講起嚟，佢其實都係想話畀我知要左上右落啫。我見佢咁得意，就邀請佢同我喺梯級中合照一張相，佢又欣然接受。

唔可以一口氣上山，用咗兩口氣上到山頂。呢個圓山頂大約一個籃球場咁大，上面有一座神社，好樸實，就係木材搭建而成，入唔到去，只係喺外圍行一個匝，呢度係山頂，應該有360度景觀，不過周圍有高樹遮擋，只能夠間中，由某尐地方透過葉間望落中海。

唔使五分鐘，圍住神社行咗個匝，回頭落山，我見到頭先嗰個日本仔，仲喺山坡中間捉住扶手，震䠮䠮一步一步落緊山。我估佢有些少畏高，今日走上神社天梯，正在鍛煉自己膽量，補自己之不足。我估咋！每到一笪地方，我就怨自己唔識當地語言，如果可以溝通，旅遊嘅樂趣就更大喇。我梗係急步落山喇。別過日本仔，希望佢可以克服心魔，戰勝困難。Hah，如果我可以用㗎話同佢講呢兩句，咁就冇得彈喇。係嘞，呢條天梯，一共 186 級啫。

麪麥包山之後就係水鳥公園，因為呢一帶係濕地，係候鳥棲息之所。喺公園前有大停車場，汽車唔准駛入，費事嚇親尐雀仔，路邊有隱閉觀鳥台、公園長椅等設施，方便遊人觀鳥。公園免費進入，我踩住單車，輕輕兜咗個匝，最重要係借用咗洗手設備，辦咗尐急需解決嘅事情。觀鳥唔係我杯茶，踩車離開水鳥公園。

我一路係沿住半島嘅南岸中海岸邊向西行，而家仲好多時間，再睇地圖，決定放膽尐，由南岸，跨過半島，去北岸。由南至北呢一段，踩過嘅都係住宅區小車路，除咗去到有舖頭、郵局嘅小小鎮中心外，幾乎碰唔到人喺路上面行走，就算連車都少，所以踩得好輕鬆。踩踩下，見到鐵路軌，呵呵，我踩車跨過着名嘅鬼太郎鐵路，境港綫。

到咗北岸，情形就完全唔同，我踩入咗連接米子同境港嘅幹綫 431 國道，寬闊嘅馬路，非常繁忙。唔使擔心，我都係踩行人路啫，十分安全。北岸對往日本海，而家日本海北邊颱風啱啱過，我向西行，北風就由右邊海面吹嚟，好大風，加埋大車喺側邊飛馳而過，頂帽都吹跌幾次。

地圖話大漁市場就係前面！漁市場，我想去。再睇下 tracker，而家已經踩咗 成 30 K 車，加埋回程，咁多 K 路，中間賣老抽，搵邊個救？

向前，繼續去漁市場？返歸走頭？我梗係揀一往無前喇！

踩踩下，見到境港市嘅路標。噚日仲烏啄啄搵緊路唔知點去境港，真係估唔到而家可以踩車嚟。好得呀，我！

再踩多10K 左右，大漁市場就係海邊。過馬路踩入去。原來呢個係一個好大嘅購物區，有尐似我哋雪梨嘅大型綜合購物區。呢度，漁市場，只係其中一個區，其他飲飲食食、家俬雜物、購物商場，各自有一個區，如果冇車，行都行死嚟。

又係一樣，大漁市場前面又係巨型鬼太郎造像。我入去睇，又係失望，同和歌山漁市場又真係有好大分別。不過，一場嚟到，我都用400円買咗一隻蝦，一隻元貝帶子嚟炭燒，再去買真空包好嘅麪粉魚旦，就坐出去，喺帳蓬下食「海鮮」午餐， cheap cheap 地，都叫做圓咗個日本漁市場嘅心願。咁，尐炭燒「海鮮」好唔好食？算喇，咪又係咁嘅味，活到今時今日，乜嘢未食過？  Hmmm！

真係要回頭嘞，簡單嘅一條路，就由半島嘅北岸一直向東踩，都踩咗16 K路程。中間經過超級市場，即刻入去買咗好多即食小食，又有出前一丁同埋啤酒。哈，今晚嗰餐真係正。

好輕鬆咁踩到返客棧，天仲好光，最緊要嘅，腳骨力仍然繼續燃燒緊，大把貨賣。即刻踩向海邊。

皆生溫泉區嘅海岸綫好特別，唔知係天然抑或人為，海灣好似好多個半月連埋一齊，海浪由半月開口處打入嚟，撞喺防波亂石堤，擊起半天高浪花，真好睇！可能今日打風風尾，不少人走出嚟睇浪。有父母帶住細路，細路畀風吹到顛三倒四，咁得意嘅情景，父母一面好好笑，一面扶住唔好跌親佢。又係家庭樂一景，我好鍾意睇！

趁天未黑，我喺皆生海邊長堤，有咁遠踩咁遠，再由盡頭處踩返轉頭，夠皮嘞，就返客棧。睇下 checker ，埋單計數，今日踩咗 57.49 K ，咁梗係呢半年嚟嘅記錄喇，真係好滿意。

話時話，似乎今晚呢餐，係喺日本以嚟，最滿意嘅一餐。

歎世界之旅日本站又快尾聲，聽晚就會喺去俄羅斯嘅船上，今晚，發一個大和甜夢。

再噏過

嚤囉仔歎世界之旅（八）2016.10.06 Hiroshima to Sakaiminato

2016.10.06

嚤囉仔歎世界之旅（八）

Hiroshima to Sakaiminato

歎世界之旅嘅日本站，押尾城市終於出現： Sakaiminato 境港市。以前聽都未聽過，佢之所係押尾之站，就係因為呢個港囗有去海參崴嘅船。

因為新幹線由九州上本島直至大阪東京，都主要走南邊海岸。我要走去北邊，日本海海岸，所以，呢程車比較複雜，先要由廣島搭新幹綫去崗山 Okayama ，崗山向北轉 JR 去米子，然後轉本土境港綫火車去到尾站。全程要四粒幾鐘。係今次日本站搭得最長時間嘅火車行程。雖然話時間長，但係行程順暢，其實都好舒服。

中午時分，已經到達米子站。轉境港綫毋須出閘，一路跟住地下綠色綫，就行到去境港綫月台。我都做過下功課，知道境港係「鬼太郎」之鄉，估唔到真係咁誇張，行走境港綫嘅火車，內內外外，就算車頂天花、座位 ⋯⋯ 等，全部都印滿鬼太郎卡通嘅人物造型。月台上亦擺咗卡通人物紙板，畀人影相。一入月台，已經好有渡假氣氛，而家只係車站月台，到咗境港唔知係乜嘢光景。

境港綫全綫只得15個車站，全線都喺民居嘅後園經過，站站停，好鬼慢。連埋車頭都只得兩卡車，我覺得佢似電車多過似火車。短短路程，搞咗成粒鐘至到尾站。

落咗車，照例，有乜唔明，即刻去日鐵旅遊中心查詢。

其實，我今晚住嘅地方近米子，多過近境港，今日嚟嘅最大目標，係要搞清楚兩日後搭船去海參崴嘅碼頭嘅位置。我喺旅遊中心，道明來意。旅遊中心呢位女士，用英文同我溝通全無問題，似乎見慣英文人。佢畀晒我需要嘅資料，連陣間點樣去搵我間客棧都一一教路，非常幫得手。我將大行李寄存喺旅遊中心，承惠 300 円，然後自己輕裝上陣，探路去也。

境港市中心真係一個小鎮，除咗日鐵呢座建築物外，及眼之處，都係兩、三層高嘅平房。中心廣場其實就係巴士站、的士站及汽車上落位置。不過叫得鬼大郎之鄉，呢度又毫不吝嗇擺滿卡通雕塑，有大有細，而且製作都係精美嗰隻。

不過，我無暇欣賞，跳上巴士，直趨境港國際渡輪碼頭，落咗巴士仍然要行10分鐘路程。呢個乜嘢國際碼頭，做乜咁偏僻㗎！沿路一個人都冇，行到國際碼頭，好彩谷歌地圖睇過佢張相，知道冇行錯地方。推門入去，係似一個乘客等候大堂，不過都係一個人都冇。咁遠嚟到，唔可以就咁走人。我埋去個落咗閘嘅窗口，敲玻璃，咯咯咯 ⋯⋯。冇耐，有人出嚟應我，係個韓國仔。我知呢間係韓國船公司，見到韓國仔我唔出奇。使盡混身解數，希望佢明白我嘅來意：係想確認，呢度係我兩日後嘅登船地點。佢睇咗我船飛、護照，確認我喺乘客名單裏面。我相信佢明白，並且肯定我冇去錯地方嘞。

咁就放心晒，沿路行返出去，經過一個漁市場。記得前年去過日本和歌山一個漁市場，可以現場買到好多即食嘅海鮮、海產熟食，我而家咁肚餓，啱晒喇。入到去，唓！係就係賣海鮮，不過係賣畀人拎返屋企做餸嗰隻市場，如果想要碗海鮮拉麪，對唔住，冇！好失望咁離開漁市場，沿頭先巴士綫行返出市中心，就喺路邊小店，求其食碗最平嘅义燒拉麪算數。

今日目的已達，喺旅遊中心攞返行李，即刻搭火車出返米子站，再搭巴士去我客棧所在 ⋯⋯ 皆生溫泉。落車時，巴士司機都幫我略略指示方向，但係行行下都愈行愈糊塗。咁啱，有個踩單車少年，我畀地圖佢睇，佢見雞同鴨講，索性帶我去到客棧！乜尐人咁鬼好，日本，我真係鍾意你。

呢度溫泉區，度度都好鬼貴，呢間客棧係我喺日本住得最貴嘅一間。佢其實係一個自助式單位，仲有自己廚房。咁鬼貴，梗係舒服喇。雖然貴，都係值得，我居然喺呢度租到一架單車。哈，仲使審？聽日節目 ⋯⋯ 單車遊米子市。

急不及待，擺好行李後，即刻踩單車遊下周圍，冇耐，天都黑埋，放低單車，求其附近食尐嘢，再買尐早餐返歸，咁又一日喇。

再噏過

嚤囉仔歎世界之旅（七）2016.10.05 Miyajima Island , Hiroshima

2016.10.05

嚤囉仔歎世界之旅（七）

Miyajima island, Hiroshima

瞓咗一個和式嘅覺，即係瞓地下啫，其實冇乜特別。一早起身㷛滾水沖茶、淥個杯麪做早餐，就成咗習慣喇。噚晚仲未決定去邊，不過冇理由匿埋客棧啫。食過合味道，好似日本超人話：「我充滿力量喇」！決定唔理三七二十一，一於先去碼頭，有冇船過海去嚴島 Miyajima，就到時再算嘞。

冇帶遮，不過我有件 cortex 嘅褸，又係短褲涼鞋，有雨都頂得一陣嘅。

一早落街，條街明顯吹緊陣陣微寒又濕潤嘅風，風唔大，但係就有打風前嘅感覺。雖然仲係早，三三兩兩返工返學嘅人已經出現喺街頭，多數都拎住雨遮。

今日首先搭電車去西廣島火車站。颱風似乎未影響到市內日常生活，西廣島站係另一個交通交匯點 interchange ，一群群學生、上班族都忙於喺車站間轉車，呢度，生氣十足。我搭 JR 本地綫，毋須預訂車飛，攞住 pass 喺自動閘口旁邊通道進入月台。日本咁好服務，都費事睇水牌，直接喺閘口問路。我要搭嘅係 Sanyo 綫，就喺 Miyajima-guchi 站落車，車站職員仲提醒我下一班一號月台嘅車就係嘞。真好服務，多謝晒。

只係搭六個火車站，因為同返工返學相反方向，呢程車非常舒服。出咗火車站向海直行就見到大大隻字寫住 JR 碼頭。原來日鐡經營埋呢程去 Miyajima 嚴島嘅渡輪，又即係話我呢程船又係免費喇。


海邊，風勢明顯比較大，但又未到打風咁款，海面亦好正常。我去到碼頭，啱啱送咗班船，即係話渡輪如常運作緊。我企喺浮橋等下一班船，其他乘客亦陸續排喺我後面，睇個樣，都係遊客款。冇耐，第二班船又到，渡輪除咗接載乘客外，又接載輕型汽車，班次都幾繁密，方便島上居民出入。小輪唔多人，遊客多數坐出船尾，方便欣賞風景。

渡輪行咗一半，喺船上就見到一個典型紅色日本牌坊，呢個牌坊奇特之處，就係起喺海中心，咁特別，就梗係成為嚴島嘅地標喇。

我上咗碼頭，先搵份地圖參詳一下，再定下參觀路徑。成日流流長，唔急，先搵間咖啡室食個早茶先。咖啡室啱啱開，我係第一個客人。本來只係想食件餅，點知件餅同公司治差唔多錢，我咁縮骨，就叫件公司治，打包大半做午餐。我話過喇，我隨身帶備三文治膠袋㗎。


其實嚟嚴島，最大嘅景點就應該係登山纜車。平時，碼頭有免費巴士，接載乘客到纜車站。山上環迴景觀，梗係氣勢磅礡喇。不過，今日乜都冇，因為颱風，所以纜車暫停。都好嘅，畀我一個再嚟廣島嘅藉口。既然唔使登山，咁就慢慢 hea。按計劃，我會行一行島嘅北角。冇乜特別㗎，只係搵尐路嚟行下啫。

真係貴人出門招風雨，一起程就開始灑雨，唔大，不過都幾密。着起雨褸仔，繼續行程。行嘅係鄉間馬路，全程踫唔到一個人，不過就遇上一群鹿。似乎係一個家庭，有大有細，我哋互相對望，保持距離。鹿群喺雨中，由馬路走入樹林，消失跡影。同野鹿咁近距離，應該都係第一次，呢一程雨中漫步，都係值得。

雨愈落愈大，有時仲夾雜陣風，近中午，漸漸感覺風力，但仍然係可以接受。

近碼頭前面一帶，有兩三條街，全部都係平房，大多數係旅遊區形式嘅舖頭，當然有食肆、賣小手信嘅地方，呢度亦有特色本土手工製品，都要花尐時間至可以一一行勻。頭先我見到野鹿家庭，以為同佢好接近。點知嚟到墟市中間，居然有三、五隻「閒雲野鹿」混集人群之中，佢哋好似養慣咗嘅狗一樣，同人好親近，明顯係遊人經常用麪麭餵佢哋，佢哋亦改變淨係食草嘅習慣，食埋麪麭，情況就好似海鷗食薯條一樣。有隻野鹿真識食，叼咗鋪頭門外擺賣嘅日本草餅，食完一個又一個，直至遊客提醒事頭婆，佢鬧住（我估咋）日本話，一手就將野鹿推出街中心。遊客睇到加映短片：「八㗎野鹿」，今日雨中血拼，就更兼娛樂性喇。

由市集再沿西邊海岸行，就係地標紅色日本神社牌坊。嘩，好大雨。

牌坊其實叫「大鳥居」，係屬於嚴島神社其中一部份。嚴島神社最特別嘅地方，就係成個神社建築喺海灣水面之上。遠睇，就係一座浮喺水面嘅神社。神社由幾個神殿組成，殿與殿之間又長廊連接。神殿又有長廊或者拱橋連接陸地。神殿中部最前方就係本殿，本殿出面向海灣處有個露天舞台叫「高舞台」。舞台有左右走廊，正前方就係大鳥居牌坊。可以想象：達官貴人坐喺本殿，高舞台上，藝妓、舞妓載歌載舞。左右走廊盡頭處，正是樂師現場拍和嘅左右樂房。舞台背景就係海上豎起嘅紅色大鳥居，實景加埋海面倒影，呢場戲，極盡聲色之娛。

原來，嚴島神社建自日本平安時代，主要用作祭祀之用。每年都有十個八個重要祭祀日子，好似1月1日至1月3日，就有歲旦祭、二日祭及元始祭，4月15日（嘩！）又有桃花祭（嘩嘩！），年尾12月 23日，又有天長祭 ⋯⋯ 等等。

而家我行入神社，真係唔捨得走。今日有人結婚，嚟呢度影相，個個着晒靚靚傳統和服，化晒日本靚㛇，靚人靚景，賞心悅目，點捨得走，此其一。不過，最重要嘅係出面落緊傾盆大雨，點走呢，又？

等雨稍微細返尐，我行上斜坡，睇埋起喺高點嘅神社。呢座神社唔係好特別，不過，大殿門
口放咗一個好大嘅木魚，木魚雕成一個人頭嘅樣，雙目朝天，滿面不屑，個樣好趣怪。記得宮奇俊嘅千與千尋，湯婆婆屋裏面嗰三個人頭，就似足呢個人頭木魚喇。

冒住雨走返碼頭，中午前就上返船，全身濕晒。即刻返歸，將背囊所有嘢倒晒出嚟，用毛巾抹乾，相機、iPhone 、美金、日元攤晒喺榻榻米，用風筒吹乾，再冲返個熱水涼，換返乾衫，又出街 wee wet  喇。

原來最大風大雨就係今早中午前，到我返返廣島市區，無風無浪，雖然唔係陽光普照，藍色嘅天底都喺雲間露出嚟。今早剩返嘅半份公司治，就係我嘅午餐，噓，好彩唔算太濕。

廣島係海港，咁就搭電車去廣島港 Hiroshima Port，電車搭到尾站，仲以為好似長崎 Youme，又有公園丶又有超級市場，點知靜過鬼，不宜久留，咁就搭返電車出市中心，行吓呢個鬧市中嘅堡壘 ⋯⋯ 廣島城 Hiroshima  Castle。

第一代廣島城建於十六世紀豐臣秀吉時代，其間經歷無數次重建，當然最後完全毀於原爆，現時嘅廣島城，係1957 年原址重建，用嘅係紅毛泥鋼筋石屎結構，其實係新建築。不過廣島城由豐臣秀吉時代開始，就滿載歷史歲月痕跡。先生帶住一批批學生嚟參觀、學習本城歷史，實在係好有趣嘅活動。我由第一層走到第五層，其中有實物丶圖片，又有電影加埋英文解説。睇完後，唔多唔少，我都對廣島歷史有多些少印象。

展品中，有本詩集「春草堂詩鈔」，綫裝書、毛筆字，全部漢字書寫。再證我之前講法：華夏文化，果真花開兩朵，邊個話個名叫「中國」，就必定係華夏正宗！我愈嚟愈懷疑。

離開堡壘，又話黃昏，搭返電車出廣島站搵食。

火車站上蓋其實係座商業零售大樓，再加埋附近街鋪同埋地下商場，鍾意血拼嘅人可能行幾日都唔夠。而家，我只係搵嘢食，就只行兩層食街。

話明食街，呢度真係好多唔同類型食物，價錢亦唔貴。不過好多店鋪，食物似乎幾吸引，但係如果坐得唔舒服，又好多人等住食，咁嘅環境就唔多啱我。我揀咗一間靜靜地嘅，貪佢有小食、啤酒，仲有 ⋯⋯ 酥炸生蠔。

坐入去嘅都係孤獨食客，唔會一大棚人嘈喧巴閉，大家自斟自飲，各不相干，氣氛好到極。我先嚟一份炸生𧐢跟一杯 350 ml 生啤，咁上下，又嚟一碗細拉麵，斟下食下，再撳下肚仔，咦，仲有些少位置噃，走出廚房前面吧枱，睇下有乜好食。一煲鹵水汁浸住小食，我叫咗豆腐、羅白、烚蛋。呢餐歎咗個幾鐘，非常愉快。不過，都係有尐眼闊肚窄，又係食過龍告終，唉！

日本餐館非常好，佢幫你上咗餐後，絕唔會嚟打搞你，不過當你舉手時，佢又即刻出現，適量而唔過份嘅服務，實在非常舒適。

喺我自斟自飲之際，有位阿叔坐我隔籬枱。咁上下又同我噏一兩句，我起初笑而不語，佢咁上下又繼續講，我惟有話我唔地除，大家就開懷大笑，飲杯！

兩日廣島遊，非常滿意，再睇下地圖，其實都有好多值得遊，而今次未能探訪嘅地方，下次喇。

熟晒地埗喇，搭返電車返客棧，聽日早車，而且要四個鐘行程，早尐瞓。

再噏過