嚤囉仔歎世界之旅（十五） 2016.10.13 Vladivostok : Tokarevsky Lighthouse walk

嚤囉仔歎世界之旅（十五）

2016.10.13
Vladivostok : Tokarevsky Lighthouse walk

喺設計行程時，起初覺得四晚停海參崴，可能係多咗尐，但係要就船期同火車，咁就完全冇得走棧。好彩玩玩下，又冇話時間多到冇地方去。今日係海參崴最後一日活動，預算早上就去半島嘅最北端，海參崴燈塔 Tokarevsky Lighthouse。三日來，喺市區內都係靠對 11 號車（忽然醒起，細時用雙腳行路，就叫搭11號車）。聽日去燈塔，就要搭車嘞，臨瞓前亦做咗尐功課，摷到搭巴士尐資料，哈，咁啱，又係11號！

噚晚嗰間餐廳咁得，今朝一早就去歎個早餐。睇餐牌圖片，我以為係煎蛋多士，原來係打隻蛋落方麭再一齊焗，造法又幾特別，不過我鍾意煎蛋多尐。之之助助歎個早餐後，就出發去燈塔。巴士站應該就喺附近，不過都要費一番周張，搞清巴士路線方向。面皮幾尺厚，沿途一路唔怕醜問路，係旅行必備條件。

因為去嘅方向係離開市區，加上返工時間已過，呢程巴士都幾舒服。當地人多數都有貯值車飛，我買單程飛，20 盧布一程，以遊客嚟講，都係抵搭。總站落車後，仲要用 30 分鐘左右行過一個山仔。我沿簡單石屎車路行，山坡呢邊。一路起緊別墅式新屋，另一邊就係東博斯普魯斯海峽全景。喺呢度睇，Russky 橋，已經唔再宏偉，喺湮雲矇矇之中，耗費 1.1 billion 美金，3.1km 長嘅吊橋，眼前就好似一件小擺設，放喺平靜水中，造物與塵世，正在合譜一曲 ⋯⋯，咪嘈 ⋯⋯ 微風送，海浪湧。呵呵！天籟頌。企喺山坡高點南望，海角長堤就在眼前，佢向南一直延伸出海灣，直指遠處橫臥嘅 Russky 島北岸。長堤盡處，白色小點就係燈塔之所在。呵！原來目的地已喺腳下。


我，一個陌生人，喺一個陌生地行咗咁耐，前無路人，後無來者，只係偶爾一兩架汽車經過。如果我喺單身靚女，應該有尐擔心。不過，我而家係獨行成熟男人，又真係冇乜好驚。所以話啫，你想做獨行俠，都要講尐條件嘅。

行過高點，跟住就係一大段落坡路，好快行到海邊，斜坡盡處，就係一個石灘，嗰度有一間木搭嘅咖啡吧，賣飲品、三文治等簡單食物，店外有搖搖吊椅，裏面熱帶佈置。想當然，海參崴仲夏之時，呢度應該生意滔滔。據說，自蘇俄開始，海參威地方政府，已經明令呢度唔准游水；當地人，好有性格，佢哋啋你都傻，照游不誤！不過，梗係喺夏天喇，而家開始天冷，「游」客？睇唔到噃！我抬頭再環視成個海濱，睇埋停泊喺海邊嘅遊艇仔，咁，「遊」客呢？都有十個八個啩。照我睇，全部俄人。

資料介紹：遊客係可以走出海角，沿住幾米闊、幾百米長，石頭堆成嘅天然長堤，然後一路行出燈塔，潮漲時，海水浸過海堤，仲要除鞋澗水而過；咁應該係好好玩嘅節目。今日嚟就係為咗咁做。


行過亂石灘頭，吓！步入長堤之路，居然攔咗路障，仲有人把守。佢見我接近圍欄，即刻走出臨時帳篷更亭，對住我，似足學民仔黃之鋒，雙手喺胸前打個大交叉。吓，唔准入！我成個謝晒，梗係好失望喇。行長堤去燈塔，係今日主菜！我遠望百米外，有三兩個人，喺白色燈塔外，行行企企，他他條條，好似開緊工咁款。唔行得長堤，只好齋喺警戒線前，扮嘢影相喇。人生就是如此，咫尺天崖，明明就喺眼前，伸手可及，偏偏就不可觸。緣份嘅嘢，幾時到你強求？

雖然同長堤燈塔，我哋有緣無份，不過，周圍水天一色靚景，嚟到呢度，都係不枉此行嘅，尤其係嗰份寧靜舒態，更屬難得 ⋯⋯。嘿！有尐嘢，真係咪得戚得咁快！正在𣉢眼享受天籟平和空氣之際，話口未完，忽然大量尖聲㷛冬瓜由遠而近，Bee lee bah lah ，捲晒脷，劃破長空。離遠回望，一架旅遊巴停喺石灘前。我即刻行返上石灘，穿過普通人群，走入咖啡吧，他他條條食個午餐。唔使好耐，普通人們，靚機影罷靚相，乘車離去。我再喺海岸邊兜多個匝，之後就原路行返巴士站，搭車鬆人。

由總站搭車出返廣場，乘客比頭先多，但係始終唔係返工放工時間，坐喺車廂內都好舒服。望出窗外，靜觀呢個陌生國度，溶入常人日常生活之中，我去旅行，就係想親身感一下呢種難得嘅經驗。

出返市區，隨便食個晏，就漫無目的四圍逛逛。三、四點之後，亦慢慢天黑。我去附近街角什貨舖，入尐杯麪、腸仔、茶包等什食，預備嚟緊嘅七日西伯利亞火車之旅。同什貨鋪老闆娘講聲拜拜，話晒千里迢迢，無端端嚟到呢度，仲幫趁咗四日，都算係緣份一場喇。

懶人尋舊路，又去返今朝嗰間吧，飲杯啤，食個餐。至此，四日海參崴之旅，就畫上句號。七日西伯利亞鐡路之旅，聽日正式啓航。

我哋喺西伯利亞鐵路 ⋯⋯

再噏過。

嚤囉仔歎世界之旅（十四） 2016.10.12 Vladivostok : Russky island castles tour

嚤囉仔歎世界之旅（十四）

2016.10.12

Vladivostok : Russky island castles tour

獨行去旅行，如果景點就喺大城內，或者公共交通線可達嘅地方，就唔係問題。但如果景點偏遠，甚至根本未係好開發，公共交通就會係一個好大嘅難題。遇到咁嘅情況，走去旅行社揾 shared tours ，就係首選。不過淡季組唔到團，又或者尐團唔講英文， private tour 就係唯一選擇，咁就梗係貴尐喇，肯唔肯出呢個錢，就係個人選擇。去到海參崴唔去睇炮台，硬係覺得少咁尐嘢。我豪咗呢個一人團，咁就慳尐食、慳尐住，補返條數嘞。

噚日報咗團後，就知道行程及導遊資料。導遊叫 Elana ，上網摷摷，原來佢都有網頁介紹自己，叫做 Tours with local，價錢亦大致相同。佢最大嘅賣點，就係識英文。

準時八點， Elana 就出現喺大堂，相認後就出街，跳上佢架鈴木車仔，出發去 Russky island 喇。

由海參崴去 Russky Island，就係向東南行。首先經過鷹眼高點下面嘅高速公路，駛上金角灣大橋跨過金角海灣。到達半島對岸 Pervomaysiky Rayon 區，再行另一條高架吊橋 ：Russky 大橋，跨過東博斯普魯斯海峽 East Bosphorus Strait ，就到達 Russky Island，我哋今朝就喺呢個島活動。

過橋後，鈴木車仔隨即兜個圈轉落橋底。呢度直情「唔係路」，因為根本就冇路，車仔只係沿住草地車軌痕跡，拋下拋下迂迴行駛，喺橋底一個小山坡前停車。走上小山坡，我哋向懸崖方向行。吊橋邊，沿住懸崖山勢，就係一列坑道，但見一大排 180 海岸坑道炮，炮口全部向住博斯普魯斯海峽，Elana 就喺呢排海岸炮前講歷史：

海參崴係兵家必爭之地，就人人皆知。 Ruskky ，呢個南邊最大外島，順理成章就負起最重要嘅保衛責任：就係防止敵船由 Russky Island 東南面嘅日本海進入海參崴。講到尾，即係主要提防日本仔入侵喇。

1904年，日俄喺大清老家打咗場大戰，而日本以亞洲身份，第一次打敗一個歐洲老牌帝國，就係耳熟能詳嘅日俄大戰喇。自此，無論係沙俄抑或蘇俄，喺遠東地區，都視日本為第一大敵。因此，三十年代初，蘇俄就喺呢度，佈置咗呢一批海岸坑道大炮，以阻止日本海軍襲擊。

聽過講解，我就喺坑道跳嚟跳去，爬高爬低四圍影相，影夠後又上車走人。

睇完海防大炮陣，我哋離開大橋㡳爛地，就駛返上嶄新公路。其實，兩條大橋同埋島上所有現代化建築物，都係蘇聯解體之後嘅產物。直至上世紀 90 年代尾， Russky 島都係一個軍事基地，根本唔會對外開放，冇橋、冇現代化公路。兩條大橋同所有現代化道路，都係喺 2012 年 海參崴 APEC  峰會之前冇耐建成。

車仔沿公路向南駛，再一個屈尾拾向北，其實就係兜住個 Russky 島北面呢個大裂口：Novik 海灣。冇耐就離開高速公路，右轉駛入一條一個窿、二個窿嘅爛路，向 Russky 島嘅高地進發。以前呢條路都係畀大軍車行，軍車行，就梗冇問題，日本車仔就要左閃右避喇。行過好一段「過山車」山坡路，前面停車場有個收費亭，呢度就係開放咗冇耐嘅露天博物館 The Voroshilov Battery。

原來，頭先睇嘅180 坑道大炮，好似係威係勢，但係射程同火力都不足以阻止突然、同大規模嘅艦隊進攻。當時嘅蘇聯國防部，就決定加強呢度嘅大炮火力。

我哋過咗收費亭向海邊行，兩邊樹林中間一片長長平坦草地，呢度就係強力大炮炮台所在地。當時，蘇聯國防部非常有創意，呢度有兩組炮台，共六支 305mm 大炮，最有趣之處，原來大炮、炮塔以及成個發射系統，都係由戰艦 Poltava 號拆出，搬嚟呢度用。因此，成個發射流程，都參照戰艦嘅操作。所以，喺地面，雖然就只見到兩個典型戰艦炮塔：圓碌碌，兩頭轉嗰隻，睇嚟唔大（當然亦因此唔容易畀人發現），原來地底有三層唔同嘅操作中心，同埋一條 250 公尺嘅運輸隧道。其實，就係一隻埋藏喺地下嘅戰艦。

我哋由垂直鐡梯攀落逐層參觀，睇到機械化設備將炮彈即時裝嵌，再經輸送帶運上炮塔發射 ⋯⋯；成百年前嘅軍事工藝，真係嘆為觀止。但係，每次睇到人類利用高知慧發展戰爭武器，就慨歎人類究竟係聰明抑或愚蠢！又或者，互相蠶食，根本就係生物繁衍嘅規律，成個人類歷史，就係一個弱肉強食嘅長篇故事，古往今來，從未停止過。現實就是如此。

炮台落成後，以當時國防部長命名，就叫 Kliment Voroshilov Battery 喇。呢個咁勁揪嘅炮台，除咗演習外，原來從未用嚟打過入侵戰艦！「咁咪好嘥？」我問。「又唔可以話嘥嘅」，Elana 話，據說日本仔好想打嚟，但係探聽到情報，知道 Russky 島呢度，佈置咗大殺傷力武器，因此就唔敢來犯。所謂止戈為武，雖然冇打過仗，但係始終發揮咗佢嘅阻嘛威力，佢咁講喎。

鈴木仔回頭向大橋方向回程，不過中途，我哋停一停俄羅斯遠東嘅著名學府，遠東聯邦大學 Far East Federation University Ruskky 島新校舍 。大學喺島嘅北面海灣興建，遠眺博斯普魯斯海峽 Russky 大橋。又因為大學由荒蕪拔地而起，全部新簌簌建築物，佈局劃一整齊。呢度土地唔係問題，大到飛起嘅空間感，再加上校園面對海峽而建，風景秀麗，令人非常舒服。除咗學生返學外，一般海參威人，都鍾意嚟呢度行下。停低車後，我哋由山坡校舍群行落海濱步行徑，再行出大學專用碼頭。一路上，閒話家常外，Elana 佢又講下海參崴一尐近況：

蘇聯解體後，俄羅斯將海參崴變成民用。但係成個城市結構唔係話變就變到，好多依賴軍事嘅經濟活動忽然停止，做成長達三年冇糧出嘅慘況。唔講唔知，當時 Ruskky 島軍營餓死咗兩個士兵，十幾個餓到入醫院！呢件事暴光後，成為軍中醜聞。士兵尚且如此，一般平民慘況，可想而知喇。再者， Ruskky 島本來就係軍事基地，居民住喺島上就冇地權嘅觀念，而家島上民居嘅地權所屬，仍然懸而未決。居民住權，正等有能者發落喇。

儘管問題多多，開放嘅社會總比封閉嘅好。開放旅遊，亦為海參崴帶嚟額外收入，起碼 Elana 因此就擁有兩架車 ⋯⋯。講講下，我對俄羅斯人，又有多尐尐嘅了解喇。

下午一點， Elana 載我返客棧，咁又完咗呢個半日行程。我走返上房整頓一下，再孭起背囊，又出發喇。客棧外斜路底有間幾肆正嘅餐廳，個名叫 Selfie ，咁有現代氣息，我仲未食晏晝，一於試下佢。

門口有衣帽間，我掂行掂過，覺得擺低件褸係好麻煩嘅事，因為䄛袋又有相機，又有銀包⋯⋯。點知衣帽間小姐十分堅持，一定要擺低至畀入去。小姐叫到，我唯有遵命，但唔係好明點解咁堅持。我自己諗，係咪喺餐堂着褸除䄛，被視為冇禮貌；抑或一除一著，件褸塵土飛揚，影響衛生呢？諗落，咁都有係尐道理嘅。

食完晏，沿餐㕔落返大街，就喺路邊，有座公園仔，不過唔多起眼，因為要喺路邊上一段石級至可以見到。我因為做咗功課，專登嚟搵至搵到，如果就咁行過，就一定睇唔到。呢度就係光頭佬尤伯蓮納嘅故居。公園仔中間，竪立咗光頭佬嘅雕像，係佢喺音樂劇國王與我裏面，暹羅王嘅造形。講真，呢個雕像就真係粗糙咗尐，不過佢嘅故居就真係一座大宅。光頭佬咁成功，海參威人與有榮焉，就造咗呢個像，擺正喺佢屋企門口。


原來光頭佬有蒙古血統，海參威出世，屋企有個錢㗎。革命後，財產畀布爾什維克共產咗，好彩有機會走佬去咗美國。此後，佢嘅成功故事，就記載喺藝術史册，呢度就唔使多講嘞。我諗，如果冇咁嘅挫折，又可能造就唔到咁偉大嘅藝術家。又應韓公退之嗰句：「以彼易此，孰得孰失，必有能辨之者」。我就話，「安有能辯之者乎？」喇。


別過光頭佬，又係行路時間，今日續返噚日未完之事。我沿半山路向纜車站方向行。途中有個小小博物館，我見入場費又唔係多錢，都走入去睇下。呢尐私人博物館，一路上都見到有，其實係當地名人嘅故居，佢哋盡量俢復故居外觀，屋內就將當時傢俬、擺設、日用品等保持原貌。當然獎章、官階、舊相，以致顯赫族譜等等威水 quali ，就梗係騷晒出嚟。不過，如果你唔係當地人，其實冇乜感覺。由此，我又諗起，有人建議李小龍故居做博物館，道理都係一樣。不過香港係借來嘅時空，有幾何有家庭，可以喺一間屋住過百年？

噚日摸門釘嘅太平洋艦隊博物館，卒之入到去。博物館用唔同年代嘅戰爭做主題，分成唔同展館。最早就梗係日俄戰爭時期，直到第二次大戰。內容都離唔開戰爭原因、艦隊戰術及各個戰役嘅經過，再展示戰爭留低嘅一尐實物、船艦模型等。最後一個館就略略講下各大國嘅海軍服飾，又化好大篇幅介紹同中囯海軍嘅友好關係。

我鍾意歷史，但係咁密集去睇，實在睇下睇下，都真係有尐厭。館內有個工作人員阿嬸（其實可能細過我），見到我一條友，又唔識俄文，都嚟幫趁，咁得意。就走嚟用僅有嘅英文，對每個館都略作介紹。我咁受照顧，之後，我邀請佢我行影返張相。佢撥撥頭髮，就欣然我一齊 selfie 喇。

展館樓下空地，擺放咗好多大炮等戰爭武器。睇下睇下，對呢尐殺人武器，愈嚟愈反感。

今日行程，又告結束，沿舊路返客棧，中途又探訪一下位於市區北面，海參威最靚嘅東正教堂 The Cathedral of the Interccession ，之後一條直路南下返返廣場。今晚試下另一間餐廳仔，呢間嘢都OK，又坐得舒服，仲有好快 wifi。睇下餐牌，個早餐都唔錯。好，聽朝又嚟幫趁。

行返客棧，冲涼瞓覺又一日。

再噏過。

嚤囉仔歎世界之旅（十三）2016.10.11 Vladivostok City tour

嚤囉仔歎世界之旅（十三）

2016.10.11

Vladivostok city tour

單人房小客棧，五臟俱全，交通方便。仲有一個窗望到金角灣 The Zolotoy Rog Bay，好滿意嘞。基本上，噚晚瞓得好舒服，不過，可能舊式建築，牆身較為單薄，隔籬房洗手沖涼，開水閂水，聽得一清二楚。就算鼻鼾、發開口夢，甚至極其私密嘅夢中秘密，都一一傳入耳中。幸好多數都年青力壯，唔使夜晚起九十幾次身，否則冲水聲此起彼落，咁點瞓。

噚晚做咗些少功課，設計咗今日城市遊嘅路綫。根據地圖顯示，海參崴市中心區嘅景點相當密集，而個城市根本就唔大，市內目標景點絶對可以用腳搞掂晒。

噚日唔知埞，着少咗衫，今日着住兩件薄褸，外面再加羽絨。而薄薄行山褲似乎都搞得掂，雪褲可能誇張咗尐。食過早餐，孭起背囊出街嘞。

第一個站就係中央廣場。中央廣場係海邊一幅大地，最繁忙商業大街就喺前面周圍，政府行政大樓，郵輪碼頭火車站都喺投石之遙，佢梗係城市焦點之所在喇。最點睛嘅標誌，就梗係廣場中間面向海嘅巨型雕塑 Monument to Fighters for Soviet Power。

當一個城市有價值嘅時候，就必然有人嚟霸地盤，古今中外，人類、野獸，莫不如是，海參崴亦唔例外。以前，當只係原始經濟活動，如採集海參、人參，或者入森林打獵之時，因為大把空間各自搵食，尚可保持生態平衡。到大航海時期，海參威呢個不凍港，而且係連繫歐亞大陸嘅要塞，當然就係大國必爭之地。

海參崴曾經屬於僚、金，女真。大清時，長期禁止漢人踏足海參崴，入嚟採集人參野味嘅漢人，就係禁之不絕嘅非法入境者喇。鴉片戰爭後，大清國無力守土，唔好講佔咗二百幾年嘅漢人中原土地，連關外女真自己老巢都守唔住。俄國仲唔趁佢病攞佢命，1860 年，Captain-Lieutenant Alexey K. Shefner 領導俄軍殺到，隨即將海參崴建設成為一個俄羅斯遠東城市，並且驅逐大清子民。

海參崴就算經歷日俄戰爭，都仍然喺俄羅斯嘅掌握之中。十月革命後，歐洲嗰邊推翻咗沙俄，不過遠東呢邊，白俄聯同中、美、日三國曾經佔領海參崴，同新生紅色政權對抗。隨住白俄 1919 年徹底冧檔，中美亦退出聯盟，就剩返日本仔。卒之到 1922 年十月蘇聯紅軍由 Ieronim Petrovich Uborevich (1896-1937) 帶領，重奪海參崴。中央廣場嘅雕像，講嘅就係呢段歷史。咁又解釋到，噚日提到嘅列寧像，佢手指指，指向日本係乜嘢意思嘞！

既然廣場係城市焦點所在，國家、城市有乜節日，有乜興典，呢度當然有重大角色喇。

今朝我嚟得早，周圍都係怱怱而過返工返學嘅人潮，廣場前巴士站更聚集咗大批等車嘅人。朝早嘅城市，忙碌有序，充滿生氣。我唔使返工，就好整以暇，一邊欣賞人哋忙碌，一邊慢慢擺機影相。

廣場近海邊角落有間紅頂屋仔，門口有個巨型吹氣俄羅斯套疊公仔，睇個樣應該就係遊客商店。行近睇，重門緊閉。乜仲未開門咩？不過門口寫住營業時間，而家應該開工喎。膽粗粗，推開兩重門，真係一間舖頭，對住門口有小櫃位，小姐向我打招呼，Hi  good morning！講英文，好得很。由廣場睇，舖仔係間屋仔，原來佢仲有下面兩層。呢間鋪賣好多前蘇聯嘅徽章，列寧、斯太林時代都有，非常有趣。不過我就買咗頂有海參崴市徽嘅喼帽。

行返上樓上，知道小姐佢講英文，我咁多口，即刻向佢 ⋯⋯ 查詢旅行社資料。哈哈，真係得來全不費功夫，櫃位玻璃面就擺咗好多資料，佢一一解釋，又畀旅行社嘅地址我。

事不宜遲，即刻出發。地圖話，旅行社都係喺我今日所行嘅路綫之上。

旅行社所在地係一條步行街，街中休憩空間有長櫈畀遊人歇歇腳，兩邊都係兩層高嘅建築，上居下舖，亦有食肆開喺樓上。我一早嚟行呢個條街，見到所有舖頭都閂門大吉，有尐有招牌喺門外，亦有食肆將餐牌貼喺窗上。一來係俄文，我鬼知佢寫乜；二來，因為玻璃窗太細，如果唔係專登就去睇，根本就唔知佢做乜嘢生意。加上重門緊閉，我仲以為時間尚早，舖頭仲未開門，點敢貿然推門入去。卻原來 ⋯⋯

各位，呢度尐鋪頭，就係閂埋門做生意嘅。原來呢度天氣凍，而家日間仲係五度六度，到真正冷天，早上零下廿幾三十度，完全唔出奇，所以所有舖頭都有暖氣，門口亦有兩重，用嚟保溫。食肆內都有衣架、掛衣柱畀客人除低大褸。所以，入舖頭，就要放膽推門入內。不過，好似今日咁，中午，天氣稍暖，有尐舖頭，尤其做零售嘅，失魂街客 passing trade 好緊要，佢哋就會打開門，希望吸引客人進入。不過食肆就多數唔會咁做。

頭先，我喺小窗門望入一間咖啡室，又幾似樣喎，推門入去。卒之，成個鐘，喺度他他條條歎咗杯啡，食咗件餅。咁先至暸解上述海參崴人做生意嘅故事。

咁啱，咖啡室就喺旅行社對面。飲完咖啡就過旅行社。道明來意，佢介紹咗幾個地點，我就揀咗 Russky 島炮台歷史遊。而家係旅遊淡季，只辦私人旅遊，咁樣五粒鐘，承惠7000盧布。即係100美金多尐，殺你。咁就約定聽日喺客棧大堂見。卒之搞掂埋聽日活動，咁就安心繼續市區遊。

手揸呢份地圖，標出景點。噚晚亦對照過 trip adviser，所介紹嘅熱門景點都真係大同小異，就放心跟住地圖走嘞。

海參崴其實係 Russky Bay 上一個半島嘅南端岬角 headland ，海路由四面八方嚟，最方便就係駛入金角灣登陸海參崴，再由呢度，就可以連接成個俄羅斯大陸。而家就親身體會不凍港嘅位置，幾百年嚟，令海參崴成為兵家必爭之地嘅道理。海參崴嘅發展，亦係由岬角金角灣碼頭呢邊開始。

由步行街走向岬角嘅北邊（其實都只係十零分鐘路程），就係 Amur Bay ，呢度而家發展成海濱步行長堤，中間有噴水池圓形廣場，長堤邊全部係帳篷式食肆，薯條小食、雪糕汽水。長堤盡頭仲有海洋水族館，長堤仲可以繼續向北行，不過就齋行冇舖頭喇。好快行咗個匝，由中間圓形廣場入返市區。

自古以嚟（我鐘意呢句說話，因為「古」成點？任你點噏都得），海參崴就係民族大溶爐，邊度有錢搵，做生意嘅人就會四方八面湧入。海參崴以出產林中野味及海產著名，咪以為「海參崴」呢個名係流嘅，海參就係呢度第一著名產品，咁，乜嘢人最鍾意食海參？唔使問喇，所以自古以嚟，除咗韓國、日本之外，呢度就有唔少嚟自中土嘅華人喺呢度聚居，做生意。喺步行街下一條街，就有唐人聚居區 Millionka living quarters，地圖話呢度有華人痕跡，我行嚟行去，點睇都睇唔到乜嘢痕跡。不過建築物向街嘅外牆鐵樓梯，我又覺得幾得意。

由北面經返最大最旺、又貫穿岬角南北岸嘅 Okeansky Avenue ，又走返出中央廣場，一直沿南邊海岸行，就可以穿過金角灣吊橋橋底。喺橋底行過，你就感覺到佢嘅高度，佢亦係世界數一數二高嘅吊索橋。當然喇，而家如果條橋唔夠高，點入巨型郵輪，點做生意？

過咗橋冇幾遠，一隻潛艇擺咗喺岸上，呢度就係開放式海事博物館，我話呢隻潛艇似一個紀念碑   Monument ，多過係一個展覽品。成個海邊博物館，就係用嚟紀念二戰時喺海上陣亡嘅官兵。前面有台階小廣場，燒住永恆之火 eternity flame ，後面一大列牆，上面刻住陣亡官兵嘅官階，名字。wall of  honour ， 呢尐係戰爭紀念館所必備。我地坎培拉有、美國有、英國有⋯⋯，神州？我就未見過嘞，只有「無名英雄」紀念碑。中國人，真委屈。為國而死，寫個名都咁孤寒！

其實，紀念館廣場呢度後面就係海軍總部（指揮部？），一列兩三層樓咁高嘅鐵枝重重包圍，裏面有孭住機槍巡邏嘅士兵，我硬係覺得佢哋嘅眼神銳利，盡量都唔會同佢哋有眼神接觸，影相時，動作都要慢慢嚟。

小心翼行過呢區，就係老少咸宜嘅步行休憩海濱長廊。長廊邊有會議中心。2012年，海參崴至開過 APEC 亞洲經濟峰會。普京都有出席，海參崴除咗係軍事要塞之外，亦係俄羅斯大力發展經濟嘅重要遠東海港。

呢度絕對係悠閒嘅地方，不過我仲有好多地方要行，所以用操兵嘅步幅行過。行過咗市中心區，海參崴就冇乜平地，一離開海濱區就係斜路一路上山。就好似上環西營盤，一離開電車路就上山一樣。

喺山坡邊，就有一座大平洋盤隊博物館 Pacific  Fleet museum。佢正門喺半山，但我由海邊入。到我睇到正門告示牌，至知逢星期二休館，我摸咗門釘，惟有就繼續向山上行。地圖話，高處有兩個景點，一個係觀景台。明白吖，高點，梗係睇景嘅好地方。另一個叫 funicular，乜嚟呢？唔理三七二十一，繼續上。呢一段，又特別斜，好似由高昇戲院撑上嚤囉街、文武廟咁。過咗一個細細公園仔，一間打斜咗嘅四方水泥屋仔，裏面打斜得好緊要咁停咗一架類似電車嘅物體，咁仲唔係纜車係乜嘢？原來 funicular 就係纜車。再查下資料，香港山頂纜車就係 funicular 而唔係 cable car，所以個英文名叫做  Peak Tram。

我讀書水皮真係有原因，就係樣樣求求其其。 Funicular ，其實遠喺 1972 年，香港雞時代，我已經好清楚咁接觸過呢隻字。當時中樂組阿Sir，甘仔，佢將一隻西洋歌劇咁嘅款嘅樂曲，改用中樂演奏。馬仔、阿樹同我，就拉二胡，凝芳、麗姐就係彈撥部份，雷公、仲有成日走音嘅文士，組成香港雞中樂團。我哋第一次嘅演出，好有可能就有呢隻歌： Funiculi funicular ！個名係乜意思？冇問，亦冇興趣知！二十年後，1992 年移民澳洲，有個伙記係意大利人，我成日喺舖頭一路補鞋，一路同佢一齊唱  Funiculi funicular！咁又知多尐，原來係意大利歌。乜意思？又冇問，又唔知！四十五年後，喺地圖又見返呢隻字，終於知道係乜！再摷資料，原來就算 Funiculi funicular 呢首歌，都係為意大利一條登山纜車線開通而寫。有冇興趣聽下呢隻歌？

https://youtu.be/XW0W7j04iRQ

我最鐘意坐有軌嘅車，即刻一個箭步標入車廂坐低。有位阿嬸坐喺車尾，佢對住我講嘢，我唔識俄文，但我知佢同我收錢，問佢幾錢都費事，因為都係唔識聽喇。我倒晒尐散紙出嚟畀佢攞，原來只收二十盧布。冇耐，阿嬸打個無綫電話叫開車，大䌫除除將纜車扯上山。其實纜車並非作觀光用途，而纜車車程亦約只一百米左右，就係等半山居民出入唔使咁辛苦，當然尤其係嗰尐老弱及行動不便嘅居民。

唔使五分鐘，䌫車停喺半山大路邊。離開纜車站，再迂迴向山行多十五分鐘路程，就係鷹眼高點。呢度向南望住成個金角海灣，巍峨嘅金角灣大橋就喺眼前，汽車出入大橋都要經過腳下呢條大馬路。

企喺高點憑欄遠望之餘，梗係好忙碌咁擺機影相，遊人三三兩兩咁上嚟，又三三兩兩咁落返去，今日絕對唔係多人，都係川流不息咁喇。我睇夠本亦落山，搭返纜車走人。回程唔落海邊，沿半山馬路一直行返中央廣場。

返到廣場，天色已黑，條路都係歸心似箭嘅人群，個個怱忙大踏步，呢個城市嘅節奏都好快噃。廣場邊政府大樓對面有梯級行落地下，以為係過馬路行人隧道，原來係一間地下餐廳。旣然咁就腳，今晚就試試你 ⋯⋯ 。

飲飽食醉後，漫步踱返屋企。睇下個 tracker ，原來今日行咗 26 公里路，我都真係幾行得。咦，今晚個餐如何？OK喇，咪又係咁，出街食嘢，我唔會有乜嘢奢望嘅。

咁又一日。

再噏過。

嚤囉仔歎世界之旅（十二）2016.10.10 Valdivostok

2016.10.10

嚤囉仔歎世界之旅（十二）

Vladivostok

由東海港開去海參崴，約 650 公里，只係由雪梨屋企來回坎培拉嘅距離，實在唔算遠，不過隻船就要行成 24 粒鐘，其實真係好慢喎。今日成個上晝，都係繼續行船。

噚日，終於見到俄國人加伏特加嘅場景。今朝早餐後，我又坐返上去咖啡吧，霸返同一張枱，做返差唔多嘅嘢。冇幾耐，同一班酒鬼又到。佢哋真係飲得，一早又伏特加酒，然後又重演噚日好戲。唔知係咪見慣不怪，今朝我又唔覺得有乜嘢特別喎。

正喺佢有飲，我有我寫之際，渡輪喺下午兩點駛入海參崴郵輪碼頭。慣喇，船公司依照登船次序，128 個俄人，首先登岸。爭先恐後，原來唔係深圳過關專有場景，俄人行船爭解䌫，原來都唔係省油之燈。我哋等俄人上晒，就上岸排隊過海關。

俄人唔興拖喼，個個都拎三幾個大行李袋，又有帆布袋，又有紙皮箱，又孭又拖又拉又踢，實在十分論盡。我行李過咗 X 光機後就等過移民局  ⋯⋯。到我喇，行埋櫃位，一睇，咁靚嘅移民局 Madam ，真係第一次見，佢睇電腦，掃描指模再影相，之後蓋印，全程帶住微笑，交返䕶照畀我時仲不忘咁話： Welcome to Russia ！我就回句： Nice to meet you。 咁樣進入俄羅斯，第一個印象，真係十分良好喎。

一樣喇，每次到達新地方，第一件事就要搞清自己所在地，喺谷歌地圖已經大概知道去客棧嘅路綫，我都有好充裕時間，首先走返上郵輪碼頭辦公大樓上蓋。呢度係碼頭觀景台，接船或者送船，都可以睇住親友上船落船。由呢度影返落我搭呢隻東方夢幻號，呢隻嘢，外觀又實在幾呃得下人。回望兩日航程，唔算十分滿意，但都算係經驗一場。

火車站就喺碼頭前，我沿住天橋落返地面，想話行入火車站問下四日後嘅火車資料。要入火車站大堂，全部都要過安檢。地面大堂原來係火車站最高層，我要揪住行李落到底層至去到票務窗口。雞同鴨講係我嘅預期，好彩我預備晒資料，又有俄文車飛，我相信佢明白我來意，並叫我四日後返返嚟，不過記住唔好搞錯時間。

原來俄羅斯東西部地區時間，最長相差足足七個鐘，日常生活，唔同時區都用自己時間，就係所謂 local time。但係火車時間表，全國就劃一用莫斯科時間，車飛上印住嘅時間，就係莫斯科時間，而你喺火車站見到嘅鐘所顯示嘅，亦係莫斯科時間。例如四日後我嘅火車開車時間係 0402 ，其實就係海參崴時間 1102，所以票務窗位阿姐，用俄文千叮萬囑，唔好搞錯（我估佢喺咁講），仲用鉛筆喺我車飛上寫住 1102 。公務員，都唔係個個 Hea 嘅。

搞掂咗最重要嘅嘢，就放心晒。根據計劃，我由火車站行去客棧，應該係15分鐘內嘅行程。

過咗馬路，就係著名嘅海參崴列寧像，佢趟開大褸，左手垂低，拎住除咗出嚟嘅毡毛，右手指住東面日本方向，佢話：「Comrades，you're going the right way」。乜嘢意思呢，吓？

我都幾有信心我係行啱路，不過沿途都不斷問人。我發覺英俄對話，大家喺語言方面，係唔知對方噏乜，不過整體而言又明白你想點，所以原來語言係冇意思嘅，反而手勢、表情就最可以表達意思。

好快到達客棧。我呢四日住嘅，係呢間五 ⋯⋯ 層高客棧，喺正最旺區嘅後街住宅區，交通方便到不得了。

登記後想問下櫃枱有冇旅行社介紹，佢十問九唔知，我又問有冇乜嘢著名景點可以介紹，佢個樣十分為難，我又問尐客入住呢度多數去邊度玩？今次佢終於畀到個好有用嘅答案我：佢叫我上網搵！真聰明。

我謝過佢之後就上房擺低嘢，ET phone home 一輪後，攞住用 150 盧布買嘅地圖，出發行街喇。其實冇乜目的地，只係想瞭解一下周圍環境。

客棧喺斜路最高點，我向街嘅另一邊走，斜路底係警局，咁係咪安全尐呢？轉過彎，就已經係好繁忙嘅中心區。已經五點，天未黑，條街似乎好多放工嘅人。成條馬路都係車，繁忙時間，相信一定塞車塞到飛起。中心區馬路十字路口，都有行人隧道過馬路，隧道囗有街頭樂隊，少女合唱團，個個省鏡，賞心悅目。走出路面，融入人潮。個個都衣衫整齊，道路整潔，行人忙碌而有禮有序。俄羅斯少女更加唔得了，金髮碧眼身材高佻，高踭長筒靴係潮流，皮樓冷帽披肩。嘩，邊得嚟咁多 Models 通街行，如果我話個個靚女，此話都假唔晒喇。呢度行街，真係唔會悶喎。

天好快黑，收太陽後，原來都幾凍，我著 Tee 同埋兩件薄褸，原來唔係好得，街上嘅人都著住羽絨、冷帽。我又餓又凍，走入一間餐廳，睇餐牌，俄文！問有冇英文餐牌？冇！好，預咗嘞！橫掃一輪，指住隔籬𡃁仔嗰碟麪，伸出一隻手指。OK，佢明。跟住叫飲品，我作狀飲嘢，佢醒目嘞，即刻畀個酒餐牌我。呵，有公仔，指住細啤，搞掂。遊目四顧，原來呢間叫做 Wok noodle bar，仲寫住 China Beijing 。呵呵，海參崴第一餐，居然係唐餐！睇下開放式廚房，件件鬼。咦，唐人呢？

原來我叫嘅係海鮮炒拉麪，個碟好大隻，連餸連麪大約有一個拳頭咁多。咁珍貴，我要慢慢食。

應該感恩，Touch wood 。因為做咗「細胃」總幹事，旅行前，我以為唔可以一邊飲啤一邊食嘢，so far 慢慢斟，慢慢飲，如果有得個零鐘食個餐，就算一杯 500 ml 啤，都搞得佢掂。 no complains 喇。

埋單，呢一餐，又啤又麪，又有靚女侍應，又喺正旺區，居然唔使 500 盧布！我喺客棧買張地圖，得一張紙咋，都要百五。尐物價真係古怪。

離開餐館，天都黑喇，條街仲係人多車多，原路返歸。客棧隔籬不遠有間街角士多仔，入去賣尐早餐、生果、茶包等食物。士多老闆娘唔識英文，其實，日常嘅嘢，好多時，手勢表情都可以達到溝通效果，盡力而已。呢位老闆娘仲犀利，佢叫我入去櫃位埋邊自己攞，都費事同你講咁多。真醒目。

俄國人習慣內歛，所以畀人有冷漠嘅感覺，其實，你對人有禮、誠懇，多數都有相同回報。呢個係我一日嚟嘅初步感覺。

再噏過

嚤囉仔歎世界之旅（十一）2016.10.09 Donghae （Korea ） to Vladivostok

2016.10.09

嚤囉仔歎世界之旅（十一）

Donghae ( Korea)  to Vladivostok

船艙裏面，不知天昏地暗，好彩有 iPhone ，佢好準時叫我起身。船上個喇叭又叫人去餐廳食自助早餐，做過一次蠢仔，點會做第二次。一早起身，攞住杯麪上二樓滾水機冲滾水，返房慢慢歎我呢個自助早餐。

雖然我喺船住兩日，但係不知如何，竟然要我換房。不過，既然佢應承，之後都係一個人住晒間房，換房又有乜所謂。今日嘅安排係咁嘅：早餐過後就執好行李。大部份韓國人就落船返屋企。如果有人好似我咁，繼續坐呢隻船去海參崴，就有兩個選擇：其一，可以簡單留返喺隻船上等換房；又可以將行李暫放喺接待處附近，跟手落船行下街，夠鐘就返上船。我梗係揀落船行街喇。

其實，船上除咗嗰個垃圾自助餐廳之外，二樓有個唔錯嘅咖啡吧，喺嗰度買一尐基本小食，總好過嗰尐垃圾食物。我執好行李後就拎上個咖啡吧，叫咗杯美國咖啡，就預備坐到落船喇。

朝早九點半，船就靠岸，船公司已經做好登船次序，韓國人以旅行團做單位，首先逐一登岸，我哋幾個外國人，就押到最後喇。登陸後離開碼頭，東海港原來離市中心都好遠，如果你話有返三幾個鐘，或者都可以搭的士出去睇下個城。不過而家只得嗰個零鐘，就邊度都唔好去，喺附近散下步算數喇。

仲係好早，周圍都冇乜人，我就喺附近條街兜咗一個大圈。嗰度其實都有尐食嘢嘅地方，不過全部都未開檔。除咗影咗幾張相外，就一無所得咁返返碼頭。

離開咗船嘅人，一切就要重新登記，再排過隊攞登船證，然後過海關，咁就上返船嘞。又咁講，今次離船都唔係一無所得嘅，起碼本䕶照就多咗個韓國出入境印嘞，

由今早韓國人上岸到下午俄國人上船，咁就即係渡輪種族大換血。每個民族都有唔同嘅民族性，而家進行咗大換血，船上嘅氣氛當然亦改變不少。

我上船攞咗鎖匙，換咗隔籬房 1101，自己鋪自己牀已經做過一次，今次照辦煮碗，再做一次咁啫。搞掂咗間房就走上咖啡吧。原來全船最精彩部份就喺呢度！

呢架只係渡輪，當然唔會提供乜嘢娛樂，甚至連公共空間坐嘅地方都冇乜。我發現，原來最好就係坐入個咖啡吧，咁上下買尐飲品、食物，就可以好舒服咁消磨一日，我一個人就霸咗一張窗口枱，最啱我寫埋尐遊記。

今早，韓人喺度時，因為就快上岸，唔值得化錢飲咖啡，所以餐廳十分寧靜，只有我一個人自斟自飲。到我上返船，我又坐返入咖啡吧，食個腸仔蛋做午餐，然後就開始歎咖啡，寫遊記，都係十分寧靜。中午過後，船上自助餐廳收檔。逐漸，咖啡吧就人多起嚟，起初，都係正常嘅，慢慢，咖啡吧氣氛就沸騰起嚟。

伏特加同俄羅斯人密不可分，佢哋一入嚟，每人就叫咗一份，兩吋高圓身窄杯嘅水狀物體，我唔使問，都知呢杯就係酒精濃到燒得着嘅伏特加。點飲呢，就係攞起個杯， bottom up 一次過全部倒晒落肚，睇個樣都唔係點經過個口！再要飲，又要再出櫃位畀錢，船上侍應攞住一公升大樽幫佢哋逐杯加斟。起初慢慢飲，斯斯文文有講有笑。不過咁樣飲唔過癮，逐杯畀錢亦唔化算。

此時，有尐人成樽私伙伏特加拎入嚟，逐一斟滿枱上空杯，仲自備薯片、花生。船上韓人侍應當然埋枱干涉。好彩都係一輪交涉，唔算爭執，都係斯文。酒客做好做醜，將大剌剌放喺枱面上嘅大樽伏特加酒放落側邊櫈上，咁就當解決咗問題，然後繼續不斷攞出嚟斟酒。韓人侍應都冇佢符，惟有當睇唔到算數。

飲飲下，講嘢愈嚟愈大聲，動作又愈嚟愈大，再加上酒精上腦，控制動作機能就愈嚟愈水皮，酒杯、餐具跌落地下，此起彼落。有時唔知邊個激動過頭，拍抬拍櫈大發牢騷。好彩其他未醉仲控制得住嘅人，就會撳住佢，又或者要佢坐埋一邊，搵人安慰佢嘅情緒。

佢哋有時又不甘寂寞，要企起身行下。一揸住個杯企起身，就成杯酒倒晒落地下，佢仲一臉茫然，企喺度，唔知自己做緊乜。而行嚟行去個尐，又一仆一碌，碰跌杯碟有之，自己跪低埋有之 ⋯⋯ ！

真好睇，我係唔飲酒嘅人，一生人未去過酒吧（啤酒算唔算？）。咁高密度見醉酒佬，呢次係人生第一次，算係見識見識。

公道講，佢哋就算點樣，都冇騷擾其他人，友儕亦互相照顧，避免鬧事。我就坐喺隔籬枱，除咗有時拍枱拍櫈嚇我一跳外，我繼續飲我嘅咖啡，寫我嘅遊記。醉酒佬，佢哋都算自律。

又有人會落呢個定論：俄國佬？咪係伏特加同埋醉酒佬囉。

我唔知呢個結論有幾啱，就今次，呢隻船有 128 個俄羅斯人，剛才我描述嘅場景，有份參演者只係廿人留下。一竹篙打一船人，從來唔係我嘅信念。不過又要講，呢二十個人嘅行為，就做咗一場大龍鳳喇。

又真係，就算大部份人係常人，甚至有部份係一等一好人，都千其唔好低估少數人嘅破壞力。

好抱歉，呢大部份人嘅聲譽，就會因為少部份人嘅行為而受損，咁係唔公道，不過，就係十分無奈嘅事實。

船上喇叭又叫人去食自助餐，我又預備杯麪，返房食我嘅晚餐。

冇乜好做，沖涼瞓覺喇。

再噏過

嚤囉仔歎世界之旅（十）2016.10.08 Sakaiminato to Vladivostok （via Donghae , Korea )

2016.10.08

嚤囉仔歎世界之旅（十）

Sakaiminato to Vladivostok  via Donghae ( Korea )

今日係呢個行程日本段最後一日，早上有些少雨紛紛，一丁早餐後，執好行李，天氣就一路變好，可能係因為颱風逐漸遠去啩。交低房門匙，拉住個拖喼就去巴士站，站頭係皆生溫泉區旅遊中心。離遠送咗架三號巴士車尾，惟有喺旅遊中心四圍 Hea 下，我攞住巴士時間表，問一問工作人員巴士幾時到。
佢睇下，話：「27分」
我睇鐘「而家咪 27 咯！巴士呢？」
「咪喺你背後囉！」

唔係作嘢，而係真係咁準時。搭公共交通，佢哋準時，仲有一個好處，就係有時唔識睇、或者睇唔到站頭嘅名，如果有時間表喺手，你就知道自己身處何方嘞，所以有可能嘅話，盡量上車前問站頭攞份時間表。

攬埋行李，跳上巴士，即出米子車站。我嘅七日 JR pass 前日已經到期，今日要科水買去境港站嘅車飛。行咗第三日，熟晒架步。出站後，即刻去旅遊中心寄存行李，再用 500 円租單車，今朝就專心尐行下鬼太郎之鄕。

今日星期六，遊人真係多咗，而且有一批批搭旅遊車嚟嘅遊行團。

鬼太郎，絕對係呢度嘅主角。火車站大樓向廣場嘅外牆，就係一幅好巨型嘅鬼太郎牆畫。向市集方向行，由廣場中間鬼太郎圖騰柱開始，去到成公里外嘅市集盡頭鬼太郎展覽館為止，街兩邊行人路，都擺放咗鬼太郎卡通嘅人物雕塑 Yokai statues，全部係非常精美嘅銅雕，總共有 153 個。就算連呢條街，都以鬼太郎作者水木茂為名，叫做 Mizuki Shigeru Road 水木茂通。我其實之前唔認識呢套卡通，不過好似隱約聽過鬼太郎呢個名。

我踩單車由廣場開始，慢慢踩，慢慢睇。 兩旁舖頭，好多都以鬼太郎卡通做招倈，例如糖果店叫妖果堂，饅頭舖叫妖怪饅頭 ⋯⋯，等等。亦有妖怪工房，教人點樣製作鬼太郎卡通人物，而小小卡通紀念品，好似匙扣、水杯、毛巾等等就到處都有得賣。我一直踩到去水木展覧館，仰望一代大師，瞭解一下，佢究竟係乜嘢人。

泊低座駕喺門口就入館喇，首先承惠 700 円。我走上樓上，發覺全部都係日文，就走返落樓想買個聲音導遊。門口知道我唔係本地客，首先回返三百円過我。呵，原來外國人收平尐！咁樣做，我第一次見。好彩小鎮人情，發乎心，只講直覺、常識，唔講乜嘢「政治正確」，唔係又有人去「平機會」告一告鬼太郎，話佢歧視本地人！我都話喇，最憎政治正確！再者，聲音導遊，又係免費！乜咁着數，真係多謝晒。

展館係一座兩層高建築物，以小鎮嚟講，咁嘅規模都唔算太細。樓上用咗好大篇幅去介紹水木茂本人生平，佢冇吹噓話自己幾叻幾叻，反而講咗好多自己嘅瘀嘢。好明顯，一個已經成功咗嘅人，梗係可以自嘲，瑕不掩瑜，佢嘅自信心足夠抵消生命中點點砂石。反之，一個失敗嘅人（當然，成功、失敗，絕對係個人嘅感覺，此處不論），就好介意人哋點睇佢，你話佢唔好，佢就話你睇小佢；你話佢好。佢又可以話你諷刺佢，總之有乜依郁，都上綱上線話人歧視。呢度拉開講一筆：

我初嚟澳洲時，知道鬼佬唔敢講「Chinaman」，話係 racist，我就認為 man come from China 就係 Chinaman，有乜嘢歧視！我係專抝氣嘅人，就專要講 Chinaman。個個鬼佬聽到都話：「嗱，你講咋，唔關我事！」我再問佢哋，點解講 Chinaman  係 racist ，佢哋冇個知。又有一個荒謬嘅例子，我上西班牙話堂，講到咖啡，如果齋啡，本來叫 cafe negro , 因為 negro 唔講得，所以叫 cafe solo。其實 negro 就係顏色，黑色咁解，但係政治正確起嚟，就連「black」都唔准講，真豈有此理！不如我又問，同樣係講顏色，點解「白」又唔係 racist 呢？好明顯，唔關顏色事，係黑、白背後代表嘅意義。

有人話喺鬼佬地方畀人叫 Ching 、 Chingie ，就會大打出手。咁啱，蔣家大小姐就叫 Ching ，朋友間，佢嘅花朶就係 Chingie，行不改名，坐不改姓。大小姐信心爆棚，使驚畀人歧視？一字咁淺，歧視與否，根本唔在於用乜嘢字，某實，更重要係呢個群體嘅集體表現，畀外界人一個乜嘢印象。又例如，鬼佬根本唔怕畀人叫「鬼」，就算本來係歧視，但係問心講，講起「鬼佬」，你又點會因為「鬼佬」而岐視佢哋。哈哈，咁啱，大小姐個 fiancé ，佢都叫自己做鬼仔占士，歧視你個頭！

不過掉轉講，如果人哋話「偉大光榮正確」、「強國崛起」、「強國人民」；又或者話某人「愛國」，咁又係咪讚揚呢？大家心照嘞。

又多口講多咗，講返水木茂。

據展館介紹，水木茂四歲先識講嘢。讀書唔成，考試唔好，似乎係好多漫畫家嘅不過最經典嘅係佢想考入大阪園藝學校，當時要取錄五十人，有五十一人報名，水木茂係唯一落選嘅考生。二戰時入伍參加新畿內亞戰役，做號角手，吹喇叭又走音，受傷時唔記得自己型，搞到冇咗隻左手⋯⋯。總之就係失敗人生。戰後復原，先至搵到自己原來係屬於漫話界嘅。又係一樣喇，由出公仔書開始，到變成動畫上電視，再有真人鬼太郎電影，水木茂名利雙收，更喺1991年獲頒「紫綬褒章」。境港人有咁嘅鄉里，梗係與有榮焉，封佢做全鄕偶像 ⋯⋯ blah blah blah。

個館細細哋，不過都真係好用心去經營，況且，因為水木茂嘅名氣，亦為境港帶嚟旅遊收益。心田先祖種，福地後人耕。水木先生在天之靈，都會保佑同鄉子姪順風順水嘅。

展覽館門口有隻鬼，好多人都想同佢影相，佢當然唔會托手㬹，但係整古做怪嚟嚇下人，就係佢嘅工作範圍喇。

我諗，香港都不乏咁樣嘅漫畫家，最著名就係老夫子王澤喇，點解做唔到好似水木先生咁呢？水木先生係境港土生土長，先天已經有份鄉情，如果自己人對原居地有歷史感，有歸屬感。咁樣，大家嘅念舊、人情味就油然而生，呢尐感情唔係可以「打造」出嚟。喺香港，鄉土情，喺大一統政策下，係受打壓嘅思潮。冇鄉土情，又何生人情味，何以念舊呢？好悲觀！

終於對鬼太郎有多一尐嘅理解。

踩車喺附近兜多兩兜，就直接踩出漁市場附近嘅食肆，既然係今次日本段最後一餐，咁就豪氣尐。叫咗份饅魚定食，承惠 1800 円，係我今次最貴嘅一餐，如果唔係要踩單車，我可能要杯啤酒𠻹。

送君千里，終須一別。交還單車，攞返行李，走去廣場巴士站，嗰度，每逢船期日，下午有免費穿梭巴士，接送客人由火車站呢度，去國際碼頭。我正在等緊車之際，有大旅遊車駛到，車頭玻璃有個牌「永安五天廣島團」，跟住有廿人左右落車，bee lee ba la 廣東話，哈，原來香港團都嚟，失覺晒。

穿梭巴士帶咗我去國際碼頭，咁上下，有人開檔賣杯麪小食等，又有檔口換錢。唔執輸，唔知船上會係乜嘢環境，即刻入尐杯麪零食，以備不時。再換  400 蚊美金做盧布，咁樣，一到海參崴，就即刻有錢使。

差唔多等到六點幾，候船室都係小貓三四！唔係啩，咁大隻船，得咁少乘客。忽然間候船室熱鬧起嚟，幾架旅遊車，載咗一大批人到，而且，清一色，全部韓國人。到而家我大概明白，呢間 DBS 船公司根本就係韓國公司，佢主要服務韓國旅遊公司，就係載韓國乘客來往日本。不過有多餘位，就載埋我呢尐外國人。呢一程去南韓東海港，而家唔係旺季，全船有二百幾人，外國人（非韓）只得5個，四個日本，一個袋鼠。

登船時間終於到來，攞咗登船證，就過日本海關櫃位，蓋印離境，沙唷喇嗱日本。咁好地方，梗係： I'll be back soon。

行上船橋，登上東方夢幻號渡海郵輪 Eastern Dream。船上菲籍船員為乘客逐一驗明正身後，就派船艙鎖匙，我係第一層 1103 室。打開艙門，房間冇牀，只得一個四四方方嘅空間，不過有獨立浴廁。地下放咗四套枕頭被鋪，墊褥係街市有得賣，兩吋厚，三摺海棉嗰隻，全部放晒落地，咁即係瞓地下。都唔緊要，四套枕頭被鋪係乜嘢意思，係咪有另外三個人？四個人，三唔識七咁瞓，又未免難堪尐。我係買咗頭等飛，就算經濟艙都有自己張牀，有間隔、有自己私人空間！即刻去問個究竟。正在要向接待處小姐發牢騷之際，佢一句說話就說服咗我：「呢間房，你瞓晒」！嘩，好嘢！佢又補充一句，咁樣唔係老逢，不過而家係淡季，就益下我。係咩？咁就真係多謝晒。

即刻返船艙，兩套變成一張牀，另外兩套用嚟坐，咁嘅環境，I can't complain 喇。

搞得嚟，又話食飯時間。船上用美金都得，九蚊美金買份自助餐。入到餐廳一睇，九成係辣嘢，好多泡菜。我全部唔啱食，其求搵咗尐唔辣嘅嘢，裝埋得一小碟。非常失望，食完就算數喇，下次唔再幫趁。

唔好以為自己搭緊豪華郵輪至得㗎，呢架只係渡輪，係載我過海嘅渡輪，只不過而家要過一個好大嘅海，渡輪就大尐咁話啫。

瞓喺地下就梗係感覺到摩打聲，公道講，就算豪華郵輪都有摩打聲。今晚咁大間房，又有私人浴廁，我實在太滿意。摩打聲？催眠曲至真，早唞。

再噏過

嚤囉仔歎世界之旅（九）2016.10.07 Yonago, Sakaiminato

2016.10.07

嚤囉仔歎世界之旅（九）

Yonago , Sakaiminato

我住嘅客棧其實好近海邊，初初睇谷歌地圖，以為係沙灘，可以游水。又話係溫泉區，仲以為四處地下冒晒煙 ⋯⋯。噚日略略睇過，似乎唔係咁嘅一回事，呢個海灘，唔多啱游水噃，附近，四圍都係幾層高嘅樓宇，根本就係一個普通嘅住宅區。話時話，成日出咗街，其實又冇乜時間游水啫。

今朝食過早餐後，就踩單車去街街，初步計劃係由皆生溫泉呢度，踩車直入米子市 Yonago，再睇下邊度有咖啡飲，然後再算。


呢度踩車慣上行人路，一路上，都係踩車返學嘅學生仔學生妹多，踩車返工嘅人似乎少見。由皆生溫泉客棧踩入米子市，只係五公里路程，我慢慢踩，盡量融入當地交通習慣。正在等燈過馬路，對面有三幾個人，其中一個身掛斜孭布條，手拎住大聲公，一邊噏嘢，一邊躹躬，我梗唔知佢噏乜東東喇，不過睇樣，九成係做選舉拉票宣傳。佢側邊有條直幡喺風中飄飄下，Hah，寫住乜呢 ⋯⋯ 日本⋯⋯ 共⋯⋯ 產黨！我一生人第一次，咁近距離接近日共。綠公仔着咗，我踩住車同日共份子貼身而過，之後，就愈走愈遠⋯⋯，繼續愈走愈遠 ⋯⋯。

一直踩出米子車站，連車站都冇乜人，呢度真係人丁單薄。好彩車站周圍都有幾個特別尐嘅雕塑，同佢哋影下相，都謀殺咗半粒鐘。真失望，一直沿大路踩都見唔到咖啡室，再攞出地圖，睇下跟住去邊度好。

客棧所在地皆生溫泉（北面）同米子站呢度（南面），向境港（西面）方向直出，其實係一個半島。半島嘅北面就係日本海，遠望韓國，南面就係「中海」，中海好似一個地中海，周圍都係陸地，而境港就係半島嘅盡頭，前面就係一條長形海峽，海水穿過境港海峽進出中海，調節住中海嘅生態。地圖顕示，向境港方向，沿路都有尐值得睇嘅嘢噃。好，跳上單車，向境港方向出發，

沿馬馬路邊行人路踩，唔夠幾公里，左手邊就有「湊山公園」嘅路標。我八卦，鍾意四圍睇下，踩入公園。原來公園邊係中海堤岸，有梯級形觀海斜坡，長堤可以踩車，又可以漫步。根據地圖方位額示，呢度應該係極佳位置欣賞日落。長堤後一大塊草地，就係公園中心所在，一大群小學生正在活動，似乎係進行緊隊際比賽，氣氛熱烈。草地邊三三兩兩一群群媽咪，離遠為自己乖乖打氣，感覺溫馨。忽然一陣風沙，吹到我眼矇矇 ⋯⋯ ，咦，嗰邊細路咪係翀翀澄澄⋯⋯，跳緊健康舞噃。 one more , two more ⋯⋯！風沙入眼，流晒眼淚𠻹。踩緊車，都唔得閑抹去淚痕，踩盡長堤，離開湊山公園。

呢條路好古怪，沿路有時係貨倉，有時係工廠仔，有時係上居下舖嘅民居，有時係一大塊農田⋯⋯。我醒起少年十五二十時，著住嗽叭 Red  Texwood ，踩單車喺汀角路由大埔經新娘潭入鹿頸，真係差唔多喎。嗰時車尾仲坐咗個人⋯⋯。

乜解究，呢條路咁多感觸！

前面有漢堡麭咖啡室，係麥記、家鄉雞咁嘅規模。泊好我嘅座騎，坐低歎杯啡，食個麭先。

經過一大幅清䓤農地，不遠處海邊平地突起咗一個高百米左右嘅小山丘，圓碌碌，好似一個餐麭放喺平地一樣，翠綠嘅山丘相比於周圍都係矮矮嘅農作物，呢個麪麭山特別顯眼。路邊有小路引入，路口個牌寫住「粟島神社」。左轉入小路穿過典型神社牌坊就到山腳。呢個山真得意，話上就上，一尐緩衝、慢慢斜上嘅地方都冇。上山路就係一條直筆甩石級，由山腳呢度一直上到頂，冇「之」字、冇轉彎。唐人見到，就一定叫佢做「天梯」。我話過喇，教堂、寺廟、神社⋯⋯，最鍾意起喺高點，並且鍾意畀條又長又直嘅石級過你行，我視為挑戰，最鐘意一口氣上晒佢。

上山路中間，有鐵通扶手將石級分隔左右，扶手由山腳起到山頂，亦方便行人攙扶。而家四野無人，由左邊抑或右邊上山又有乜所謂。不知如何，我揀咗右邊。正當我一口氣急步上山去到大半時，上面出現一個落山人，佢見我拿拿冧由右邊上緊上山，顕得不知所措，捉住中間扶手郁都唔郁。我離遠見到人，當然知錯，呢度係日本，好似香港咁，係英式，左上右落。即刻由扶手捐返過左邊，行到佢身邊，同佢躹躬微笑，佢同我講一輪㗎文，我當然唔地除。當知道我由外國嚟，我哋就用英文雞同鴨講起嚟，佢其實都係想話畀我知要左上右落啫。我見佢咁得意，就邀請佢同我喺梯級中合照一張相，佢又欣然接受。

唔可以一口氣上山，用咗兩口氣上到山頂。呢個圓山頂大約一個籃球場咁大，上面有一座神社，好樸實，就係木材搭建而成，入唔到去，只係喺外圍行一個匝，呢度係山頂，應該有360度景觀，不過周圍有高樹遮擋，只能夠間中，由某尐地方透過葉間望落中海。

唔使五分鐘，圍住神社行咗個匝，回頭落山，我見到頭先嗰個日本仔，仲喺山坡中間捉住扶手，震䠮䠮一步一步落緊山。我估佢有些少畏高，今日走上神社天梯，正在鍛煉自己膽量，補自己之不足。我估咋！每到一笪地方，我就怨自己唔識當地語言，如果可以溝通，旅遊嘅樂趣就更大喇。我梗係急步落山喇。別過日本仔，希望佢可以克服心魔，戰勝困難。Hah，如果我可以用㗎話同佢講呢兩句，咁就冇得彈喇。係嘞，呢條天梯，一共 186 級啫。

麪麥包山之後就係水鳥公園，因為呢一帶係濕地，係候鳥棲息之所。喺公園前有大停車場，汽車唔准駛入，費事嚇親尐雀仔，路邊有隱閉觀鳥台、公園長椅等設施，方便遊人觀鳥。公園免費進入，我踩住單車，輕輕兜咗個匝，最重要係借用咗洗手設備，辦咗尐急需解決嘅事情。觀鳥唔係我杯茶，踩車離開水鳥公園。

我一路係沿住半島嘅南岸中海岸邊向西行，而家仲好多時間，再睇地圖，決定放膽尐，由南岸，跨過半島，去北岸。由南至北呢一段，踩過嘅都係住宅區小車路，除咗去到有舖頭、郵局嘅小小鎮中心外，幾乎碰唔到人喺路上面行走，就算連車都少，所以踩得好輕鬆。踩踩下，見到鐵路軌，呵呵，我踩車跨過着名嘅鬼太郎鐵路，境港綫。

到咗北岸，情形就完全唔同，我踩入咗連接米子同境港嘅幹綫 431 國道，寬闊嘅馬路，非常繁忙。唔使擔心，我都係踩行人路啫，十分安全。北岸對往日本海，而家日本海北邊颱風啱啱過，我向西行，北風就由右邊海面吹嚟，好大風，加埋大車喺側邊飛馳而過，頂帽都吹跌幾次。

地圖話大漁市場就係前面！漁市場，我想去。再睇下 tracker，而家已經踩咗 成 30 K 車，加埋回程，咁多 K 路，中間賣老抽，搵邊個救？

向前，繼續去漁市場？返歸走頭？我梗係揀一往無前喇！

踩踩下，見到境港市嘅路標。噚日仲烏啄啄搵緊路唔知點去境港，真係估唔到而家可以踩車嚟。好得呀，我！

再踩多10K 左右，大漁市場就係海邊。過馬路踩入去。原來呢個係一個好大嘅購物區，有尐似我哋雪梨嘅大型綜合購物區。呢度，漁市場，只係其中一個區，其他飲飲食食、家俬雜物、購物商場，各自有一個區，如果冇車，行都行死嚟。

又係一樣，大漁市場前面又係巨型鬼太郎造像。我入去睇，又係失望，同和歌山漁市場又真係有好大分別。不過，一場嚟到，我都用400円買咗一隻蝦，一隻元貝帶子嚟炭燒，再去買真空包好嘅麪粉魚旦，就坐出去，喺帳蓬下食「海鮮」午餐， cheap cheap 地，都叫做圓咗個日本漁市場嘅心願。咁，尐炭燒「海鮮」好唔好食？算喇，咪又係咁嘅味，活到今時今日，乜嘢未食過？  Hmmm！

真係要回頭嘞，簡單嘅一條路，就由半島嘅北岸一直向東踩，都踩咗16 K路程。中間經過超級市場，即刻入去買咗好多即食小食，又有出前一丁同埋啤酒。哈，今晚嗰餐真係正。

好輕鬆咁踩到返客棧，天仲好光，最緊要嘅，腳骨力仍然繼續燃燒緊，大把貨賣。即刻踩向海邊。

皆生溫泉區嘅海岸綫好特別，唔知係天然抑或人為，海灣好似好多個半月連埋一齊，海浪由半月開口處打入嚟，撞喺防波亂石堤，擊起半天高浪花，真好睇！可能今日打風風尾，不少人走出嚟睇浪。有父母帶住細路，細路畀風吹到顛三倒四，咁得意嘅情景，父母一面好好笑，一面扶住唔好跌親佢。又係家庭樂一景，我好鍾意睇！

趁天未黑，我喺皆生海邊長堤，有咁遠踩咁遠，再由盡頭處踩返轉頭，夠皮嘞，就返客棧。睇下 checker ，埋單計數，今日踩咗 57.49 K ，咁梗係呢半年嚟嘅記錄喇，真係好滿意。

話時話，似乎今晚呢餐，係喺日本以嚟，最滿意嘅一餐。

歎世界之旅日本站又快尾聲，聽晚就會喺去俄羅斯嘅船上，今晚，發一個大和甜夢。

再噏過